އަލްޙާފިޡް އުވައިސް ބިން ޢިނާޒު
އުވައިސް ބިން ޢިނާޒުގެ މާމައަކީ، ގޭގައި ކީރިތި ޤުރްއާން ކިޔަވައިދެއްވާ ބޭފުޅެކެވެ. ކުޑައިރުއްސުރެ މާމަ ކިޔަވައިދެއްވާ އަޑު އިވުމާއި، މާމަގެ މަސައްކަތް ފެނި، ކީރިތި ޤުރްއާން ކިޔެވުމާއި، ކީރިތި ޤުރްއާން ހިތުދަސްކުރުމަށް އުވައިސްގެ ހިތުގައި ޝައުޤުވެރިކަން އުފެދުނެވެ. ޕްރީސްކޫލްގައި (PL Kids) އުޅުނުއިރު ޤުރްއާން ހިތުދަސްކުރަން ފެށިއެވެ. ޕްރީސްކޫލް ނިމުނުއިރު ތިން ފޮތް ދަސްކުރެވުނެވެ.
ކީރިތި ޤުރްއާން ހިތުދަސްކުރުމުގެ މަތިވެރި މަޤްޞަދުގައި ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެ، އުވައިސްގެ އުމުރުން 12 އަހަރުގައި ކީރިތި ޤުރްއާން ހިތުދަސްކުރިއެވެ. ނަމަވެސް، ދިމާވި ޞިއްޙީ މައްސަލައެއްގެ ސަބަބުން މުރާޖަޢާ ކުރުމަށް ދަތިތަކާ ކުރިމަތިވެ، ގިނަ ދުވަސްތަކެއް ފާއިތުވިއެވެ. އުވައިސްގެ ހިތުގައި ކީރިތި ޤުރްއާން ހިތުދަސްކުރުމަށް އޮތް ޝައުޤުވެރިކަމެއްގެ ބޮޑުކަމުން އަނެއްކާވެސް އާ ހިތްވަރަކާއެކުގައި މުރާޖަޢާކޮށް، އުމުރުން 16 އަހަރުގައި އުވައިސްގެ މަޤްޞަދު ހާސިލުކޮށް، ޙާފިޡް ކަމުގެ އިމްތިޙާނުގައި ބައިވެރިވެ ޙާފިޡަކަށްވިއެވެ.
މާތްﷲ އަށް ޙަމްދުކުރާ ހާލު، ކީރިތި ޤުރްއާން ހިތުދަސްކުރުމުގައި އެންމެ މުހިންމު ދައުރެއް އަދާކޮށްފައިވާ އުވައިސްގެ ލޮބުވެތި މަންމައާއި ބައްޕަގެ ނަން ޝުކުރުވެރިކަމާއެކުގައި ފާހަގަކުރެއެވެ. އަދި، މުދައްރިސުންނަށް އަބަދުވެސް ޝުކުރު ޙައްޤު ކަމުގައި އުވައިސް ގަބޫލުކުރެއެވެ.
އުވައިސް ބިން އިނާޒު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 15 ޑިސެންބަރު 2024 ގައެވެ.