އަލްޙާފިޡާ އާމިނަތު މަންހާ ބިންތް އިސްމާޢީލް
އެންމެ ކުޑައިރު، ބަލައިގެން ކިޔަވަން ނޭނގޭއިރުވެސް ކީރިތި ޤުރްއާނުގެ ޢައްމާ ފޮތުގެ ކުރު ސޫރަތްތައް އާމިނަތު މަންހާ ބިންތް އިސްމާޢީލް ހިތުން ދަސްކުރިއެވެ. ޕްރީސްކޫލްގައި އުޅުނުއިރު، ޤުރްއާން ކިޔެވުމުގެ އެކިއެކި މުބާރާތްތަކުގައިވެސް ނުބަލައި ކިޔުމުގެ ބައިގައި ބައިވެރިވުމާ ގުޅިގެން، ކީރިތި ޤުރްއާން ހިތުދަސްކުރުމުގެ ޝައުޤުވެރިކަން މަންހާގެ ހިތުގައި އުފެދިގެންދިޔައެވެ. އަދި ކީރިތި ޤުރްއާން ހިތުދަސްކުރުމަށް ބާރުއަޅުއްވައި، ހިތްވަރު ދެއްވައި، މަންހާއަށް އެހީތެރިވެދެއްވުމުގައި މަންމަގެ ހުރިހާ ވަގުތެއް ހުސްކުރެއްވިއެވެ.
ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުން ޖާގަ ހޯދުމަށްފަހު، ޤުރްއާން ހިތުދަސްކުރުމަށްޓަކައި، އާ ހިތްވަރަކާއެކު މަންހާ ކުރި މަސައްކަތުގެ ނަތީޖާއަކަށްވީ، އުމުރުން 14 އަހަރުގައި، 2023ވަނަ އަހަރު ޤުރްއާން އެއްކޮށް ހިތުދަސްކޮށް ނިންމުމެވެ. ސްކޫލަށް ދަމުން، ސްކޫލްގެ ފިލާވަޅުތައް ދަސްކުރުމަށް ވަގުތު ހުސްކުރަމުން، ކޮންމެ ދުވަހެއްގެ މެންދުރުފަހު، ކީރިތި ޤުރްއާން ހިތުދަސްކުރުމަށް މަސައްކަތް ކުރިއެވެ. އަދި ޙިފްޡު ކުލާހަށް ގަވާއިދުން ދަމުން، ކޮންމެ ރެއެއްގެ މަޣްރިބް ނަމާދަށްފަހުގައިވެސް ފޫހިކަމެއްނެތި ޤުރްއާން ހިތުދަސްކުރުމަށް މަންހާ ވަގުތު ހުސްކުރިއެވެ.
ކީރިތި ޤުރްއާން ހިތުދަސްކުރުމުގައި މަންހާއަށް އެންމެބޮޑު ޙިއްޞާއެއް ވެދެއްވީ، މަންހާގެ ލޮބުވެތި މަންމައާއި ބައްޕައެވެ. އަދި، ކީރިތި ޤުރްއާނާބެހޭ ޤައުމީ މަރުކަޒުގެ އުސްތާޛުންނާއި، މަންހާގެ ޢާއިލާގެ މެންބަރުން ދެއްވި ހިތްވަރު ޝުކުރުވެރިކަމާއެކުގައި ފާހަގަކުރެއެވެ.
އާމިނަތު މަންހާ ބިންތް އިސްމާޢީލް، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 2 ނޮވެންބަރު 2024 ގައެވެ.