އަލްޙާފިޡް އަނަސް ޢަބްދުﷲ
އަނަސް ޢަބްދުﷲ، ކީރިތި ޤުރްއާނަށް ޝައުޤުވެރިކަން އުފެދުނީ، ޢާއިލާގައި ޙާފިޡެއް ހުރުމާއި، އަނަސްގެ މަންމަގެ އެދިލެއްވުމުގެ މަތީންނެވެ. އެހެންކަމުން، އަނަސްގެ އުމުރުން ފަސް އަހަރުގައި ޤުރްއާން ހިތުދަސްކުރައްވަން ފެށްޓެވިއެވެ. އެއަށްފަހު، މާލޭގެ ދެތިން ޤުރްއާން ކުލާހަކުންވެސް ކިޔަވައި ވިދާޅުވެ، މަސްޖިދު އިބްރާހީމްގައި ހިންގަމުން ގެންދިޔަ ޤުރްއާން ކުލާހެއްގައި 2010ވަނަ އަހަރު ބައިވެރިވެވަޑައިގެން، ޤުރްއާން ހިތުދަސްކުރައްވަމުން ގެންދެވިއެވެ.
އަނަސް ޢަބްދުﷲގެ އުމުރުން ހަތް އަހަރުގައި، ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެވަޑައިގެންނެވިއެވެ. އަދި 2012ވަނަ އަހަރު 2 ފޮތް އަދި 2013ވަނަ އަހަރު 2 ފޮތް ހިތުދަސްކުރެއްވިއެވެ. އޭގެފަހުން، 500 ޙާފިޡުންގެ ކުލާހުގައި 2014ވަނަ އަހަރު ބައިވެރިވެވަޑައިގެން، 5 ފޮތް ހިތުދަސްކުރެއްވިއެވެ. އޭގެފަހުން، ކުޑަދުވަސްކޮޅަކު މެދުކެނޑުމަށްފަހު، 2018ވަނަ އަހަރު 4 ފޮތް، އަދި 2019ވަނަ އަހަރު 6 ފޮތް ހިތުދަސްކުރެއްވިއެވެ. މާތްﷲގެ ހެޔޮ ރަޙްމަތްފުޅާއެކު، ޤުރްއާން އެއްކޮށް ހިތުދަސްކުރެއްވީ، 2021ވަނަ އަހަރުގެ އެޕްރީލު މަހުގެ 8 ވަނަ ދުވަހުއެވެ. އޭރު އަނަސްގެ އުމުރަކީ 16 އަހަރެވެ. ހަމަ އެ އަހަރު އަނަސް ވަނީ، މަރުކަޒުގެ މުރާޖަޢާ ކުލާހުގައިވެސް ބައިވެރިވެވަޑައިގެންފައެވެ. 2025ވަނަ އަހަރުގެ މޭ މަހުގެ 6 ވަނަ ދުވަހު ޙިފްޡު އިމްތިޙާނުގައި ބައިވެރިވެވަޑައިގެންނެވިއެވެ.
އަނަސް ޢަބްދުﷲ، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 22 ޖޫން 2025 ގައެވެ. އަނަސް ޢަބްދުﷲ އަކީ، ޢާއިލާގެ ފުރަތަމަ ޙާފިޡްވެސް މެއެވެ.
ކީރިތި ޤުރްއާން ހިތުދަސްކުރެއްވުމުގައި އަނަސްއަށް އެންމެ ބޮޑަށް އެހީތެރިވެދެއްވި ލޮބުވެތި މައިންބަފައިންނަށާއި، ކިޔަވައިދެއްވި އުސްތާޛުންނަށް ހިތުގެ އެންމެ ފުންމިނުން އަނަސް، ޝުކުރު އަދާކުރައްވައެވެ.