އަލްޙާފިޡް ޚިޟްރް ބިން ޢިމާދު
ޚިޟްރު ބިން ޢިމާދު، ކީރިތި ޤުރްއާން ހިތުދަސްކުރައްވަން ފެށްޓެވީ، އުމުރުން 7 އަހަރުގައި މާތްވެގެންވާ މައްކަތުލް މުކައްރަމާގެ މަސްޖިދު ޢަބްދުﷲ އައްރާޝިދު މިސްކިތުގައެވެ. ޤުރްއާން ހިތުދަސްކުރެއްވުމަށް ޚިޟްރު ފެށްޓެވީ، 2014ވަނަ އަހަރު، ކީރިތި ޤުރްއާނުގެ ފަހު ފޮތްތަކުންނެވެ. ޙިފްޡުކޮށް ނިންމެވީ، އޭގެ 3 އަހަރު ފަހުން އުމުރުން
10 އަހަރުގައެވެ. އެއަށްފަހު، ޤުރްއާން މުރާޖަޢާ ކުރެއްވުމަށް 1 އަހަރު ހޭދަކުރެއްވިއެވެ.
ކީރިތި ޤުރްއާން ޙިފްޡު ކުރެއްވުމާއި، މުރާޖަޢާ ކުރެއްވުމުގައި ބޮޑަށް އިސްކަން ދެއްވައިފައި ވަނީ، ތަޖުވީދުގެ ހަމަތަކަށް ސަމާލުކަން ދެއްވައިގެން ދަސްކުރެއްވުމަށެވެ. 2024ވަނަ އަހަރުގެ އޮކްޓޫބަރު މަހު އެނބުރި ރާއްޖެއަށް ވަޑައިގަންނަވަންދެން ހޭދަކުރެއްވީ، ޤިރާޢަތު ދަސްކުރެއްވުމުގައްޔާއި، މުރާޖަޢާ ކުރެއްވުމުގައްޔާއި، ސަނަދުތައް ހޯއްދެވުމުގައެވެ.
ޚިޟްރް ވަނީ، ޤުރްއާން ހިތުދަސްކުރުމާބެހޭ އެންމެބޮޑު ޖަމުޢިއްޔާގެ މައްކާ ގޮފީގެ ހިތުދަސްކުރުމުގެ ޓެސްޓުގައާއި، ޤުރްއާނާއި ޤުރްއާނުގެ ޢިލްމުތަކާބެހޭ ސަޢޫދީ ޢިލްމީ ޖަމުޢިއްޔާގެ ދަށުން ހިންގާ އަލްއިޤްރާ ވަލްއިޖާޒާ ޕުރޮގުރާމުގެ ޓެސްޓުގައި ބައިވެރިވެވަޑައިގެން އެންމެމަތީ ދަރަޖައިގައި ފާސްވެފައެވެ. އަދި، ސަޢޫދީ ޢަރަބިއްޔާގެ މަޝްހޫރު ބައެއް އިމާމުންނާއި، ޕްރޮފެސަރުންނާއި، އުސްތާޛުންގެ ކިބައިން އިޖާޒާވެސް ހާސިލު ކުރައްވައިފައެވެ.
ކީރިތި ޤުރްއާން ޙިފްޡު ކުރެއްވުމާއި، މުރާޖަޢާ ކުރެއްވުމުގައި ވަރަށްގިނަ ފަރާތްތަކެއްގެ އެހީތެރިކަން ޚިޟްރަށް ލިބިވަޑައިގެންފައި ވެއެވެ. ޚާއްޞަގޮތެއްގައި، މައިންބަފައިންނާއި، އުސްތާޛު އިސްމާޢީލް އަލްޢަރޫސީގެ ނަން، ޝުކުރުވެރިކަމާއެކުގައި ފާހަގަކުރައްވައެވެ.
ޚިޟްރް ބިން ޢިމާދު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 19 އޮގަސްޓު 2025 ގައެވެ.