އަލްޙާފިޡާ ޙައްވާ ޒާހިރާ
ކީރިތި ޤުރްއާން ހިތުދަސްކުރެއްވުމަށް ޙައްވާ ޒާހިރާގެ ހިތްޕުޅުގައި ޝައުޤުވެރިކަން އުފެދުނީ، ޒިކުރާ ފައުންޑޭޝަނުން އިސްނަގައިގެން، ޝައިޚް އަލްމަރްޙޫމް މުޙައްމަދު ޒިކުރާ ޙުސްނީ، ޒިކުރާ މިސްކިތުގައި ހިންގި ކުލާހަކަށް، ބެލެނިވެރިއެއްގެ ހައިސިއްޔަތުން ވަޑައިގަތުމަށް ލިބުނު ދަޢުވަތުގެ ސަބަބުންނެވެ.
ޙައްވާ ޒާހިރާ ޤުރްއާން ހިތުދަސްކުރައްވަން ފެށްޓެވީ، 2013ވަނަ އަހަރުގެ ކުރީކޮޅު، ޒިކުރާ ފައުންޑޭޝަނުން، މަސްޖިދުއްޒިކުރާގައި ހިންގި ޤުރްއާން ހިތުދަސްކުރާ ކުލާހުގައި ބައިވެރިވެވަޑައިގަންނަވައިގެންނެވެ. ޤުރްއާން ހިތުދަސްކުރައްވައި ނިންމެވީ، 19 ސެޕްޓެންބަރު 2017 ގައެވެ. މެދުކެނޑުމަކަށްފަހު، ހިތުދަސްކުރުމުގެ މަރުޙަލާ ފަހުން ކުރިއަށް ގެންދެވީ، ވަކިން ޙާފިޡަކަށް ކިޔުއްވައި ދެއްވައިގެންނެވެ. އޭގެފަހުން، އައި.އާރު. ޤުރްއާން ކުލާހުގައި 2023ވަނަ އަހަރުގެ މޭ މަހު ބައިވެރިވެވަޑައިގެން، ދެވަނަފަހަރަށް ޤުރްއާން ހިތުދަސްކުރައްވަން ފަށްޓަވައިގެން، އެއްކޮށް ހިތުދަސްކުރައްވައި ނިންމަވައިލެއްވީ، 2024ވަނަ އަހަރުގެ ނޮވެންބަރު މަހުގެ 4ވަނަ ދުވަހުއެވެ. މުރާޖަޢާ ކިޔުއްވައިދެއްވަން ފެށްޓެވީ، 2024ވަނަ އަހަރުގެ ޑިސެންބަރު މަހުގެ 1ވަނަ ދުވަހު އަލްޙާފިޡް އިބްރާހީމް ޝިހާބަށެވެ. މުރާޖަޢާ އެއްކޮށް ނިންމެވީ، 2025ވަނަ އަހަރުގެ މޭ މަހުގެ ފަހުކޮޅުއެވެ.
ޙައްވާ ޒާހިރާ، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 7 ޖުލައި 2025 ގައެވެ.
ޙައްވާ ޒާހިރާއަށް ކީރިތި ޤުރްއާން ހިތުދަސްކުރެއްވުމަށް އެކިގޮތްގޮތުން އެހީތެރިވެދެއްވި އެންމެހައި ޙާފިޡުންނަށާއި، ޝައިޚުންނަށާއި، މުދައްރިސުންނަށް ވަރަށް ޚާއްޞަ ޝުކުރެއް އަދާކުރައްވައެވެ. މީގެއިތުރުން، ޙައްވާ ޒާހިރާގެ މަންމައާއި ބައްޕަ އަދި ފިރިކަލުންގެ އިތުރުން، ދަރިންނާއި، ޢާއިލާގެ އެހެން މެންބަރުން ދެއްވި ހިތްވަރާއި ވެދެއްވި އެހީތެރިކަން އަދި ޤުރްބާނީ، ފާހަގަކުރައްވައި، އެފަރާތްތަކަށްވެސް ޝުކުރު އަދާކުރައްވައެވެ.