އަލްޙާފިޡާ މަރްޔަމް ރައްޔާ އަޙްމަދު
މަރްޔަމް ރައްޔާ އަޙްމަދު، ތުއްތުއިރުއްސުރެ ފެށިގެން ކީރިތި ޤުރްއާން ކިޔަވައި ވިދާޅުވުމަށް ޝައުޤުވެރިކަން ބަހައްޓަވައެވެ. އުމުރުން އެންމެ ފަސް އަހަރުގައި ކީރިތި ޤުރްއާން ބަލައިގެން ކިޔަވަން ދަސްވުމާއެކު، ހއ. އިހަވަންދޫގައި އޭރު ކުރިއަށް ގެންދިޔަ ވަފާ ޤުރްއާން ކުލާހުން ޤުރްއާން ހިތުދަސްކުރައްވަން ފެށްޓެވިއެވެ. އޭރު ރައްޔާ ސަމާލުކަން ދެއްވީ، ޤުރްއާން ހިތުދަސްކުރެއްވުމަށްވުރެ ބޮޑަށް އުމުރުފުރައަށް ކަނޑައެޅިފައި އޮންނަ ޤުރްއާން މުޤައްރަރު ފަރިތަކުރެއްވުމަށެވެ. ވަފާ ޤުރްއާން ކުލާސް މެދުކަނޑާލުމުން، ޤުރްއާން ހިތުދަސްކުރެއްވުމަށް މެދުކެނޑުމެއް އައިނަމަވެސް، ގްރޭޑް 8 ނިންމެވިއިރު، 17 ފޮތް ހިތުދަސްކުރައްވައިފައި ވެއެވެ.
މަރްޔަމް ރައްޔާ އަޙްމަދު، ގްރޭޑް 9 ނިންމެވުމަށްފަހު، ހިތުދަސްކުރުމަށް މެދުކެނޑުމެއް އައިނަމަވެސް، ގްރޭޑް 12 ނިންމެވުމަށްފަހު، އަނެއްކާވެސް އާ ޢަޒުމަކާއެކުގައި، ޤުރްއާން ހިތުދަސްކުރައްވަން ފެށްޓެވިއެވެ. ނޫރުލްޤުރްއާން ކުލާހުން ތިންމަސް ދުވަހުގެ ތެރޭގައި، މުޅި ޤުރްއާން އެއްކޮށް ހިތުދަސްކުރައްވައި، ދެ އަހަރު ދުވަހުގެ ތެރޭގައި މުރާޖަޢާ ކުރައްވައި ނިންމެވިއެވެ.
މަރްޔަމް ރައްޔާ އަޙްމަދު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 29 އޮކްޓޫބަރު 2025 ގައެވެ.
ކީރިތި ޤުރްއާން ހިތުދަސްކުރެއްވުމުގައި އެހީތެރިވެދެއްވި، ލޮބުވެތި މައިންބަފައިންނަށާއި، ޢާއިލާގެ އެންމެހައި މެންބަރުންނަށާއި، މުދައްރިސުންނަށް ރައްޔާ ވަރަށް ޚާއްޞަ ޝުކުރެއް އަދާކުރައްވައެވެ.