އަލްޙާފިޡް ޢައްބާދު ބިން އަފްޟަލް
ޢައްބާދު ބިން އަފްޟަލް، ކީރިތި ޤުރްއާން ހިތުދަސްކުރަން ޝައުޤުވެރިވީ، ޙާފިޡަކަށް ވުމަށް އެދޭތީއާއި، އެ ކަމަކީ ސުވަރުގޭގެ މަތިވެރި ދަރަޖަ ލިބުމަށް މަގުފަހިވާ ކަމަކަށް ވާތީއެވެ. ޢައްބާދު ފުރަތަމަ ފެށީ 30ވަނަ ފޮތުން ފެށިގެން 27ވަނަ ފޮތާ ހަމައަށް ހިތުދަސްކުރުމަށެވެ. އެ 4 ފޮތް ހިތުދަސްކޮށް ކިޔައިދީފައިވަނީ، ޢައްބާދުގެ އުމުރުން 7 އަހަރުގައި މަންމައަށެވެ. އެއަށްފަހު 2020ވަނަ އަހަރު، ގެޔާ ކައިރި މިސްކިތަކަށް ގޮސް، މިސްކިތުގައި ކިޔަވައިދެއްވާ ޤާރީއަކަށް، ކީރިތި ޤުރްއާނުގެ 18ވަނަ ފޮތުން ފެށިގެން 26ވަނަ ފޮތާ ހަމައަށް ހިތުން ކިޔައިދިނެވެ.
2022ވަނަ އަހަރު، ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެ، ބަޤަރާ ސޫރަތާއި، އާލް ޢިމްރާން ސޫރަތް ދަސްކޮށް ކިޔައިދީފައި ވެއެވެ. ނަމަވެސް، ޖެހިގެން އައި އަހަރު މަރުކަޒުން ވަކިވެ، ޙިފްޡު ކުރުން ކުރިއަށް ގެންދިޔައީ، ގޭގައެވެ. ގޭގައި 4ވަނަ ފޮތާއި، 12ވަނަ ފޮތާއި، 13ވަނަ ފޮތާއި، 14ވަނަ ފޮތާއި، 15ވަނަ ފޮތާއި، 16ވަނަ ފޮތާއި، 17ވަނަ ފޮތް ދަސްކޮށްފައި މަންމައަށް ކިޔައިދިނެވެ. އެއީ، ދުވާލަކު ދެ ސަފުހާ ދަސްކޮށްގެންނެވެ. އަދި އޭގެފަހުން، 2025ވަނަ އަހަރު، 5ވަނަ ފޮތުން ފެށިގެން 11ވަނަ ފޮތާ ހަމައަށް ދުވާލަކު 5 ސަފުހާ ގޭގައި ދަސްކޮށް، ޢައްބާދުގެ މަންމައަށް ކިޔައިދިނެވެ. މިގޮތުގެ މަތީން، ޢައްބާދު މުޅި ޤުރްއާން އެއްކޮށް ހިތުދަސްކޮށް ނިމުނީ، 12 ސެޕްޓެންބަރު 2025 ވީ ހުކުރު ދުވަހުއެވެ.
އެއަށްފަހު، މުރާޖަޢާ ކުރުން އެންމެ ފުރަތަމަ ކުރިއަށް ގެންގޮސްފައިވަނީ، މަންމައަށާއި މުދައްރިސް ޙާމިދަށް ކިޔައިދީގެންނެވެ. ޚަތިމުގެ 16ވަނަ ފޮތާ ހަމައަށް ކިޔައިދީ ނިމިފައިވަނިކޮށް، ކީރިތި ޤުރްއާނާބެހޭ ޤައުމީ މަރުކަޒުގެ މުރާޖަޢާ ކުލާހުން ފުރުޞަތު ލިބުމާ ގުޅިގެން، ދުވާލަކު 2 ފޮތް ކިޔައިދޭން ފެށިއެވެ. އެގޮތުގެ މަތީން، މުރާޖަޢާ ކުރުން ކުރިއަށް ގެންގޮސް ނިންމުމަށްފަހު، އިމްތިޙާން ކޮމިޓީއަށް ކިޔައިދިނެވެ.
ޢައްބާދު ބިން އަފްޟަލް، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 13 ޖަނަވަރީ 2026 ގައެވެ.
ކީރިތި ޤުރްއާން ހިތުދަސްކުރުމުގައި ޢައްބާދަށް އެންމެ ބޮޑު އެހީތެރިކަމެއް ވެދެއްވި މައިންބަފައިންނަށާއި، ޢާއިލާއަށާއި، ކިޔަވައިދެއްވި ހުރިހާ މުދައްރިސުންނަށް ފަށްފަށުން ޝުކުރު އަދާކުރެއެވެ.