އަލްޙާފިޡް ޙުސައިން ޝިފާން
ޙުސައިން ޝިފާން، ކީރިތި ޤުރްއާން ހިތުދަސްކުރެއްވުމަށް ފުރަތަމަ ޝައުޤުވެރިވެވަޑައިގަތީ، މަދްރަސީ ދައުރުގައި ބޭއްވުނު ޤުރްއާން މުބާރާތްތަކުގައި ބައިވެރިވެވަޑައިގަންނަވަން ފެށްޓެވުމުންނެވެ. އެގޮތުން، އެންމެ ފުރަތަމަ ހިތުދަސްކުރައްވައިފައި ވަނީ 5 ފޮތެވެ. އެއީ، ޝިފާންގެ މަދްރަސީ ދައުރު ނިންމެވުމުގެ ކުރިންނެވެ. އޭގެފަހުން، މަދީނާގައި ތަޢުލީމު ހާސިލުކުރެއްވި ދުވަސްވަރު، ކޮންމެ ދުވަހަކުވެސް ފަތިސްނަމާދަށްފަހު، ދެ ސަފުހާއިން ދަސްކުރައްވަމުން ގެންދަވައި، އަމިއްލަ މަސައްކަތުން މުޅި ޤުރްއާން އެއްކޮށް ހިތުދަސްކުރައްވައި ނިންމަވައިފައި ވަނީ، ޝިފާންގެ އުމުރުން 21 އަހަރުގައި 2011ވަނަ އަހަރުއެވެ.
ޙުސައިން ޝިފާން، މަދީނާގައި ތަޢުލީމު ހާސިލުކުރެއްވި 7 އަހަރު ދުވަހުގެ ތެރޭގައި، ހުކުރުދުވަސް ފިޔަވައި، ހަފުތާގެ ކޮންމެ ދުވަހަކު 5 ފޮތް މުރާޖަޢާ ކުރައްވައިފައި ވެއެވެ. މަދީނާއިން އެނބުރި މާލެ ވަޑައިގެންނެވިފަހުން މެދުކެނޑުމެއް އައިނަމަވެސް، ދިވެހިރާއްޖޭގެ އިސްލާމީ ޔުނިވަރސިޓީން ހިންގި މުރާޖަޢާ ކުލާހެއްގައި 2025ވަނަ އަހަރު ބައިވެރިވެވަޑައިގެން، ތިންމަސް ދުވަހުގެ ތެރޭގައި، މުޅި ޤުރްއާން މުރާޖަޢާ ކުރައްވައި ނިންމެވިއެވެ.
ޙުސައިން ޝިފާން، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލު ކުރެއްވީ، 3 ޑިސެންބަރު 2025 ގައެވެ.
މި ފަޚުރުވެރި ކާމިޔާބީ ހާސިލުވުމުގެ އެންމެބޮޑު ޙިއްޞާދާރުން ކަމަށްވާ ޝިފާންގެ މައިންބަފައިންނަށް ޚާއްޞަ ޝުކުރެއް އަދާކުރައްވައެވެ. މީގެއިތުރުން، ކިޔަވައިދެއްވި މުދައްރިސުންނަށާއި، މުރާޖަޢާ ކުރެއްވުމުގައި އެހީތެރިވެދެއްވި އެއްބަނޑު އެއްބަފާ ބޭބެއަށާއި، ޤުރްއާން ހިތުދަސް ކުރެއްވުމުގައި އެންމެބޮޑު އެހީތެރިކަމެއް ވެދެއްވި އަނބިކަނބަލުންނަށްވެސް ވަރަށް އިޚުލާޞްތެރިކަމާއެކުގައި ޝުކުރު އަދާކުރައްވައެވެ.