އަލްޙާފިޡް ޒާން މުޙައްމަދު ޒަމީލު
ކީރިތި ޤުރްއާން ހިތުދަސްކުރެއްވުމަށް ޒާން މުޙައްމަދު ޒަމީލް ޝައުޤުވެރިވެވަޑައިގަތީ، ޙާފިޡަކަށް ވެވަޑައިގަތުމަށް ކުރެއްވުނު އުންމީދާއި، ދެކެވަޑައިގެންނެވި ހުވަފެންތަކުގެ ސަބަބުންނެވެ. ބ.އަތޮޅު ތަޢުލީމީ މަރުކަޒުގެ ގްރޭޑް 6ގެ ފުރަތަމަ ޓަރމްގައި ކިޔަވައި ވިދާޅުވުމަށްފަހު، އެ ވަގުތު ކިޔެވުން މެދުކަނޑުއްވައިލައްވައި، އިންޑިއާގެ ދާރުއްސަލާމް ޙިފްޡު ޤުރްއާން ކޮލެޖުގައި، 2017ވަނަ އަހަރުގެ ޖުލައި މަހު ޙިފްޡު ކުރައްވަން ފެށްޓެވިއެވެ. ޢާއިލާއާ ދުރުގައި އެހެން ޤައުމެއްގައި ހުންނަވަންޖެހިވަޑައިގަތުމުން އެކަނިވެރިކަން އިޙްސާސްކުރެއްވުނު ނަމަވެސް، ޤުރްއާން ހިތުދަސްކުރެއްވުމަށް ޒާން މުޙައްމަދު ޒަމީލް ގަދައަޅުއްވައި ހިތްވަރާއެކުގައި މަސައްކަތް ކުރައްވަމުން ގެންދެވިއެވެ. އެގޮތުން ހަފުތާއަކު 6 ދުވަހު ކުލާހަށް ހާޒިރުވެވަޑައިގެން، ޙިފްޡު ކުރައްވައި ނިންމަވައިލެއްވީ، 2018ވަނަ އަހަރު ނިމުނުއިރުއެވެ. މުޅި ޤުރްއާން ޙިފްޡު ކުރައްވައި ނިންމެވިއިރު، ޒާންގެ އުމުރަކީ 13 އަހަރެވެ. ދޮޅު އަހަރު ދުވަހުގެ ތެރޭގައި، ޤުރްއާން އެއްކޮށް ހިތުދަސްކުރެއްވުމަށްފަހު، 14 މަސްދުވަހުގެ ތެރޭގައި ތިންފަހަރު މުރާޖަޢާ ކުރެއްވިއެވެ. ޙިފްޡު ކުރެއްވުމާއެކު، މުރާޖަޢާކޮށް ނިންމަވައިލެއްވީ، 2020ވަނަ އަހަރުގެ ފެބުރުވަރީ މަހުއެވެ.
ނަތީޖާއެއްގެ ގޮތުން، ބ. އޭދަފުށީ މަސްޖިދުއް ސުލްޠާން މުޙައްމަދު މުޢީނުއްދީނުގައި ރަމަޟާން މަހު އިމާމުވެވަޑައިގެން ތަރާވީޙު ނަމާދު ކުރެއްވުމުގެ ފުރުޞަތު ޒާނަށް ލިބިވަޑައިގަތެވެ. މީގެއިތުރުން، އެ މިސްކިތުގައި އިމާމުވެވަޑައިގެން ދެ އަހަރު ދަމުނަމާދުވެސް ކުރައްވައިފައި ވެއެވެ.
ޒާން މުޙައްމަދު ޒަމީލު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 1 އޮކްޓޫބަރު 2025 ގައެވެ.
ކީރިތި ޤުރްއާން ހިތުދަސްކުރެއްވުމުގައި ޒާނަށް އެހީތެރިވެދެއްވި ހުރިހާ ފަރާތްތަކަށް ވަރަށް ޚާއްޞަ ޝުކުރެއް އަދާކުރައްވައެވެ.