އަލްޙާފިޡް ޢާރިޝް ޢަބްދުﷲ އިބްރާހީމް
ކީރިތި ޤުރްއާން ހިތުދަސްކުރާ މީހުންނަށް ދުނިޔެއާއި އާޚިރަތުގައި ހުރި ދަރުމަޔާއި ޘަވާބުގެ މަތިވެރިކަން ގަބޫލުކޮށް، ކީރިތި ޤުރްއާން ހިތުދަސްކުރަން ޢާރިޝް ޢަބްދުﷲ އިބްރާހީމް ފެށީ، 2020ވަނަ އަހަރުއެވެ. ކީރިތި ޤުރްއާން ހިތުދަސްކުރުމަށް ހިތުގައި ޝައުޤުވެރިކަން އޮވެ، ކުރާހިތުން ހިތުދަސްކުރަން ފަށައިފިނަމަ، ކޮންމެ މީހަކަށްވެސް ކީރިތި ޤުރްއާން ހިތުދަސްކުރެވޭނެ ކަމަށް ޢާރިޝް ގަބޫލުކުރެއެވެ.
ކީރިތި ޤުރްއާން ހިތުދަސްކުރުމަށް އާންމު ގޮތެއްގައި ރޭގަނޑުގެ ވަގުތުތައް ހޭދަކުރާ ޢާރިޝަށް އެންމެ ޚާއްޞަ ވަގުތަކީ، ފަތިސް ވަގުތެވެ. ދަސްކުރާ އާޔަތްތައް ހިތުގައި ހަރުލެއްވުމުގެ ގޮތުން ކޮންމެ ދުވަހަކު ދެ ފޮތް މުރާޖަޢާކޮށް ކިޔަވަމުން ގެންދިޔައެވެ.
ޢާރިޝްގެ އުމުރުން އެންމެ 15 އަހަރުގައި، ކީރިތި ޤުރްއާން ހިތުދަސްކޮށް ނިންމީ 3 އަހަރުންނެވެ. މުރާޖަޢާ ކުރުމަށް ހޭދަވީ 1 އަހަރެވެ. އެހެންކަމުން، މާތްﷲ ދެއްވި މަތިވެރި ނިޢުމަތް، ދެމެހެއްޓުމުގެ ނިޔަތުގައި މަސައްކަތްކޮށް، ކީރިތި ޤުރްއާނުގެ ދާއިރާއިން އިތުރަށް ކުރިއަށްދިޔުމަކީ ޢާރިޝްގެ އުންމީދެކެވެ.
ކީރިތި ޤުރްއާން ހިތުދަސްކުރެވިފައި ވަނީ، ޢާރިޝްގެ ލޮބުވެތި މައިންބަފައިންނާއި، ހިތުދަސްކޮށްދެއްވުމުގައި އެހީތެރިވެދެއްވި އުސްތާޛުން ކަމުގައިވާ އަލްޙާފިޡް އަޙްމަދު ނާޒިލާއި، އުސްތާޛު މުޙައްމަދު ވާފިރުގެ އިރުޝާދާއި، ނަސޭހަތާއި، ދެއްވައިފައިވާ ހިތްވަރުން ކަމުގައިވާތީ، އެ ބޭފުޅުންނަށް ނުހަނު އިޚުލާޞްތެރިކަމާއެކު ޢާރިޝް ޝުކުރު އަދާކުރެއެވެ.
ޢާރިޝް ޢަބްދުﷲ އިބްރާހީމް، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 13 މާރިޗު 2025 ގައެވެ.