އަލްޙާފިޡާ އާމިނަތު ޢިލްމާ ޠަލްޙަތު
އާމިނަތު ޢިލްމާ ޠަލްޙަތު، ކީރިތި ޤުރްއާން ހިތުދަސްކުރުމަށް ޝައުޤުވެރިވީ، ޙިފްޡު ކުރުމަށް ދޮންދޫނި ޕްރީސްކޫލްގައި ކަނޑައަޅައިފައިވާ މުޤައްރަރަށް ދަސްކުރުމުގެ ތެރެއިންނެވެ. މިގޮތުން، 2013ވަނަ އަހަރު ޔޫ.ކޭ.ޖީ. ނިމުނުއިރު، ސޫރަތުލް މުޖާދަލާއިން ސޫރަތުއްނާސި އާ ހަމައަށް ވަނީ ދަސްކުރެވިފައެވެ.
2015ވަނަ އަހަރު، ޢިލްމާގެ ޢުމުރުން 8 އަހަރުގައި ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެ، ޙިފްޡުކުރަން ފެށިއެވެ. ކޮންމެ ރެއެއްގެ މަޣްރިބް ނަމާދަށްފަހު މަންމައާއެކުގައި، އާ ފިލާވަޅެއް ކިޔަވައި ދަސްކޮށް، މަންމައަށް ކިޔައިދިނުމަކީ، ކޮންމެ ދުވަހަކުވެސް ކުރަމުން އައި ކަމެކެވެ. 2022ވަނަ އަހަރު ކީރިތި ޤުރްއާން އެއްކޮށް ދަސްކޮށް ނިންމުމަށްފަހު، މުރާޖަޢާ ކުލާހުގައި ބައިވެރިވިއެވެ. އެއީ، 2024ވަނަ އަހަރު އުމުރުން 16 އަހަރުގައެވެ.
ކީރިތި ޤުރްއާން ހިތުދަސްކުރުމުގެ ބުރަ މަސައްކަތް ޢިލްމާއަށް ކާމިޔާބުވެފައި ވަނީ ގިނަ ބައެއްގެ އެހީތެރިކަމާ އެކުގައެވެ. ކީރިތި ޤުރްއާން ހިތުދަސްކުރުމަށް ޢިލްމާއަށް ހިތްވަރުދީ، އަބަދުވެސް މަސައްކަތް ކޮށްދެއްވައިފައި ވަނީ ޢިލްމާގެ މަންމައެވެ. މައިންބަފައިންގެ ލޯތްބާއި އިރުޝާދު ކެނޑިނޭޅި ލިބެމުންދިޔަކަން ޢިލްމާ ފާހަގަކުރެއެވެ. އެހެންކަމުން، ޢިލްމާގެ މަންމައާއި ބައްޕައަށް އިޚުލާޞްތެރިކަމާއި ލޯތްބާއެކު ހިތުގެ އެންމެ ފުންމިނުން ޝުކުރު އަދާކޮށް، އަދި މުދައްރިސުންނާއި، އާއިލާގެ އެކި ފަންތީގެ މެންބަރުން ދީފައިވާ ލޯތްބާއި ހިތްވަރަށްޓަކައި އެ ފަރާތްތަކަށްވެސް ޢިލްމާ ޝުކުރު އަދާކުރެއެވެ.
އާމިނަތު ޢިލްމާ ޠަލްޙަތު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 12 ޖަނަވަރީ 2025 ގައެވެ. އޭރު އުމުރަކީ 17 އަހަރެވެ.