އަލްޙާފިޡް ޔޫސުފް އަޝްހަދު އަޝްރަފް
ކީރިތި ޤުރްއާން ހިތުދަސްކުރުމަށް ޔޫސުފް އަޝްހަދު އަޝްރަފްގެ ހިތުގައި އެންމެބޮޑު ޝައުޤުވެރިކަމެއް އުފެދުނީ، ޕްރީސްކޫލްގައި ކިޔެވިއިރު، ޤުރްއާން މުބާރާތްތަކުގައި، ހިތުން ކިޔެވުމުގެ ބައިގައި ބައިވެރިވެގެން ކިޔެވުމުގެ ފުރުޞަތު ލިބި، ރަނގަޅު ކާމިޔާބީތައް ލިބެން ފެށުމާ ގުޅިގެންނެވެ.
ޔޫސުފް އަޝްހަދު އަޝްރަފް، ކީރިތި ޤުރްއާން ހިތުދަސްކުރަން ފެށީ، 2017ވަނަ އަހަރު އުމުރުން އެންމެ ހަތަރު އަހަރުގައި، މައިންބަފައިންގެ އެހީތެރިކަމާ އެކުގައި ގޭގައެވެ. ފަތިސްނަމާދަށްފަހު ހިތުދަސްކޮށް، މަޣްރިބް ނަމާދަށްފަހު މުރާޖަޢާ ކުރަމުން ގެންދިޔައެވެ. އެންމެ ފުރަތަމަ ދަސްކުރަމުން ގެންދިޔައީ، ދުވާލަކު ސަފުހާއެއްގެ ތިންބައިކުޅަ އެއްބައެވެ. މިގޮތުން، ކީރިތި ޤުރްއާނުގެ އެންމެފަހު 4 ފޮތް، 2 އަހަރުގެ ތެރޭގައި ދަސްކުރިއެވެ. އޭގެފަހުން، އިތުރު 8 ފޮތް، 3 އަހަރު ތެރޭގައި ދަސްކުރިއެވެ. މި 12 ފޮތް ދަސްކުރުމަށްފަހު، ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެ، އުސްތާޛަށް ކިޔައިދެމުން، ބާކީހުރި ފޮތްތައް ދަސްކުރަން ފެށީ، 2022ވަނަ އަހަރުގެ އޮގަސްޓު މަހުގެ ތެރޭގައެވެ. ޙިފްޡު ކުލާހުގައި ހޭދަކުރި 1 އަހަރާއި 6 މަސް ދުވަހުގެ ތެރޭގައި، ބާކީއޮތް 18 ފޮތް، މާތްﷲގެ ހެޔޮ ރަޙްމަތްފުޅާއެކުގައި ދަސްކޮށް ނިންމައިލީ، ޔޫސުފް އަޝްހަދުގެ އުމުރުން 11 އަހަރުގައެވެ. އަދި، 2024ވަނަ އަހަރުގެ އޮގަސްޓު މަހުގެ ނިޔަލަށް ޙިފްޡު ކުލާހުގެ އުސްތާޛަށް ކީރިތި ޤުރްއާން އެއްކޮށް ކިޔައިދީ ނިންމައި، އެއްފަހަރު މުރާޖަޢާ ކުރިއެވެ. މުރާޖަޢާ ކުލާހުގައި 10 މަހެއްހައި ދުވަސް ހޭދަކުރިއިރު، މި މުއްދަތުގައި، 5 ފަހަރު މުރާޖަޢާކޮށް ނިންމިއެވެ.
ޔޫސުފް އަޝްހަދު އަޝްރަފް، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، އުމުރުން 12 އަހަރުގައި، 13 އޮގަސްޓު 2025 ގައެވެ.
ކީރިތި ޤުރްއާން ހިތުދަސްކުރުމުގެ މި ދިގު މަރުޙަލާގައި، ވަރަށްގިނަ ފަރާތްތަކެއްގެ އެހީތެރިކަން ޔޫސުފް އަޝްހަދަށް ލިބިފައި ވެއެވެ. އޭގެތެރޭގައި، މައިންބަފައިންނާއި، އެއްބަނޑުއެއްބަފާ ބޭބެގެ އިތުރަށް، ޤުރްއާނާބެހޭ ޤައުމީ މަރުކަޒުގެ މުދައްރިސުން ހިމެނެއެވެ. މި އެންމެހައި ފަރާތްތަކަށް ވަރަށް ޚާއްޞަ ޝުކުރެއް ޔޫސުފް އަޝްހަދު އަދާކުރެއެވެ.
ކީރިތި ޤުރްއާނުގެ ރޮނގުން ޚިދުމަތްކުރުންމަތީ ދެމިހުރުމަކީ، ޔޫސުފް އަޝްހަދު އަޝްރަފްގެ އެންމެބޮޑު އެއް އުންމީދެވެ.