އަލްޙާފިޡް ޢާކިފު ޢަބްދުއްސައްތާރު
ޢާކިފު ޢަބްދުއްސައްތާރު، ކީރިތި ޤުރްއާން ހިތުދަސްކުރެއްވުމަށް ޝައުޤުވެރިވީ، ކުޑައިރުއްސުރެ ޤުރްއާން ކިޔެވުމަށް ޢާއިލާއިން ބާރުއެޅުމާއެކު، ޢާއިލާގައިވެސް ޤުރްއާން ހިތުދަސްކުރުމާއި، ޤުރްއާން ކިޔެވުމަށް ލޯބިކުރާ މާޙައުލެއް އޮތުމުންނެވެ. ޤުރްއާން ހިތުދަސްކުރުން ބޮޑަށް ކުރިއަށް ގެންދިޔައީ، މައިންބަފައިންގެ އެހީގައެވެ. ޢާކިފު ކޮންމެ ދުވަހަކުވެސް ފަތިސްނަމާދާއި، ޢަޞްރު ނަމާދަށްފަހު މުރާޖަޢާކޮށް، އަދި މަޣްރިބް ނަމާދަށްފަހު، ހިތުދަސްކޮށް، އެ ފިލާވަޅު ކިޔައިދީ، ކޮންމެ ދުވަހަކުވެސް ސަފުހާއެއް ދަސްކުރަމުން ގެންދިޔައެވެ.
އެގޮތުން، ދެ އަހަރު ދުވަހު ގޭގައި މުރާޖަޢާ ކުރުމަށް ހޭދަކޮށްފައިވާއިރު، ކީރިތި ޤުރްއާނާބެހޭ ޤައުމީ މަރުކަޒުގައި މުރާޖަޢާ ކުރުމަށް ދޮޅު އަހަރެއްހައި ދުވަސް ހޭދަކޮށްފައި ވެއެވެ. ޤުރްއާނާބެހޭ މަރުކަޒުގައި މުރާޖަޢާ ކުރިއިރު، ކޮންމެ ދުވަހަކު ކިޔައިދޭންޖެހޭ ބައި ގަވާއިދުން ކިޔައިދީފައި ވެއެވެ. ޢާކިފު، މުރާޖަޢާ ކުރުމަށް ތިން އަހަރު ހޭދަކޮށްފައި ވެއެވެ. ޢާކިފު، ޤުރްއާން ހިތުދަސްކޮށް ނިންމައިފައި ވަނީ، އުމުރުން 12 އަހަރުގައި 6 އަހަރު ދުވަހުގެ މުއްދަތުގެ ތެރޭގައެވެ.
ޤުރްއާން ހިތުދަސްކުރުމުގެ މި ދަތުރުގައި، ޢާކިފަށް އެންމެބޮޑު އެއްބާރުލުމެއް ލިބުނީ، މައިންބަފައިންނާއި، ކިޔަވައިދެއްވި މުދައްރިސުންގެ އިތުރަށް، ޢާއިލާގެ އެކި މެންބަރުންގެ ފަރާތުންނެވެ. އަދި އެ ހުރިހާ ފަރާތްތަކުން ކޮށްދެއްވި މަސައްކަތްތަކާއި، ޚާއްޞަކޮށް މައިންބަފައިންނާއި ޢާއިލާގެ މެންބަރުން ކޮށްދެއްވި އަގުހުރި މަސައްކަތްތައް ޢާކިފު ފާހަގަކޮށް ޝުކުރު އަދާކުރެއެވެ.
ޢާކިފު ޢަބްދުއްސައްތާރު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 3 ޖުލައި 2025 ގައެވެ.