އަލްޙާފިޡް މުޙައްމަދު ޢާސިރު
މުޙައްމަދު ޢާސިރަކީ، އެންމެ ކުޑައިރުއްސުރެ ޤުރްއާން ކިޔެވުމަށް ޝައުޤުހުރި އަދި ކަނޑުހުޅުދޫ ސްކޫލުގައި ކިޔަވައިވިދާޅުވާން އުޅުއްވިއިރުވެސް ޤުރްއާން ކިޔެވުމުގައި ފާހަގަކުރެވޭ ދަރިވަރެކެވެ. ރަށު ސްކޫލު ނިންމެވުމަށްފަހު މާލެއަށް ބަދަލުވެވަޑައިގެން މަޢުހަދުއްދިރާސާތިލް އިސްލާމިއްޔާގައި ކިޔަވައި ވިދާޅުވަމުން ގެންދަވައި، 2003ވަނަ އަހަރު، މަޢުހަދުގެ އެންމެ މޮޅު ދަރިވަރުގެ ގޮތުގައި ސްކޫލް ނިންމެވިއިރު ޢާސިރުވަނީ، ޚަތިމުގެ އެންމެ ފަހު 8 ފޮތް ދަސްކުރައްވައިފައެވެ. އަދި، މަޢުހަދު ނިންމެވުމަށްފަހު، މިޞްރަށް ވަޑައިގެން އަޒްހަރު ޔުނިވަރސިޓީގައި ކިޔަވައިވިދާޅުވާން އުޅުއްވިއިރު، ޚަތިމުގެ ފުރަތަމަ 5 ފޮތް ހިތުދަސްކުރެއްވިއެވެ.
މުޙައްމަދު ޢާސިރު، މިޞްރުން ކިޔަވައިވިދާޅުވެގެން، މާލެއަށް ވަޑައިގެން ވަޒީފާ އަދާކުރައްވަން ފަށްޓަވައި، ލިބިވަޑައިގަންނަވާ ހުސްވަގުތުތަކުގައި ޤުރްއާން ކިޔަވައިވިދާޅުވަމުން ގެންދެވިއިރު، ޤުރްއާން ޙިފްޡު ކުރެއްވުމަށް ޢަޒުމް ކަނޑައެޅުއްވިއެވެ. މިގޮތުން، ކީރިތި ޤުރްއާން ޙިފްޡު ކުރައްވަން ފެށްޓެވީ، 2024ވަނަ އަހަރުގެ މޭ މަހުގެ 26ވަނަ ދުވަހުއެވެ. އެއީ، އަލްޙާފިޡް އަޙްމަދު ޒާހިރުގެ އެހީތެރިކަމާއެކުގައެވެ. ޤުރްއާނުގެ ހުރިހާ ފޮތެއް ދަސްކުރައްވައި، މުރާޖަޢާ ކުރައްވައި ނިންމެވީ، 19 މޭ 2025 ގައެވެ. ހަތަރު ފަހަރެއްގެ މަތިން މުރާޖަޢާ ކުރައްވައި ނިންމެވުމަށްފަހު، ޙާފިޡް ކަމުގެ އިމްތިޙާނުގައި ބައިވެރިވެވަޑައިގަތީ، 9 ޑިސެންބަރު 2025 ގައެވެ.
މުޙައްމަދު ޢާސިރު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 14 ޖަނަވަރީ 2026 ގައެވެ.
ކީރިތި ޤުރްއާން ހިތުދަސްކުރެއްވުމަށް، މުޙައްމަދު ޢާސިރަށް ވަރަށްގިނަ ބައެއްގެ އެހީތެރިކަން ލިބިފައިވާކަން ފާހަގަކުރައްވައެވެ. ޢާސިރުގެ ލޮބުވެތި މަންމަ އަބަދުވެސް ދެއްވާ އެއްބާރުލެއްވުމާއި، ބައްޕައާއި، ކާފައާއި، މާމަ މި ދުނިޔެ ދޫކުރައްވައިފައިވީނަމަވެސް، އެ ބޭފުޅުންގެ އަގުނުކުރެވޭފަދަ މަތިވެރި ޤުރްބާނީ ޚާއްޞަގޮތެއްގައި ފާހަގަކުރައްވައެވެ. މީގެއިތުރުން، އަލްޤާރީ ޢަލީ އިބްރާހީމާއި، އަލްޤާރީ ޢަލީ ނަޖީބާއި، އަލްޤާރީ ޙުސައިން ތައުފީޤާއި، އަލްޤާރީ އަޙްމަދު ތައުފީޤާއި، އަލްޤާރީ ޢައްބާސް ނަޝީދާއި، އަލްޤާރީ އަޙްމަދު ސިނާން މުނީރުގެ ނަން ފާހަގަކުރައްވައި، އެ ބޭފުޅުންނަށް ޝުކުރު އަދާކުރައްވައެވެ. ވަކިން ޚާއްޞަކޮށް، އަލްޙާފިޡް އަޙްމަދު ޒާހިރު ވެދެއްވި އެހީތެރިކަމަށްޓަކައި އިޚުލާޞްތެރިކަމާއެކުގައި އުސްތާޛަށް ޝުކުރު އަދާކުރައްވައެވެ.