އަލްޙާފިޡާ ޢާއިޝަތު ލީމް އަޙްމަދު
ޢާއިޝަތު ލީމް އަޙްމަދު، ކީރިތި ޤުރްއާން ހިތުދަސްކުރެއްވުމަށް ޝައުޤުވެރިވެވަޑައިގަތީ، އެކަމަކީ، ދަރުމައާއި ޘަވާބު އަދި އެކަމެއް ކުރުމުން، ދެ ދުނިޔޭގެ ބާއްޖަވެރިކަން ލިބޭ ކަމެއްކަން، އެންމެ ކުޑައިރުއްސުރެ މަންމަ ކިޔުއްވައި ދެއްވަން ފެށްޓެވި ހިސާބުންނެވެ. އެހެންކަމުން، ޢާއިޝަތު ލީމް ޤުރްއާން ހިތުދަސްކުރައްވަމުން ގެންދެވީ، ސްކޫލަށް ވަޑައިގަންނަވަމުން، ލިބިވަޑައިގަންނަވާ ހުސް ވަގުތުތަކުގައެވެ. އެންމެ ފުރަތަމަ ހިތުދަސްކުރައްވަމުން ގެންދެވީ، މަންމަޔާ އެކުގައެވެ. އޭގެފަހުން، ޤުރްއާން ހިތުދަސްކުރައްވައި ނިންމެވީ، ކީރިތި ޤުރްއާނާބެހޭ ޤައުމީ މަރުކަޒުންނެވެ.
ކީރިތި ޤުރްއާނާބެހޭ ޤައުމީ މަރުކަޒުން ފުރުޞަތު ލިބިވަޑައިގަތުންވީ، ޤުރްއާން ހިތުދަސްކުރެއްވުމުގެ ދަތުރުގައި ކުރިއަށް ވަޑައިގަތުމަށްޓަކައި ލީމްއަށް ލިބިވަޑައިގެންނެވި ވަރަށްބޮޑު ހިތްވަރަކަށެވެ. މަރުކަޒުގެ މުރާޖަޢާ ކުލާހުގައި ލީމް ބައިވެރިވެވަޑައިގަތީ، 2024ވަނަ އަހަރުގެ ޑިސެންބަރު މަހުގެ ތެރޭގައެވެ. ޤުރްއާން ހިތުދަސްކުރައްވައި ނިންމެވިއިރު، ލީމްގެ އުމުރަކީ، 17 އަހަރެވެ.
ކީރިތި ޤުރްއާން ހިތުދަސްކުރެއްވުމުގައި ވަރަށްގިނަ ފަރާތްތަކެއްގެ އެހީތެރިކަން ލިބިވަޑައިގެންފައިވާކަން ލީމް ފާހަގަކުރައްވައެވެ. ވަކިން ޚާއްޞަކޮށް، ލީމްގެ ލޮބުވެތި މަންމަ ކޮށްދެއްވި މަސައްކަތް ފާހަގަކުރައްވައެވެ. މީގެއިތުރުން، ކީރިތި ޤުރްއާނާބެހޭ ޤައުމީ މަރުކަޒާއި، އެ މަރުކަޒުގެ މުދައްރިސުންގެ ފަރާތުން ލިބިވަޑައިގެންނެވި އެހީތެރިކަންވެސް ލީމް ފާހަގަކުރައްވައެވެ.
ޢާއިޝަތު ލީމް އަޙްމަދު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 1 ޖުލައި 2025 ގައެވެ.