އަލްޙާފިޡާ ނަވާރު ބިންތި އަޙްމަދު
ނަވާރު ބިންތި އަޙްމަދު، ކީރިތި ޤުރްއާން ކިޔެވުމަށް ޝައުޤުވެރިވީ، އުމުރުން 7 އަހަރުގައި، ތަދްރީސުލް ޤުރްއާން ކުލާހުގައި، ކިޔެވި ދުވަސްވަރު، ޤުރްއާން މުބާރާތްތަކުގައި ބައިވެރިވާން ފެށުމުންނެވެ. މުބާރާތްތަކުގައި ނުބަލައި ކިޔަވާ ބައިގައި ބައިވެރިވާން ފެށުމުން، ހިތުދަސްކުރުމަށް ބޮޑަށް ޝައުޤުވެރިކަން އުފެދުނެވެ. ކޯވިޑުގެ ބަލިމަޑުކަމުގެ ސަބަބުން ކުލާސްތަކުގެ ކިޔެވުން ހުއްޓާލި ނަމަވެސް، 2021ވަނަ އަހަރު، ޝައިޚް ޝަމްޢޫނުގެ ތަޙްފީޡު ޤުރްއާން ސެންޓަރު ހުޅުވުމާއެކު، އެ ސެންޓަރުގައި ޤުރްއާން ހިތުދަސްކުރަން ފެށިއެވެ. ހިތުދަސްކުރުމުގައި ދުވާލަކު ހަތަރު ގަޑިއިރެއްހާއިރު ކުލާހުގައި ހޭދަކުރެއެވެ. މުރާޖަޢާ ކުރުމުގެ ބޮޑުބައި ކުރިއަށް ގެންގޮސްފައިވަނީވެސް ކުލާހުގައެވެ. އަދި، ގޭގައިވެސް ގަޑިއެއްހާއިރު މުރާޖަޢާ ކުރެއެވެ. ދުވާލަކު ފޮތެއް ކިޔައިދެމުން ގެންގޮސް، ޚަތިމް އެއްކޮށް ތިންފަހަރު ކިޔައިދީ، އަދި ނަވާރުގެ ބައްޕައަށްވެސް މުރާޖަޢާ އެއްކޮށް ކިޔައިދީފައި ވެއެވެ.
ނަވާރު، ކީރިތި ޤުރްއާން އެއްކޮށް ހިތުދަސްކޮށް ނިންމައިފައި ވަނީ 19 ނޮވެންބަރު 2024ގައި އުމުރުން 13 އަހަރުގައެވެ. އެއަށްފަހު، އިމްތިޙާނު ކޮމިޓީއަށް ކިޔައިދޭން ފެށީ، 1 އޮކްޓޫބަރު 2025 ގައެވެ.
ނަވާރު ބިންތި އަޙްމަދު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 21 އޮކްޓޫބަރު 2025 ގައެވެ.
ނަވާރު، ޤުރްއާން ހިތުދަސްކުރުމުގައި އެހީތެރިކަން ފޯރުކޮށްދެއްވި ހުރިހާ ފަރާތްތަކަށްވެސް ވަރަށް ޚާއްޞަ ޝުކުރެއް އަދާކުރެއެވެ.