އަލްޙާފިޡް އަޙްމަދު ރައީފް މުޙައްމަދު
އަޙްމަދު ރައީފް މުޙައްމަދުގެ ހިތްޕުޅުގައި ކީރިތި ޤުރްއާން ހިތުދަސްކުރެއްވުމަށް ޝައުޤުވެރިކަން އުފެދުނީ، ރަށުގައި ބޭއްވި ޤުރްއާން ކިޔެވުމުގެ އެކިއެކި މުބާރާތްތަކުގެ ހިތުން ކިޔެވުމުގެ ގޮފީގެ މުޤައްރަރު ދަސްކުރައްވަން ފެށްޓެވި ހިސާބުންނެވެ. މިގޮތުން، އެކި މުބާރާތްތަކުގެ އުމުރުފުރާތަކުގައި ބައިވެރިވެވަޑައިގެން ލިބިވަޑައިގެންނެވި ކާމިޔާބީތަކަކީ، ކީރިތި ޤުރްއާން ހިތުދަސްކުރެއްވުމަށް ލިބިވަޑައިގެންނެވި ހިތްވަރެކެވެ.
އަޙްމަދު ރައީފް މުޙައްމަދު، ރަސްމީ ސިފައެއްގައި ޙިފްޡު ކުރައްވަން ފެށްޓެވީ، ރަށުގައި ހިންގާ ގުލްފާމް ޤުރްއާން ކުލާހުގައި ކިޔަވައިދެއްވި ޙާފިޡެއްގެ އަރިހުން 2017ވަނަ އަހަރުއެވެ. މިކަމުގައި އެންމެ ބޮޑު އެހީތެރިކަމެއް ވެދެއްވައިފައި ވަނީ ރައީފުގެ ލޮބުވެތި މަންމައެވެ. 2020ވަނަ އަހަރު ޙިފްޡު ކުރެއްވުމުގައި އިތުރަށް ކުރިއަށް ވަޑައިގަތުމަށްޓަކައި ތަދައްބުރު އޮންލައިން ޙިފްޡު ކުލާހުގައި ބައިވެރިވެވަޑައިގަތުމުގެ އިތުރުން، "ޢިލްމު އިންސްޓިޓިއުޓް ފޮރ އިސްލާމިކް ސްޓަޑީޒް" ޙިފްޡު ކުލާހުގައި އޮގަސްޓު 2022 ގައި ބައިވެރިވެވަޑައިގެން، 5 އޮކްޓޫބަރު 2022ގެ ނިޔަލަށް ޙިފްޡު ކުރައްވައި ނިންމެވިއެވެ. އަދި 2023ވަނަ އަހަރު ކީރިތި ޤުރްއާނާބެހޭ ޤައުމީ މަރުކަޒުގެ މުރާޖަޢާ ކުލާހުގައި ބައިވެރިވެވަޑައިގެން، މުރާޖަޢާ ކުރައްވައި، ޙިފްޡު ކޮމިޓީއަށް ކިޔުއްވައިދެއްވިއެވެ.
ކީރިތި ޤުރްއާން ހިތުދަސްކުރެއްވުމަށް ރައީފް ފެށްޓެވި މި ދަތުރުގައި އެކިގޮތްގޮތުން ރައީފަށް އެހީތެރިވެދެއްވި އެންމެހައި ފަރާތްތަކުން ޚާއްޞަކޮށް، ރައީފުގެ ލޮބުވެތި މަންމައާއި ބައްޕައާއި، ޢާއިލާގެ އެންމެހައި މެންބަރުން ކޮށްދެއްވި މަސައްކަތްތައް ޝުކުރުވެރިކަމާއެކުގައި ފާހަގަކުރައްވައެވެ.
އަޙްމަދު ރައީފް މުޙައްމަދު، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 6 ނޮވެންބަރު 2024 ގައެވެ.