އަލްޙާފިޡް ޙަސަން ސިނާން
ޙަސަން ސިނާން، ކީރިތި ޤުރްއާން ހިތުދަސްކުރެއްވުމަށް ފުރަތަމަ ޝައުޤުވެރިވެވަޑައިގަތީ، މަތީ ސާނަވީ ނިންމެވުމަށްފަހު، މަދީނާގެ އިސްލާމިކް ޔުނިވަރސިޓީގައި ތަޢުލީމު ހާސިލުކުރެއްވުމުގެ ފުރުޞަތު ލިބިވަޑައިގަތުމާ ގުޅިގެންނެވެ. މަދްރަސީ ދައުރުގައި ޤުރްއާން މުބާރާތްތަކަށް ތައްޔާރުވުމުގެ ތެރޭގައި، 5 ފޮތް ހިތުދަސްކުރައްވައިފައި ވެއެވެ. އޭގެފަހުން، މަދީނާގެ އިސްލާމިކް ޔުނިވަރސިޓީގައި ފުރަތަމަ އެއްއަހަރުދުވަސް ހޭދަކުރައްވައިފައި ވަނީ، ޢަރަބި ބަސް ދަސްކުރެއްވުމާއި، ޤުރްއާން ހިތުދަސްކުރެއްވުމުގައެވެ. ކޮންމެ ދުވަހަކުވެސް ދެ ސަފުހާއިން ދަސްކުރައްވަމުން ގެންދަވައި، އަހަރެއްހައި ދުވަހުގެ ތެރޭގައި، މުޅި ޤުރްއާން އެއްކޮށް ހިތުދަސްކޮށް ނިންމަވައިފައިވަނީ، ސިނާންގެ އުމުރުން 21 އަހަރުގައި، 2011ވަނަ އަހަރުއެވެ.
މަދީނާގައި ހޭދަކުރެއްވި 6 އަހަރު ދުވަހުގެ ތެރޭގައި، ހުކުރުދުވަސް ފިޔަވައި، ހަފުތާއަކު ކޮންމެ ދުވަހަކުވެސް މުރާޖަޢާ ކުރައްވަމުން ގެންދަވައިފައި ވެއެވެ. މަދީނާއިން އެނބުރި ރާއްޖެ ވަޑައިގެންނެވި ފަހުން މެދުކެނޑުމެއް އައިނަމަވެސް، 2025ވަނަ އަހަރު، ދިވެހިރާއްޖޭގެ އިސްލާމީ ޔުނިވަރސިޓީން ހިންގި މުރާޖަޢާ ކުލާހެއްގައި ބައިވެރިވެވަޑައިގެން، ތިންމަސް ދުވަހުގެ ތެރޭގައި މުޅި ޤުރްއާން މުރާޖަޢާ ކުރައްވައި ނިންމެވިއެވެ.
މި ބުރަ މަސައްކަތް ކާމިޔާބުކަމާއެކު ނިންމަވައިލެއްވުމުގައި އެންމެބޮޑު އެއްބާރުލެއްވުމެއް ދެއްވި މައިންބަފައިންނަށާއި، ޢާއިލާގެ މެންބަރުންނަށް ސިނާން ވަރަށް އިޚުލާޞްތެރިކަމާއެކުގައި ޝުކުރު އަދާކުރައްވައެވެ. ހަމައެއާއެކު، ކިޔަވައިދެއްވި އެންމެހައި މުދައްރިސުންނަށާއި، މުރާޖަޢާ ކުރެއްވުމުގައި އެހީތެރިވެދެއްވި، ޙަސަން ސިނާންގެ ކޮއްކޮއަށާއި، އަނބިކަނބަލުންނަށާއި، ޢާއިލާއަށް ނުހަނު ލޯތްބާއެކުގައި ޝުކުރު އަދާކުރައްވައެވެ.
ޙަސަން ސިނާން، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 3 ޑިސެންބަރު 2025 ގައެވެ.