އަލްޙާފިޡާ އާލާ އިބްރާހީމް ޒިޔާދު ޒަކަރިއްޔާ
އާލާ އިބްރާހީމް ޒިޔާދު ޒަކަރިއްޔާ، ކީރިތި ޤުރްއާން އުނގެނުމަށާއި، ހިތުދަސްކުރުމަށް ޝައުޤުވެރިކަން އުފެދުނީ، ދޮންދޫނި ލިޓްލް ލަރނަރސް ޕްރީސްކޫލްގައި ކިޔެވި ދުވަސްވަރުއެވެ. އެ މަރުޙަލާގައި 2 ފޮތް ހިތުދަސްކުރިއެވެ. އެއަށްފަހު، ކޮންމެ އަހަރަކު ހިތުދަސްކުރަންޖެހޭ މުޤައްރަރު ހިތުދަސްކުރަމުން ގެންދިޔައީ، ޢަރަބިއްޔާ ސްކޫލްގައެވެ. އަދި، އިތުރު ބައިތައް ގޭގައިވެސް ދަސްކުރަމުން ގެންދިޔައެވެ.
ގޭގައި ކީރީތި ޤުރްއާނުގެ ބޮޑުބައި ހިތުދަސްކުރުމަށްފަހު، އިތުރު އެހީތެރިކަމެއް ހޯދައިފައިވަނީ، އަޒްހީލް އުސްތާޛުގެ ޙިފްޡު ކުލާހުގައި ބައިވެރިވެގެންނެވެ. ނަތީޖާއެއްގެ ގޮތުން، އަމިއްލައަށް ތާވަލެއް ހަދައިގެން ގޭގައި މަންމަޔާ އެކީގައި ވަކި ގަޑިތަކެއްގައި ދަސްކުރަމުން ގެންގޮސް، އުމުރުން އެންމެ 12 އަހަރުގައި މުޅި ޤުރްއާން އެއްކޮށް ހިތުދަސްކޮށް ނިންމިއެވެ. އެއަށްފަހު، 17 ނޮވެންބަރު 2024 ގައި ކީރިތި ޤުރްއާނާބެހޭ ޤައުމީ މަރުކަޒުގައި މުރާޖަޢާކުރަން ފަށައި، މުރާޖަޢާކޮށް ނިންމައިފައިވަނީ 2025ވަނަ އަހަރުގެ ޖުލައި މަހުގެ 15ވަނަ ދުވަހުއެވެ.
އާލާ އިބްރާހީމް ޒިޔާދު ޒަކަރިއްޔާ، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 28 އޮގަސްޓު 2025 ގައެވެ.
ކީރިތި ޤުރްއާން ހިތުދަސްކުރުމުގައި އާލާއަށް އެންމެބޮޑު އެހީތެރިކަމެއް ވެދެއްވީ، އާލާގެ ލޮބުވެތި މައިންބަފައިންނެވެ. މީގެއިތުރަށް، ދޮންދޫނި ލިޓްލް ލަރނަރސް ޕްރީސްކޫލާއި، ޢަރަބިއްޔާ ސްކޫލުގައި ކިޔަވައިދެއްވި މުދައްރިސުންގެ އިތުރުން، އެހީތެރިވެދެއްވި ހުރިހާ ފަރާތްތަކަށް އާލާ ފަށްފަށުން ޝުކުރު އަދާކުރެއެވެ.