އަލްޙާފިޡާ މަރްޔަމް ހުނާ ޙަސަން
މަރްޔަމް ހުނާ ޙަސަން، ކީރިތި ޤުރްއާން ކިޔެވުމަށް ޝައުޤުވެރިވީ، ހުނާގެ ދައްތަ ކީރިތި ޤުރްއާން ހިތުދަސްކުރިއިރުއެވެ. ހުނާގެ އުމުރުން 9 އަހަރުގައި، ކީރިތި ޤުރްއާނާބެހޭ ޤައުމީ މަރުކަޒުގެ ފުވައްމުލަކު ގޮފީގައި ބައިވެރިވެގެން ކީރިތި ޤުރްއާން ހިތުދަސްކުރައްވަން ފެށްޓެވިއެވެ. ސްކޫލް ގަޑިއާއި ޙިފްޡު ކުލާހުގެ ގަޑި، އެއް ވަގުތަކާ ދިމާވާތީ، ފުވައްމުލަކު ޒިކުރާ ކޮލެޖަށް ބަދަލުވެ، އެ ކޮލެޖުގައި ހިންގާ ޙިފްޡު ކުލާހުގައި ބައިވެރިވެ، އިތުރަށް ދަސްކުރައްވަން ފެށްޓެވިއެވެ.
ހުނާ، ކީރިތި ޤުރްއާން ހިތުދަސްކޮށް މުރާޖަޢާ ކުރަންޖެހުނު އަހަރަކީ، އޯ.ލެވެލް އިމްތިޙާނުގައި ބައިވެރިވާ އަހަރު ކަމަށްވުމުން، ހިތުދަސްކުރުން ދުވަސްކޮޅަކަށް މެދުކަނޑާލަން ޖެހުނެވެ. އެއަށްފަހު، 6 މަސް ދުވަހުގެ ތެރޭގައި މުރާޖަޢާ ކުރައްވައި، ކީރިތި ޤުރްއާނާބެހޭ ޤައުމީ މަރުކަޒުގެ ފުވައްމުލަކު ޙިފްޡު ކޮމިޓީއަށް 2025ވަނަ އަހަރު ކިޔުއްވައި ދެއްވައި، ޙާފިޡަކަށް ވެވަޑައިގެންނެވިއެވެ.
ކީރިތި ޤުރްއާން ހިތުދަސްކުރެއްވުމުގައި ހުނާއަށް އެންމެބޮޑު އެހީތެރިކަމެއް ވެދެއްވައިފައި ވަނީ، ހުނާގެ ލޮބުވެތި މަންމައާއި ބައްޕައެވެ. އެހެންކަމުން، މަންމައާއި ބައްޕަގެ މަސައްކަތް ޝުކުރުވެރިކަމާއެކުގައި ފާހަގަކުރައްވައެވެ. އަދި ކީރިތި ޤުރްއާނާބެހޭ ޤައުމީ މަރުކަޒުގެ ފުވައްމުލަކު ގޮފީގެ މުދައްރިސުންނާއި، ފުވައްމުލަކު ޒިކުރާ ކޮލެޖުގެ މުދައްރިސުންނާއި، މެނޭޖްމަންޓަށްވެސް ހުނާ ނުހަނު އިޚުލާޞްތެރިކަމާއެކުގައި ޝުކުރު އަދާކުރައްވައެވެ.
މަރްޔަމް ހުނާ ޙަސަން، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 4 ފެބުރުވަރީ 2025 ގައެވެ.