އަލްޙާފިޡް މުޙައްމަދު ނައިސަމް ނަސީމް
މުޙައްމަދު ނައިސަމް ނަސީމް، އެންމެ ކުޑައިރުއްސުރެވެސް ކީރިތި ޤުރްއާނަށް ވަރަށްބޮޑު ޝައުޤުވެރިކަމެއް ދެއްވިއެވެ. ޤުރްއާން ހިތުދަސްކުރެއްވުމަށް ނައިސަމްގެ އެދުރަކަށްވީ، ޓީ.ވީ. އެވެ. ޓީ.ވީ. މޯލްޑިވްސްއިން ކޮންމެ ނަމާދު ވަގުތަކު ގެނެސްދޭ ޤުރްއާން، އަޑުދަށުން އެންމެ ކުޑައިރުއްސުރެ ފެށިގެން ކިޔަވަމުން ގެންދެވުމަކީ، އާދަޔަކަށް ހެއްދެވިއެވެ. ނައިސަމް، ޤުރްއާން ދަސްކުރެއްވުމަށް އެއްވެސް އެދުރެއްގެ ގާތަށް އަދި އެއްވެސް ކުލާހަކަށް ވަޑައިގެންފައި ނުވާކަން ފާހަގަކޮށްލަން ޖެހެއެވެ. ނައިސަމްގެ އުމުރުން ތިން އަހަރާއި ހަތަރު އަހަރާ ދެމެދު ޢައްމާ ފޮތް ހިތުދަސްކުރެއްވިއެވެ.
ކީރިތި ޤުރްއާން ހިތުދަސްކުރުމަކީ، الله سُبْحَانَهُ وَتَعَالَى ދެއްވައިފައިވާ ޚާއްޞަ ނިޢުމަތެއް ކަމުގައިވާތީ، ޤުރްއާން ހިތުދަސްކުރެއްވުމަކީ ނައިސަމްއަށް މާ އުނދަގޫ ކަމަކަށްނުވިއެވެ. ކީރިތި ޤުރްއާނުގެ ރޮނގުން އިތުރަށް ކުރިއަށް ވަޑައިގަތުމަށްޓަކައި، ކީރިތި ޤުރްއާނާބެހޭ ޤައުމީ މަރުކަޒުގެ މުރާޖަޢާ ކުލާސްތަކުގައި ބައިވެރިވެވަޑައިގެން، މުރާޖަޢާ ކުރައްވަން ފެށްޓެވީ، 15 ޑިސެންބަރު 2024 ގައެވެ. އެއަށްފަހު، ޙިފްޡު ކޮމިޓީއަށް ކިޔުއްވައި ދެއްވަން ފެށްޓެވީ، 20 މޭ 2025 ގައެވެ.
މުޙައްމަދު ނައިސަމް ނަސީމް، 2ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 6 ޖުލައި 2025 ގައެވެ.
ނައިސަމްއަކީ، ޤުރްއާން ހިތުދަސް ކުއްޖަކަށްވުމުގެ އިތުރުން، މުޞްޙަފުގެ ކޮންމެ އާޔަތަކުން ސުވާލެއް ކުރިކަމުގައިވިޔަސް ޖަވާބުދެއްވޭ ވަރަށް ހިތުދަސްވެފައިވާ ކުއްޖެއްކަން ފާހަގަކޮށްލަން ޖެހެއެވެ. އަދި މިހާރުވެސް ނައިސަމް، ކީރިތި ޤުރްއާނާބެހޭ ޤައުމީ މަރުކަޒުން ޤިރާޢަތު ލެވެލް 1 ފުރިހަމަކުރައްވަމުން ގެންދަވާކަންވެސް ފާހަގަކޮށްލަންޖެހެއެވެ.
ކީރިތި ޤުރްއާން އެއްކޮށް ހިތުދަސްކުރައްވައި ނިންމަވައިލެއްވުމުގައި، ކީރިތި ޤުރްއާނާބެހޭ ޤައުމީ މަރުކަޒުގެ މުދައްރިސުން ދެއްވި ފުރިހަމަ އެއްބާރުލެއްވުން، ނައިސަމް ފާހަގަކުރައްވައެވެ.