އަލްޙާފިޡާ ޢާއިޝަތު ނައުޝާ އިސްމާޢީލް
ޢާއިޝަތު ނައުޝާ އިސްމާޢީލް، ކީރިތި ޤުރްއާން ޙިފްޡު ކުރުމުގެ ދަތުރު ފެށްޓެވުމުގެ އަސްލަކީ، ލޮބުވެތި މަންމައެވެ. ނައުޝާގެ އުމުރުން އެންމެ 6 އަހަރުގައި ޤުރްއާން ހިތުދަސްކުރައްވަން ފެށްޓެވީ، ރަށުގައި ބޭއްވި ޤުރްއާން ހިތުދަސްކުރުމުގެ މުބާރާތެއްގައި ނައުޝާ ބައިވެރިކުރެއްވި ހިސާބުންނެވެ. އަދި އެ މުބާރާތުން ހޯއްދެވި ފުރިހަމަ ކާމިޔާބީއާއެކު، މި ފަންނުގެ ތެރެއަށް ވެދެވަޑައިގަތުމަށް އިތުރު ޝައުޤުވެރިކަމެއް އުފެދުނެވެ. އޭގެފަހުން، ރަށުފެންވަރުގައި ބޭއްވި ޤުރްއާން މުބާރާތްތަކާއި، އަތޮޅު ފެންވަރުގައި ބާއްވަމުން ގެންދިޔަ ޤުރްއާން މުބާރާތްތަކާއި، އަދި އެ ދުވަސްވަރު ޤައުމީ ފެންވަރުގައި ބާއްވަމުން ގެންދިޔަ މުބާރާތްތަކުގައި، އެކި ފެންވަރުގެ ކާމިޔާބީތައް ނައުޝާ ހޯއްދެވިއެވެ.
ކީރިތި ޤުރްއާން ހިތުދަސްކުރައްވަން ފެށްޓެވީ، ށ. މިލަންދޫގައި ހިންގަމުންގެންދާ، ޢަފާފް ޤުރްއާން ކުލާހުގެ ޙިފްޡު ކުރުމުގެ ބައިގައި 2016ވަނަ އަހަރު ބައިވެރިވެވަޑައިގަންނަވައިގެންނެވެ. ހަވީރާއި ރޭގަނޑު ކުލާހުގައި ހޭދަކުރައްވާއިރު، ގޭގައި ޤުރްއާން ހިތުދަސްކުރައްވަނީ، ރޭގަނޑު ކުލާސް ނިންމެވުމަށްފަހު، ލިބިވަޑައިގަންނަވާ ވަގުތުގައްޔާއި، ހެނދުނާއި މެންދުރުގެ ވަގުތުތަކުގައެވެ. އަބަދުވެސް ނައުޝާގެ ދުޢާއަކަށްވީ، ކީރިތި ޤުރްއާން ހިތުދަސްވާނެ ދުވަހެއް މާތްﷲ މިންވަރު ކުރެއްވުމެވެ.
މާތްﷲގެ ހެޔޮ ރަޙްމަތްފުޅާއެކު، މުޅި ޤުރްއާން އެކީގައި ހިތުދަސްކުރައްވައި ނިންމެވީ، 2023ވަނަ އަހަރުއެވެ. އޭރު ނައުޝާގެ އުމުރަކީ 19 އަހަރެވެ. އެއަށްފަހު، ރަށުގައި ހުންނަވައިގެން، އަހަރެއްހައި ދުވަހު ޤުރްއާން މުރާޖަޢާ ކުރެއްވުމަށްފަހު، ކީރިތި ޤުރްއާނާބެހޭ ޤައުމީ މަރުކަޒުގެ މުރާޖަޢާ ކުލާހުން ޖާގަ ލިބިވަޑައިގަތުމުން، 2025ވަނަ އަހަރުގެ ޖަނަވަރީ މަހު އެ ކުލާހުގައި ބައިވެރިވެވަޑައިގެންނެވިއެވެ. އަދި ތިންމަސް ދުވަހު އެ ކުލާހުގައި ހޭދަކުރެއްވުމަށްފަހު، އެއްމަސް ދުވަހުގެ ތެރޭގައި، ޙިފްޡު ކޮމިޓީއަށް ކިޔުއްވައި ދެއްވައި ނިންމެވިއެވެ.
ޢާއިޝަތު ނައުޝާ އިސްމާޢީލް، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 18 މޭ 2025 ގައެވެ.
ނައުޝާއަށް މިހާ ކުރު މުއްދަތެއްގެ ތެރޭގައި، ކީރިތި ޤުރްއާން ހިތުދަސްކުރައްވައި ނިންމަވައިލެއްވުނު ކަމަށްޓަކައި ލޮބުވެތި މަންމައަށާއި ބައްޕައަށާއި، މިކަމުގައި އެންމެ ބޮޑަށް އެހީތެރިވެދެއްވި ފިރާޤު މުދައްރިސަށާއި، ޢާއިލާއަށާއި، އެހެނިހެން ގޮތްގޮތުން އެހީތެރިވެދެއްވި މުދައްރިސުންނަށާއި އެކުވެރިންނަށްވެސް ޝުކުރު އަދާކުރައްވައެވެ. ނައުޝާގެ އަބަދުގެވެސް ދުޢާއަކީ، الله سُبْحَانَهُ وَتَعَالَىގެ ހެޔޮ ރަޙްމަތްފުޅާއެކު، ކީރިތި ޤުރްއާން ތާއަބަދަށް ހިތުގައި ލެހެއްޓެވުމެވެ.