އަލްޙާފިޡް މުޙައްމަދު މިޝްޢަލް ޢާޡިމް
އެންމެ ކުޑައިރުއްސުރެ މިޝްޢަލް ނިދާގަޑީގައި ކީރިތި ޤުރްއާން އަޑުއެހޭނެ ގޮތަށް ގޭގައި ޤުރްއާން ޖަހާފައި ހުރުމުގެ ސަބަބުން މިޝްޢަލްއަށް ކީރިތި ޤުރްއާނުގެ ޢައްމާ ފޮތުގެ ސޫރަތްތައް ދަސްވެ، ޤުރްއާން ކިޔެވުމުގެ މުބާރާތްތަކުން މަތީ ވަނަތައް ހާސިލުކުރުމަކީ، ކީރިތި ޤުރްއާން ހިތުދަސްކުރުމަށް މިޝްޢަލް ޝައުޤުވެރިކަން އުފެދެން ދިމާވި ސަބަބެވެ. ކީރިތި ޤުރްއާނާބެހޭ ޤައުމީ މަރުކަޒުން 2013ވަނަ އަހަރު ހުޅުވައިލި 500 ޙާފިޡުންގެ ޕުރޮގުރާމުގައި ބައިވެރިވެ ޙިފްޡު ކުރަން ފެށިއެވެ. އެކި ސަބަބުތަކާ ހުރެ ޙިފްޡު ކުރުން މެދުކެނޑެމުންދިޔަ ނަމަވެސް، މަންމައާއި ބައްޕަގެ ނަސޭހަތާއި، ދެއްވި އެއްބާރުލެއްވުން ވެގެންދިޔައީ، ކީރިތި ޤުރްއާން ހިތުދަސްކުރެވުނު އެންމެބޮޑު ސަބަބަށެވެ. ކޮންމެ ރެއެއްގެ ދަންވަރު ތެދުވެ، ދަސްކުރަންޖެހޭ ބައިތައް ދަސްކުރެއެވެ. އަދި ދަސްކުރިބައި، ފަތިސްނަމާދުގެ ފަހުން މަންމައަށް ކިޔައިދެއެވެ. މީގެއިތުރަށް، ކޮންމެ ރެއެއްގެ މަޣްރިބް ނަމާދަށްފަހު، ކީރިތި ޤުރްއާން މުރާޖަޢާ ކުރެއެވެ.
މިޝްޢަލް، ކީރިތި ޤުރްއާން ހިތުދަސްކޮށް ޙާފިޡަކަށްވުމުގެ އެންމެ ބޮޑު ސަބަބަކީ، ޙިފްޡު ކުރުމަށް މެދުނުކެނޑި ހިތްވަރު ދެއްވި މިޝްޢަލްގެ ލޮބުވެތި މަންމައެވެ. އަދި ބައްޕަގެ މިންނެތް މަސައްކަތާއި، މަރުކަޒުގެ އުސްތާޛުންގެ އަގުހުރި ނަސޭހަތާއި، ދެއްވި ހިތްވަރު، މިޝްޢަލް ޝުކުރުވެރިކަމާއެކުގައި ފާހަގަކުރެއެވެ. އަދި، ކީރިތި ޤުރްއާނާބެހޭ ޤައުމީ މަރުކަޒުގެ މުވައްޒަފުންވެސް ހިމެނޭ ގޮތުންނެވެ.
މުޙައްމަދު މިޝްޢަލް ޢާޡިމް، 2ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ 5 ނޮވެންބަރު 2024 ގައެވެ.