އަލްޙާފިޡާ އަމަތުއްރަޙްމާން ބިންތި ޢަބްދުﷲ
އަމަތުއްރަޙްމާން ބިންތި ޢަބްދުﷲ، ކުޑައިރުއްސުރެ ކީރިތި ޤުރްއާން ހިތުދަސްކުރުމަށް ޝައުޤުވެރިވެއެވެ. އަމަތުއްރަޙްމާން، ޤުރްއާން ހިތުދަސްކުރުމުގައި ގާތްގަނޑަކަށް ދިހަވަރަކަށް އަހަރު ހޭދަކޮށްފައި ވެއެވެ. ކުޑައިރު ދިރިއުޅުނީ، ސަޢޫދީ ޢަރަބިއްޔާގެ އަލް މަދީނަތުލް މުނައްވަރާގައެވެ. އެއީ، އެ ދުވަސްވަރު ބައްޕަ ކިޔަވައި ވިދާޅުވާން މަދީނާގެ ޔުނިވަރސިޓީގައި ހުންނެވުމުންނެވެ. އަމަތުއްރަޙްމާން ފުރަތަމަ ޤުރްއާން ދަސްކުރަން ފެށީ، މަންމައާއެކުގައި ގޭގައެވެ. ފަހުން މަދީނާގެ ދާރުލްޙާފިޡާގައި ހިތުދަސްކުރަން ފެށީ، އުމުރުން 6 އަހަރުގައެވެ.
2019ވަނަ އަހަރު ރާއްޖެއަށް ދިރިއުޅުން ބަދަލުވެ، އަލުން ޙިފްޡުކުރަން ފެށީ، 2020ވަނަ އަހަރު، ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެގެންނެވެ. އެ ދުވަސްވަރު، މަދީނާގައި ކިޔަވައިދެއްވި އުސްތާޛާ ސަމާޙް ހަލީލް މުތީޢުލްޙަރްބީއާއެކުގައި އޮންލައިންކޮށް ކިޔެވުމުގެ ފުރުޞަތު އަމަތުއްރަޙްމާނަށް ލިބުމުން، މުޞްޙަފުގެ އެންމެ ފަހަތުން ހިތުދަސްކުރި ސޫރަތްތައް އަލުން މުރާޖަޢާކޮށް ހިތުދަސްކުރަން ފެށިއެވެ.
މިގޮތުން، މަރުކަޒުގައްޔާއި، އޮންލައިންކޮށް ކިޔައިދެމުން ގެންގޮސް، މާތްﷲގެ ރަޙްމަތްފުޅާއެކުގައި، މުޞްޙަފް އެއްކޮށް އުސްތާޛާ ސަމާޙަށް ކިޔައިދީ ނިންމީ، އުމުރުން 13 އަހަރުގައި 27 ޑިސެންބަރު 2023 ގައެވެ. އެންމެފަހު ފިލާވަޅު އުސްތާޛާއަށް ކިޔައިދިނީ އޭރު ކުރި ޢުމްރާ ދަތުރެއްގައި މަދީނާގެ މަސްޖިދުލްޤުބާގައެވެ.
ކީރިތި ޤުރްއާނާބެހޭ މަރުކަޒުގެ ޙިފްޡު ކުލާހުގައި އަމަތުއްރަޙްމާން، ކީރިތި ޤުރްއާން އެއްކޮށް ހިތުދަސްކޮށް ކިޔައިދީ ނިމުނީ، އުމުރުން 14 އަހަރުގައި 15 މޭ 2025 ގައެވެ. އެއަށްފަހު، މަރުކަޒުގެ މުރާޖަޢާ ކުލާހުގައި ދެފަހަރު މަތިން މުޞްޙަފް އެއްކޮށް މުރާޖަޢާ ކުރިއެވެ.
އަމަތުއްރަޙްމާން ބިންތި ޢަބްދުﷲ، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 25 ޖަނަވަރީ 2026 ގައެވެ.
އަމަތުއްރަޙްމާން ބިންތި ޢަބްދުﷲ، ކީރިތި ޤުރްއާން ހިތުދަސްކުރުމުގައި އެންމެ ބޮޑު އެހީތެރިކަމެއް ވެދެއްވި މައިންބަފައިންނަށާއި، އުސްތާޛާ ސަމާޙަށް ޝުކުރު އަދާކުރެއެވެ. އަދި، ޤުރްއާނާބެހޭ ޤައުމީ މަރުކަޒުގައި ކިޔަވައިދެއްވި އުސްތާޛުންނާއި، އުސްތާޛާއިންނަށާއި، ޤުރްއާން ޙިފްޡު ކުރުމުގައި އެކިގޮތްގޮތުން އެހީތެރިކަން ފޯރުކޮށްދެއްވި ޢާއިލާގެ މެންބަރުންނަށް ޝުކުރު އަދާކުރެއެވެ.