އަލްޙާފިޡް ޒާލިފް މަދީޙް
ޅ. ނައިފަރު ބިލާލް ޤުރްއާން ކުލާހުގައި 2021ވަނަ އަހަރު ބައިވެރިވެ ކިޔަވަން ފެށުން ވެގެންދިޔައީ، ޒާލިފް މަދީޙް، ކީރިތި ޤުރްއާން ހިތުދަސްކުރުމުގެ ފެށުން ކަމަށެވެ. ކީރިތި ޤުރްއާން ހިތުދަސްކުރަން ފެށި ދުވަސްވަރު، ޒާލިފް ދަސްކުރަމުން ގެންދިޔައީ، ދުވާލަކު އެއް ސަފުހާއެވެ. އަދި، ގިނަދުވަސްވީ ވަރަކަށް ދަސްކުރެވޭ މިންވަރު އިތުރުވަމުން ދިޔައެވެ. މަޣްރިބް ނަމާދާއި ޢިޝާ ނަމާދާ ދެމެދުގެ ވަގުތުތަކުގައި ކީރިތި ޤުރްއާން ހިތުދަސްކުރަމުންގެންދިޔަ ކަމުގައިވީނަމަވެސް، ހިތުދަސްކުރަން ޒާލިފަށް އެންމެ ފަސޭހަ ވަގުތަކީ، ފަތިސްނަމާދުގެ ކުރިންނާއި، ފަތިސްނަމާދުގެ ފަހުންނެވެ.
ޒާލިފް، ކީރިތި ޤުރްއާން އެއްކޮށް ހިތުދަސްކޮށް ނިންމީ، އުމުރުން އެންމެ 11 އަހަރުގައެވެ. 8 މަސް ދުވަހުން މުރާޖަޢާކޮށް، އިމްތިޙާނު ކޮމިޓީއަށް ކިޔައިދިނުމަށް ތައްޔާރުވެ، ޙިފްޡު އިމްތިޙާނުގައި ބައިވެރިވީއެވެ.
ކީރިތި ޤުރްއާން ހިތުދަސްކުރުމުގެ އެކި މަރުޙަލާތަކުގައި އެހީތެރިވެދީފައިވާ އެކި ފަރާތްތަކަށް ޒާލިފް ޝުކުރު އަދާކުރެއެވެ. ޚާއްޞަކޮށް، ޒާލިފުގެ ލޮބުވެތި މައިންބަފައިންނާއި، އުސްތާޛު މުޙައްމަދު ވާފިރު އަބޫބަކުރުގެ ނަން ޒާލިފް ފާހަގަކުރެއެވެ.
ޒާލިފް މަދީޙް، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 14 ޖަނަވަރީ 2025 ގައެވެ.