އަލްޙާފިޡާ މަޢުޞޫމާ މުޙައްމަދު
މަޢުޞޫމާ މުޙައްމަދު، ކީރިތި ޤުރްއާން ހިތުދަސްކުރެއްވުމަށް ޝައުޤުވެރިކަން އުފެދުނީ، ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެވަޑައިގަތުމަށްޓަކައި ފޯމު ހުށަހެޅުއްވި ހިސާބުންނެވެ. އެ ހިސާބުން ކުލާހަށް ވަޑައިގަތުމުގެ ޝައުޤުވެރިކަން އުފެދި، ޤުރްއާން ހިތުދަސްކުރައްވަން ފެށްޓެވިއެވެ. ޙިފްޡު ކުލާހުގައި ކޮންމެ ދުވަހަކުވެސް ސަފުހާއެއް ދަސްކުރައްވަމުން ގެންދަވައި، ފޮތެއްގެ ދެބައިކުޅަ އެއްބައި ހަމަވުމުން، އެ ބައި މުރާޖަޢާގެ ގޮތުގައި ކިޔުއްވައި ދެއްވިއެވެ. އެގޮތުން، އެ ދުވަހެއްގެ ފިލާވަޅު އަނެއްދުވަހު، ދިގު މުރާޖަޢާއެއްގެ ގޮތުގައި ކިޔުއްވައި ދެއްވަމުން ގެންދަވައި، ކީރިތި ޤުރްއާން އެއްކޮށް ނިމެންދެން މުރާޖަޢާ ކުރިއަށް ގެންދެވިއެވެ.
މަޢުޞޫމާއަށް، ކީރިތި ޤުރްއާން ހިތުދަސްކުރެއްވުމަށް އެންމެ ފަސޭހަ ވަގުތަކީ، ދަންވަރުގެ ހަމަހިމޭން ވަގުތެވެ. އެއީ، އާ ފިލާވަޅު ދަސްކުރައްވާ ވަގުތެވެ. ފަތިސްނަމާދުގެ ފަހުން، ކުރިން ދަސްކުރައްވައިފައިވާ ބައި މުރާޖަޢާ ކުރައްވަން ވަގުތު ހުސްކުރައްވައެވެ. ކުލާހަށް ވަޑައިގަންނަވަނީ، އެ ދުވަހެއްގައި ކިޔަން ކަނޑައެޅިފައިވާ ބައި މުރާޖަޢާ ކުރައްވައި ދަސްކުރެއްވުމަށްފަހު، އިތުރު މީހަކަށް ކިޔުއްވައިދެއްވައިފައެވެ.
މަޢުޞޫމާ މުޙައްމަދު، ކީރިތި ޤުރްއާން ހިތުދަސްކުރެއްވުމަށް 2007 ވަނަ އަހަރު ފަށްޓަވައި، ހިތުދަސްކުރައްވައި ނިންމެވީ، 2021ވަނަ އަހަރުއެވެ. މުރާޖަޢާ ކުރެއްވުމަށް ހޭދަވީ، ތިން އަހަރެއްހައި ދުވަހެވެ. މުރާޖަޢާ ކުރެއްވުމަށްފަހު، ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކޮމިޓީއަށް ކިޔުއްވައި ދެއްވަން ފެށްޓެވީ، 2025ވަނަ އަހަރުގެ އެޕްރީލު މަހުގެ 13 ވަނަ ދުވަހުއެވެ. މަޢުޞޫމާ މުޙައްމަދު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 18 މޭ 2025 ގައެވެ.
ކުޑައިރުއްސުރެ، ކީރިތި ޤުރްއާނަށް ޝައުޤުވެރިކުރުވުމަށްޓަކައި މަޢުޞޫމާގެ މަންމައާއި ބައްޕަ ކޮށްދެއްވި އަގުހުރި މަސައްކަތްތަކަށް ޝުކުރު އަދާކުރައްވައެވެ. އަދި، މިކަމުގައި އެހީތެރިވެދެއްވި ކީރިތި ޤުރްއާނާބެހޭ ޤައުމީ މަރުކަޒުގެ އެންމެހައި އުސްތާޛުންނަށާއި، އުސްތާޛާއިންނަށާއި، ޤުރްއާން ހިތުދަސްކުރެއްވުމުގައި އެހީތެރިވެދެއްވި ހުރިހާ ފަރާތްތަކަށްވެސް ޝުކުރު އަދާކުރައްވައެވެ.