އަލްޙާފިޡް ޒަލަފް ބިން ނާފިޢު
ޒަލަފް ބިން ނާފިޢުގެ ހިތުގައި ކީރިތި ޤުރްއާން ހިތުދަސްކުރުމުގެ ޝައުޤުވެރިކަން އުފެދުނީ، މަންމައާއި ބައްޕައާއި މުދައްރިސުން ދެއްވި ނަސޭހަތާއި ހިތްވަރުގެ ސަބަބުންނެވެ. އެންމެ ފުރަތަމަ، ކީރިތި ޤުރްއާން ހިތުދަސްކުރަމުންދިޔައީ، ގޭގައި ޒަލަފްގެ މަންމައާ އެކުގައެވެ. އަދި، ކީރިތި ޤުރްއާނާ ބެހޭ ޤައުމީ މަރުކަޒުގެ މަހިބަދޫ ގޮފީގެ ކުލާހުގައެވެ. އާންމު ގޮތެއްގައި ފަތިސްނަމާދަށްފަހު ކީރިތި ޤުރްއާން ހިތުދަސްކުރަމުން ގެންގޮސް، ޒަލަފް ކީރިތި ޤުރްއާން ހިތުދަސްކޮށް ނިމުނީ، އުމުރުން 12 އަހަރުގައި 2024ވަނަ އަހަރުގެ ފަހުކޮޅުގައެވެ.
ޤުރްއާން ހިތުދަސްކުރުމުގައި އެންމެ ބޮޑު އެހީތެރިކަމެއް ޒަލަފަށް ލިބިފައިވަނީ މަންމައާއި ބައްޕަގެ ފަރާތުންނެވެ. ކީރިތި ޤުރްއާން ހިތުދަސްކުރުމުގައި ގިނަގުނަ ފަރާތްތަކެއްގެ އެހީތެރިކަން ޒަލަފަށް ލިބިފައިވާއިރު، އެ ހުރިހާ ފަރާތްތަކަކަށް ޒަލަފް ޝުކުރު އަދާކުރެއެވެ.
ޒަލަފް ބިން ނާފިޢު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 12 ޖަނަވަރީ 2025 ގައެވެ.