އަލްޙާފިޡް ޢާތިކު ޢަބްދުއްސައްތާރު
ޢާތިކު ޢަބްދުއްސައްތާރު އެންމެ ކުޑައިރުއްސުރެ، މައިންބަފައިންގެ އެހީތެރިކަމާއެކުގައި، ގޭގައި ޤުރްއާން ކިޔަވަން ދަސްކުރައްވަން ފެށްޓެވިއެވެ. ކީރިތި ޤުރްއާން ހިތުދަސްކުރުމުގެ ތެރެއަށް ޢާތިކަށް ވެދެވަޑައިގެންނެވުނީ، ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެވަޑައިގަތުމުގެ ފުރުޞަތު ލިބިވަޑައިގެންނެވި ހިސާބުންނެވެ. ކީރިތި ޤުރްއާން ހިތުދަސްކުރައްވަން ފަށްޓަވައިގެން، ހިތުން ދަސްކުރާ ބައި ހިތުގައި ހަރުލެއްވުމަކީ އެތައް ދުވަހެއް ވަންދެން ޢާތިކަށް ވަރަށް އުނދަގޫ ކަމަކަށް ވިއެވެ. އެހެންނަމަވެސް، ހިތުދަސްކުރެއްވުން ދޫކޮށްނުލައްވައި، ހިތްވަރާއެކީގައި މަސައްކަތް ކުރެއްވުމުގެ ނަތީޖާ ފެނި، އެއްދުވަހުން އަނެއް ދުވަހަށް ކާމިޔާބުވަމުން ދިޔައެވެ. ކީރިތި ޤުރްއާން ހިތުދަސްކުރައްވަމުން، ސްކޫލުގެ ކަންކަމުގައި ހަރަކާތްތެރިވާން ޖެހުމުގެ ސަބަބުން މުރާޖަޢާ ކުރައްވައި، ދަސްކުރައްވަން އުނދަގޫވިކަން ޢާތިކަށް ފާހަގަކުރެއްވުނެވެ.
ޢާތިކުގެ އުމުރުން 18 އަހަރުގައި، ކީރިތި ޤުރްއާން ހިތުދަސްކުރުމުގެ މަތިވެރި ނިޢުމަތް މާތްﷲ މިންވަރުކޮށްދެއްވުމަކީ، ދުނިޔޭގައި ލިބޭނެ އެންމެބޮޑު އުފާކަމަށް ޢާތިކަށް ގަބޫލު ކުރެއްވުނެވެ. ޢާތިކުގެ މި ކާމިޔާބީގެ ފަހަތުގައި ނަސޭހަތާއި ހިތްވަރު ދެއްވުމުގައި ފޫހިކަމެއްނެތި ދެމިތިއްބެވި ޢާތިކުގެ މަންމައާއި ބައްޕަގެ މަސައްކަތާއި، ހެޔޮދުޢާއަކީ، މި ކާމިޔާބީގެ އަސްލު ކަމުގައިވާތީ، މަންމައާއި ބައްޕައަށް ލޯތްބާއެކުގައި ޢާތިކު ޝުކުރު އަދާކުރައްވައެވެ. އަދި މި ޝުކުރުގައި، ޢާއިލާގެ މެންބަރުންގެ އިތުރުން، އެކި މަރުޙަލާތަކުގައި ކިޔަވައިދެއްވި މުދައްރިސުންވެސް ޝާމިލް ކުރައްވައެވެ.
ޢާތިކު ޢަބްދުއްސައްތާރު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ 18 މާރިޗު 2025 ގައެވެ.