އަލްޙާފިޡާ ނަބާހަތު ޢަބްދުﷲ
ނަބާހަތު ޢަބްދުﷲ، ކީރިތި ޤުރްއާން ހިތުދަސްކުރައްވަން ފެށްޓެވީ، ޤުރްއާން ކިޔެވުމުގެ ތަފާތު އެކިއެކި މުބާރާތްތަކުގައި ބައިވެރިވެވަޑައިގެން، އެ މުބާރާތެއްގެ މުޤައްރަރަށް ޤުރްއާން ކިޔެވުމަށް ދަސްކުރެއްވުމުގެ ތެރެއިންނެވެ. ކޮންމެ ރެޔަކު ފަތިސްނަމާދުގެ ބަންގި ގޮވުމުގެ ގަޑިއެއްހާއިރު ކުރިން ފެށިގެން ނަބާހަތު، ކީރިތި ޤުރްއާން ހިތުދަސްކުރެއްވުމަށް ވަގުތު ހޭދަކުރައްވައެވެ. ދަސްކުރައްވަމުން ގެންދަވާ ހިސާބު ހަނދާނުގައި ބެހެއްޓެވުމުގެ ގޮތުން، އާ ފިލާވަޅު ދަސްކުރެއްވުމުގެ ކުރިން، ދަސްކުރެއްވި ހިސާބުން ތަރުތީބުން ހަތަރު ސަފުހާ މުރާޖަޢާ ކުރެއްވުމަކީ، ނަބާހަތުގެ އާދައެއް ކަމުގައި ހެއްދެވިއެވެ.
ނަބާހަތުގެ އުމުރުން 18 އަހަރުގައި، ކީރިތި ޤުރްއާން ހިތުދަސްކުރުމުގެ މަތިވެރި ނިޢުމަތް މާތްﷲ މިންވަރު ކުރެއްވުމަކީ، ޙަޔާތުގައި ލިބިވަޑައިގެންނެވި އެންމެބޮޑު އުފާފުޅު ކަމުގައި ނަބާހަތު ދެކެވަޑައިގަންނަވައެވެ. ވަރުގަދަ ޢަޒުމަކާއި ހިތްވަރާ އެކުގައި، ކުރާހިތުން ކުރަން ފަށައިފިނަމަ، ކޮންމެ މީހަކަށްވެސް ކީރިތި ޤުރްއާން ހިތުދަސްކުރެވޭނެ ކަމަށް ނަބާހަތު ގަބޫލު ކުރައްވައެވެ. ކީރިތި ޤުރްއާން ހިތުދަސްކުރެވުމަކީ، އެތައް ބަޔަކު ނަބާހަތަށް ދިން ހިތްވަރާއި، އެތައް ބައެއްގެ މަސައްކަތުން ހާސިލުވި ކަމެއް ކަމުގައިވާތީ، އެ ހުރިހާ ފަރާތްތަކަށް ނަބާހަތު ޝުކުރު އަދާކުރައްވައެވެ. ޚާއްޞަކޮށް، ނަބާހަތުގެ ލޮބުވެތި މަންމައާއި ބައްޕައާއި، ފިރިކަލުންނާއި، ރަޝީދުބޭގެ ނަން ފާހަގަކުރައްވައެވެ.
ނަބާހަތު ޢަބްދުﷲ، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 13 މާރިޗު 2025 ގައެވެ.