އަލްޙާފިޡާ މަލްކާ މުޙައްމަދު ޙަބީބު
މަލްކާ މުޙައްމަދު ޙަބީބު، ކީރިތި ޤުރްއާން ހިތުދަސްކުރުމަށް ޝައުޤުވެރިވީ، އެކްސެލް އިންޓަރނޭޝަނަލް ސްކޫލްގައި ކިޔެވި ދުވަސްވަރުއެވެ. އެ ސްކޫލުން ހިންގި ޤުރްއާން ހިތުދަސްކުރާ ޕުރޮގުރާމެއްގައި ބައިވެރިވެ، މަލްކާ ވަނީ އުމުރުން 6 އަހަރުގައި ކީރިތި ޤުރްއާނުން 2 ފޮތް ދަސްކޮށްފައެވެ. އޭގެފަހުން، 2020ވަނަ އަހަރު ގޭގައި އިތުރު ފޮތެއް ދަސްކުރުމަށްފަހު، ޤުރްއާން އެއްކޮށް ހިތުދަސްކުރުމުގެ ނިޔަތުގައި "ތަދްރީސުލް ޤުރްއާން"ގެ ނަމުގައި ސ. މަރަދޫގައި ހިންގާ ހިތުދަސްކުރާ ކުލާހެއްގައި ބައިވެރިވިއެވެ. މިގޮތުން، 2020ވަނަ އަހަރުގެ ސެޕްޓެންބަރު މަހުން 2022ވަނަ އަހަރުގެ ޖޫން މަހުގެ ނިޔަލަށް، މަލްކާ ވަނީ، ކީރިތި ޤުރްއާނުން އިތުރު 13 ފޮތް ހިތުދަސްކޮށް ކިޔައިދީފައެވެ. އޭގެފަހުން، 2022ވަނަ އަހަރުގެ އޮކްޓޫބަރު މަހުން ފެށިގެން 2023ވަނަ އަހަރުގެ ޖޫން މަހުގެ ނިޔަލަށް، ޖަމްޢިއްޔަތުއްތަޙްފީޠިލް ޤުރްއާނިލް ކަރީމުން، ހިލޭ ސާބަހަށް އޮންލައިންކޮށް ހިންގާ ޙިފްޡު ކުލާހުގައި، މަލްކާ ބައިވެރިވެ، އެ ކުލާހުގެ އިރުޝާދުގެ ދަށުން، ކީރިތި ޤުރްއާނުން އިތުރު 10 ފޮތް ހިތުދަސްކޮށް މަލްކާގެ މަންމައަށް ވަނީ ކިޔައިދީފައެވެ. އޭގެފަހުން، އައްޝައިޚް މުޙައްމަދު ޝަމްޢޫނުގެ މަސްއޫލުވެރިކަމުގެ ދަށުން
ސ. މަރަދޫގައި ހިންގާ ޙިފްޡު ކުލާހެއްގައި 2023ވަނަ އަހަރުގެ އޮގަސްޓު މަހުގެތެރޭގައި ބައިވެރިވެ، ކީރިތި ޤުރްއާނުގެ ބާކީހުރި ފޮތްތައް ހިތުދަސްކުރިއެވެ. މަލްކާ ވަނީ އުމުރުން 11 އަހަރުގައި ކީރިތި ޤުރްއާން އެއްކޮށް ހިތުދަސްކޮށްފައެވެ. އަދި 2023ވަނަ އަހަރުގެ އޮކްޓޫބަރު މަހުން ފެށިގެން 2024ވަނަ އަހަރުގެ އެޕްރީލު މަހާ ހަމަޔަށް، ކޮންމެ ދުވަހަކު މުރާޖަޢާގެ ގޮތުގައި 5 ސަފުހާ ކިޔައިދީ، ޚަތިމް ކުރިއެވެ.
މަލްކާ 2024ވަނަ އަހަރު މާލެއަށް ބަދަލުވުމަށްފަހު، ހަމަ އެ އަހަރު ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެ، މުރާޖަޢާ ކުރިއަށް ގެންދިޔައެވެ. މަރުކަޒުގެ ރަސްމީ މުރާޖަޢާ ކުލާހުގައި ބައިވެރިވީ، 2025ވަނަ އަހަރުގެ ފެބުރުވަރީ މަހުގެ 27ވަނަ ދުވަހުއެވެ.
މަލްކާ މުޙައްމަދު ޙަބީބު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 19 އޮގަސްޓު 2025 ގައެވެ. އޭރު މަލްކާގެ އުމުރުން 13 އަހަރެވެ.
ޤުރްއާން ހިތުދަސްކުރުމުގައި މަލްކާގެ މައިންބަފައިންނާއި، ޢާއިލާއާއި، މުދައްރިސުން ކޮށްދެއްވި މަސައްކަތް ޝުކުރުވެރިކަމާއެކުގައި ފާހަގަކުރައްވައެވެ.