އަލްޙާފިޡާ ފާޠިމަތު ޙުސައިންދީދީ
ފާޠިމަތު ޙުސައިންދީދީގެ ކޮއްކޮ އަލްމަރްޙޫމް ޢަލީ ޝަފީޤަކީ ޙާފިޡަކަށްވުމުން، ޤުރްއާން ހިތުދަސްކުރެއްވުމުގެ ޢަޒުމް އަބަދުވެސް ފާޠިމަތު ޙުސައިންދީދީގެ ހިތްޕުޅުގައި އޮވެއެވެ. ކީރިތި ޤުރްއާން ހިތުދަސްކުރެއްވުމުގެ މަސައްކަތް ފާޠިމަތު ޙުސައިންދީދީ ފެށްޓެވީ، މީގެ ދިހަވަރަކަށް އަހަރު ކުރިން، ކުރެއްވި އޮޕަރޭޝަނަކާ ގުޅިގެން ގިނަ ދުވަސްތަކަކަށް އެޑްމިޓްވެފައި އޮންނަވަން ޖެހިވަޑައިގަތުމުންނެވެ. އެގޮތުން، ކީރިތި ޤުރްއާނާބެހޭ ޤައުމީ މަރުކަޒުގެ ފުވައްމުލަކު ގޮފީގެ ޙިފްޡު ކުލާހާ ގުޅިވަޑައިގެން، ހިތުދަސްކުރެއްވުމުގެ މަސައްކަތް ފެށްޓެވިއެވެ.
ފުވައްމުލަކު ޙިފްޡު ކުލާހުގައި ކިޔެވުން ކުރިއަށް ގެންދަވަނިކޮށް، އެކިފަހަރު މަތިން ރާއްޖެއިން ބޭރުގައި ގިނަ ދުވަސްތަކެއް ހޭދަކުރައްވަން ޖެހުމުން، ކޮންމެވެސްވަރެއްގެ މެދުކެނޑުމެއް އައި ކަމުގައިވިޔަސް، ހިތުދަސްކުރެއްވުމާއި، ދަސްކުރައްވާ ބައި މުރާޖަޢާ ކުރެއްވުން މެދުކަނޑުއްވައި ނުލައްވައި ކުރިއަށް ގެންދެވިއެވެ. ވަކިން ޚާއްޞަކޮށް، އޮންލައިންކޮށް ކިޔަވަން ޖެހުނު ދުވަސްތަކުގައި، މުދައްރިސް މުފީދުގެ ފަރާތްޕުޅުން ލިބުނު އެހީތެރިކަން ފާޠިމަތު ޙުސައިންދީދީ ވަރަށް ބޮޑަށް ފާހަގަކުރައްވައެވެ.
ކީރިތި ޤުރްއާން ހިތުދަސްކުރުމަކީ ވަރަށްބުރަ މަސައްކަތެއް ނަމަވެސް، ވަރުގަދަ ޢަޒުމާއި ހިތްވަރާއެކުގައި މަސައްކަތް ކޮށްފިނަމަ، ކާމިޔާބުވާނެކަން ފާޠިމަތު ޙުސައިންދީދީއަށް ތަޖުރިބާ ކުރެއްވުނެވެ. އެންމެބޮޑު ހިތްވަރެއް ލިބިވަޑައިގަތީ، ފާޠިމަތު ޙުސައިންދީދީގެ މަންމައާއި ބައްޕައާއި، ފިރިކަލުންނާއި، ދަރިންނާއި، ބޭބެއާއި ކޮއްކޮމެންގެ ފަރާތުންނެވެ.
ފާޠިމަތު ޙުސައިންދީދީ، 3ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 15 ޖުލައި 2025 ގައެވެ.