އަލްޙާފިޡް މުޙައްމަދު ޢިޔާން ޢަލީ އާދަމް
މުޙައްމަދު ޢިޔާން ޢަލީ އާދަމަކީ، ވަރަށް ކުޑައިރުއްސުރެވެސް ކީރިތި ޤުރްއާނަށް ޝައުޤުވެރިކަން ބަހައްޓަވާ ބޭފުޅެކެވެ. ޢިޔާން ބޮޑުވަމުން އައީ، ކީރިތި ޤުރްއާން އަޑުއަހައި އަދި ކިޔަވާ މާޙައުލެއްގައެވެ. އުމުރުން އެންމެ ތިން އަހަރުގައި ޢައްމާ ފޮތް ދަސްކުރައްވައި، ޕްރީސްކޫލް ޤުރްއާން މުބާރާތްތަކުގައި ބައިވެރިވެވަޑައިގެން ހިތުން ކިޔެވުމުގެ ބައިން މަތީ ވަނަތައް ހޯއްދެވިއެވެ. އަދި އުމުރުން އެންމެ ހަތް އަހަރުގައި ކީރިތި ޤުރްއާނުގެ އެންމެފަހު ތިން ފޮތް ހިތުން ދަސްކުރެއްވިއެވެ.
ކީރިތި ޤުރްއާނާބެހޭ ޤައުމީ މަރުކަޒުން ހިންގަވާ ޙިފްޡު ކުލާހުގައި 2017ވަނަ އަހަރުގެ ފެބުރުވަރީ މަހު، މުޙައްމަދު ޢިޔާން ބައިވެރިވެވަޑައިގެން، އެ އަހަރު ނިމުނުއިރު ހަތަރު ފޮތް އަދި 2018ވަނަ އަހަރާއި، 2019ވަނަ އަހަރު، ކޮންމެ އަހަރަކު އިތުރު 6 ފޮތް ދަސްކުރައްވައި، ޖުމުލަ 16 ފޮތް ހިތުދަސްކުރެއްވިއެވެ.
ކޯވިޑުގެ ބަލިމަޑުކަމުގެ ތެރޭގައި، ކިޔެވުން މެދުކެނޑުމަށްފަހު، 2020 އަދި 2021ވަނަ އަހަރު ކުރިއަށް ގެންދިޔަ އޮންލައިން ކުލާސްތަކުގައި ބައިވެރިވެވަޑައިގެން، އިތުރު 13 ފޮތް ދަސްކުރައްވައި، މުޅި މުޞްޙަފް އެއްކޮށް ހިތުދަސްކުރެއްވިއެވެ. އެއަށްފަހު، 2022ވަނަ އަހަރުން ފެށިގެން 2024ވަނަ އަހަރުގެ ނިޔަލަށް ޙިފްޡު ކުލާހުގައި ދެފަހަރު މަތިން މުޅި ޤުރްއާން އެއްކޮށް ދިގު މުރާޖަޢާއެއް ގޮތުގައި ކިޔުއްވައި ދެއްވިއެވެ. ކީރިތި ޤުރްއާނާބެހޭ ޤައުމީ މަރުކަޒުގެ ޙާފިޡުންގެ ކޮމިޓީއަށް ޤުރްއާން އެކީގައި ހިތުން ކިޔުއްވައި ދެއްވައި ނިންމެވީ، އުމުރުން 18 އަހަރުގައެވެ.
މުޙައްމަދު ޢިޔާން ޢަލީ އާދަމް، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 30 ޖޫން 2025 ގައެވެ.
ކީރިތި ޤުރްއާން ހިތުދަސްކުރެއްވުމުގައި ޢިޔާނަށް އެކިގޮތްގޮތުން ހިތްވަރު ދެއްވައި، އަދި އެންމެބޮޑު އެހީތެރިކަމެއް ވެދެއްވި ލޮބުވެތި މައިންބަފައިންނާއި، ޢާއިލާގެ އެންމެހައި މެންބަރުންނާއި، ކިޔަވައިދެއްވި މުދައްރިސުން ކޮށްދެއްވި މަސައްކަތް ޝުކުރުވެރިކަމާއެކުގައި ފާހަގަކުރައްވައެވެ.