އަލްޙާފިޡް މުސްލިމް އަނީސް ޙުސައިން
މުސްލިމް އަނީސް ޙުސައިންގެ ޢާއިލާއަކީ، ކީރިތި ޤުރްއާނަށް ވަރަށްބޮޑު އަހަންމިއްޔަތެއްދޭ ޢާއިލާއަކަށް ވުމުން، އެންމެ ކުޑައިރުއްސުރެވެސް ޤުރްއާން ކިޔަވައި ވިދާޅުވުމަށް ޝައުޤުވެރިކަން ހުރެއެވެ. އަދި ސްކޫލްގައި އުޅުއްވިއިރު، ޤުރްއާން މުބާރާތްތަކުގައި ބައިވެރިވެވަޑައިގެންފައި ވެއެވެ.
ޏ. އަތޮޅު ތަޢުލީމީ މަރުކަޒުގެ ޕްރައިމަރީ ގްރޭޑްތަކުގައި ޢަރަބިބަސް ކިޔަވައިދެއްވުމަށް މިޞްރުގެ އުސްތާޛުން ތިއްބެވި ދުވަސްވަރު، މުޞްޙަފްގެ އެންމެފަހު ދެ ފޮތް ގަވާއިދުން ދަސްކުރައްވައި، އިމްތިޙާނު ހެދުމުގެ ސަބަބުން، އުމުރުން 10 އަހަރުގައި އެ ފޮތްތައް ރަނގަޅަށް ހިތުދަސްކުރެއްވިއެވެ. އަދި، އެކިއެކި މުބާރާތްތަކުގައި ބައިވެރިވެވަޑައިގެން، ބަލައިގެން ކިޔަވައިވިދާޅުވެ، ވަރަށް ބޮޑަށް ފަރިތަވެފައިވެއެވެ.
ސްކޫލް ނިންމެވުމަށްފަހު، ރާއްޖެއިން ބޭރުގައި ކިޔަވަން ހޭދަކުރެއްވި ދުވަސްވަރުގެތެރޭގައި، ކީރިތި ޤުރްއާން ދަސްކުރައްވަން ފަށްޓަވައި، 2010ވަނަ އަހަރާ ހަމަޔަށް 5 ފޮތް ދަސްކުރެއްވިއެވެ. އޭގެފަހުން، މާލެ ވަޑައިގެން، ކީރިތި ޤުރްއާނާބެހޭ ޤައުމީ މަރުކަޒުގައި ރަޖިސްޓަރީވެ، ޙިފްޡު ކުލާސްތަކުގައި ހަމަސްދުވަހު ކިޔަވައި ވިދާޅުވިއެވެ. އެ ދުވަސްވަރު ވަޒީފާއެއްގައި އުޅުއްވަން ޖެހިވަޑައިގަތުމުން، ކުލާހަށް ހާޒިރުވެވަޑައިގަތުމަށް ހުރަސްއެޅޭތީ، ހިތުދަސްކުރެއްވުން އަމިއްލައަށް ކުރިއަށް ގެންދެވިއެވެ. ކޯވިޑުގެ ބަލިމަޑުކަން އައިއިރު، 22 ފޮތް ދަސްކުރައްވައިފައި ވެއެވެ. އެ ދުވަސްވަރު ގޭގައި ހުންނަވަން ޖެހިވަޑައިގަތުމުގެ ސަބަބުން، ބާކީއޮތް 8 ފޮތް ދަސްކުރައްވައި، 2022ވަނަ އަހަރުގެ ތެރޭގައި ޤުރްއާން އެއްކޮށް ދަސްކުރައްވައި ނިންމެވިއެވެ. އޭގެފަހުން ގޭގައި މުރާޖަޢާ ކުރައްވައި، 2025ވަނަ އަހަރު ކީރިތި ޤުރްއާނާބެހޭ ޤައުމީ މަރުކަޒުގެ ފުވައްމުލަކު ސެންޓަރުގައި ރަޖިސްޓަރީވެ، ޙިފްޡު އިމްތިޙާނު ކޮމިޓީއަށް ކިޔުއްވައި ދެއްވިއެވެ.
މުސްލިމް އަނީސް ޙުސައިން، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 15 ސެޕްޓެންބަރު 2025 ގައެވެ.