އަލްޙާފިޡާ ފަރީދާ މުޙައްމަދު
ފަރީދާ މުޙައްމަދަކީ، ކީރިތި ޤުރްއާން ހިތުދަސްކުރެއްވުމުގެ ޝައުޤުވެރިކަން އަބަދުވެސް ބަހައްޓަވާ ބޭފުޅެކެވެ. ކީރިތި ޤުރްއާން ހިތުދަސްކުރައްވަން ފެށްޓެވީ، 2007ވަނަ އަހަރު، ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައެވެ. ނުހަނު ބުރަ މަސައްކަތާއި ހިތްވަރާއެކު، މުޅި ކީރިތި ޤުރްއާން އެއްކޮށް ހިތުދަސްކުރައްވައި، 2011ވަނަ އަހަރު ނިންމަވައިލެއްވިއިރު، މިކަމަށް ހަތަރު އަހަރު ދުވަހުގެ މުއްދަތެއް ފަރީދާ ހޭދަކުރައްވައިފައި ވެއެވެ. އޭގެފަހުން މެދުކެނޑުމަކަށްފަހު، މުރާޖަޢާ ކުރުމުގެ މަރުޙަލާ ކުރިއަށް ގެންދަވައިފައި ވަނީ 2014ވަނަ އަހަރުން ފެށިގެން 2017ވަނަ އަހަރުގެ ނިޔަލަށް ދިވެހިރާއްޖޭގެ އިސްލާމީ ޔުނިވަރސިޓީގެ ޙިފްޡު ކުލާހުގައެވެ.
މި މަތިވެރި ނިޢުމަތް ދެއްވި ކަމަށްޓަކައި މާތްﷲ އަށް ޙަމްދުކުރުމާއެކު، ކީރިތި ޤުރްއާން ހިތުދަސްކުރެއްވުމުގައި އެހީތެރިވެދެއްވި ޢާއިލާގެ މެންބަރުންނަށާއި، ކިޔަވައިދެއްވި މުދައްރިސުން ކަމަށްވާ، އަލްމަރްޙޫމާ މަރްޔަމް ޢުޘްމާނާއި، އުސްތާޛާ ލަޠީފާ އަޙްމަދާއި، ޙާމިދު އިބްރާހީމްގެ އިތުރުން، ދިވެހިރާއްޖޭގެ އިސްލާމީ ޔުނިވަރސިޓީގެ ދެ އުސްތާޛުން ކަމަށްވާ އިބްރާހީމް ރަމްޒީއާއި، އިބްރާހީމް ޒުހައިރުގެ ނަން ވަކިން ޚާއްޞަ ގޮތެއްގައި ފާހަގަކުރައްވައެވެ.
ދިވެހިރާއްޖޭގެ އިސްލާމީ ޔުނިވަރސިޓީން ފަރީދާ މުޙައްމަދަށް ދޫކުރައްވައިފައިވާ ޙާފިޡް ކަމުގެ ސަނަދަށް ބައްލަވައި، ކީރިތި ޤުރްއާން ހިތުދަސްކުރައްވައިފައިވާކަން ކީރިތި ޤުރްއާނާބެހޭ ޤައުމީ މަރުކަޒުން ކަށަވަރު ކުރައްވައި، ޙާފިޡް ކަމުގެ ސަނަދު އެ މަރުކަޒުން ދޫކުރެއްވީ 12 ނޮވެންބަރު 2024 ގައެވެ. ފަރީދާ މުޙައްމަދު، ފާސްވެފައިވަނީ 2ވަނަ ދަރަޖައިގައެވެ.