އަލްޙާފިޡް އިބްރާހީމް ޝަބީބު މުޙައްމަދު
އިބްރާހީމް ޝަބީބު މުޙައްމަދު، ވަރަށް ކުޑައިރުއްސުރެ ފެށިގެން ކީރިތި ޤުރްއާން ހިތުދަސްކުރުމަށް ޝައުޤުވެރިކަން ހުރެއެވެ. ފުރަތަމަ ކިޔަވަންފެށީ، ކޯވިޑުގެ ބަލިމަޑުކަމުގެ ތެރޭގައި އަމިއްލަގޮތުންނެވެ. 11 ފޮތް ދަސްވުމުން، ޝަބީބަށް ޙިފްޡު ކުރެވިދާނެ ކަމުގެ ފުރިހަމަ ޔަޤީންކަން އޮތުމާއެކު، އޮންލައިންކޮށް ކިޔަވައިދެއްވާ މުދައްރިސެއް ކަމަށްވާ، ޙަފީޡާ ޢަބްދުﷲއާ އެކީގައި ހިތުދަސްކުރުމުގެ މަސައްކަތް ކުރިއަށް ގެންދިޔައެވެ.
އިބްރާހީމް ޝަބީބު ހިތުދަސްކުރަން ފުރަތަމަ ފެށީ، 5 ސަފުހާއިން 5 ސަފުހާއިންނެވެ. އެއަށްފަހު، ކީރިތި ޤުރްއާން އެއްކޮށް ދަސްކޮށް މުރާޖަޢާ ކުރިއެވެ. ކީރިތި ޤުރްއާން އެއްކޮށް ދަސްވުމުން، މުތަޝާބިހް އާޔަތްތައް ދަސްކޮށް، އިތުރަށް މުރާޖަޢާ ކުރުމަށް މުދައްރިސް ޙަފީޡާގެ ލަފަޔާއެކުގައި، އަލްޙާފިޡާ ސަބީނާ ޢަބްދުﷲގެ އެހީތެރިކަން ހޯދިއެވެ. މާރިޗު 2025 ގައި ޤުރްއާން މުރާޖަޢާ ކުރަން ފަށައި، މުރާޖަޢާކޮށް ނިންމީ، ޑިސެންބަރު 2025 ގައެވެ.
އިބްރާހީމް ޝަބީބު މުޙައްމަދު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ 27 ޖަނަވަރީ 2026 ގައެވެ.
ކީރިތި ޤުރްއާން ހިތުދަސްކުރުމުގައި އިބްރާހީމް ޝަބީބަށް އެހީތެރިވެދެއްވި މަންމައާއި ދައްތަ އަދި މުދައްރިސުންނަށް ހިތުގެ އެންމެ ފުންމިނުން ޝުކުރު އަދާކުރެއެވެ.