އަލްޙާފިޡާ ޢާއިޝަތު ޝަވްނީ
ޢާއިޝަތު ޝަވްނީ، ކީރިތި ޤުރްއާނަށް ޝައުޤުވެރިކަން އުފެދުނީ، ސްކޫލްގައި އުޅުއްވި ދުވަސްވަރު، ސްކޫލްގައި ބާއްވަމުން ގެންދިޔަ ޤުރްއާން މުބާރާތްތަކުގައި، ނުބަލައި ކިޔެވުމުގެ ގޮފީގައި ބައިވެރިވެވަޑައިގަންނަވަން ފެށި ހިސާބުންނެވެ. ޙާފިޡަކަށް ވެވަޑައިގަތުމަށް އެ ހިސާބުން ޢަޒުމު ކަނޑައެޅުއްވިއެވެ. ޤުރްއާން ހިތުދަސްކުރެއްވުމުގެ ދަތުރު ފެށްޓެވީ، ށ. މިލަންދޫގައި ހުންނަ، ޢަފާފް ޤުރްއާން ކުލާހުންނެވެ. ކޮންމެ ދުވަހަކުވެސް ކުރު މުރާޖަޢާއަށް އަދި، ދިގު މުރާޖަޢާއަށް ކިޔުއްވައި ދެއްވަމުން ގެންދެވިއެވެ. އަދި ހުސްވަގުތުތަކުގައި ޤުރްއާން ދަސްކުރެއްވުމަށް ވަގުތު ހޭދަކުރެއްވިއެވެ. އެންމެ ބޮޑު ސަމާލުކަމެއް ދެއްވީ، ފަތިސް ވަގުތުގައި ޤުރްއާން ދަސްކުރެއްވުމަށެވެ.
ކީރިތި ޤުރްއާން އެއްކޮށް ހިތުދަސްކުރައްވައި ނިންމެވީ، 2023ވަނަ އަހަރުގެ ތެރޭގައި، އުމުރުން 17 އަހަރުގައެވެ. އޭގެފަހުން، 1 އަހަރާއި 5 މަސްދުވަހު ރަށުގައި ޢަފާފް ޤުރްއާން ކުލާހުގައި މުރާޖަޢާ ކުރެއްވިއެވެ. އަދި 2025ވަނަ އަހަރުގެ މޭ މަހު، ކީރިތި ޤުރްއާނާބެހޭ ޤައުމީ މަރުކަޒުން ޖާގަ ލިބިވަޑައިގަތުމާ ގުޅިގެން، އެ ކުލާހުގައި 3 މަސްދުވަސް ވަންދެން މުރާޖަޢާ ކުރެއްވުމަށްފަހު، ޙިފްޡު ކޮމިޓީއަށް ކިޔުއްވައި ދެއްވިއެވެ.
ޢާއިޝަތު ޝަވްނީ، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 22 ސެޕްޓެންބަރު 2025 ގައެވެ.
ކީރިތި ޤުރްއާން ހިތުދަސްކުރެއްވުމުގައި އެހީތެރިކަން ފޯރުވައިދެއްވި ހުރިހާ ފަރާތްތަކަށް، ޚާއްޞަކޮށް، ޝަވްނީގެ މައިންބަފައިންނާއި، ކިޔަވައިދެއްވި މުދައްރިސުން ކޮށްދެއްވި އަގުހުރި މަސައްކަތް ޝުކުރުވެރިކަމާއެކުގައި ފާހަގަކުރައްވައެވެ.