އަލްޙާފިޡާ ޢާއިޝަތު ޒީކް ރިޔާޟް
ޢާއިޝަތު ޒީކް ރިޔާޟްގެ ބޭބެއާއި ދައްތަމެން، ޤުރްއާން ކިޔެވުމުގެ އެކިއެކި މުބާރާތްތަކުގައި ވާދަކުރަމުން ގެންދިޔައިރު، ބޭބެއާއި ދައްތަމެން މުބާރާތްތަކަށް ފަރިތަކުރަމުންދާ އަޑު ގޭތެރެއިން އަބަދުވެސް އިވެމުންދިޔުމަކީ، ކީރިތި ޤުރްއާން ކިޔެވުމަށް ޒީކް ޝައުޤުވެރިވި ސަބަބެވެ. ކުޑައިރުއްސުރެ ޕްރީސްކޫލް މަރުޙަލާގައި ޤުރްއާނުގެ ކުރު ސޫރަތްތައް، ޒީކް ހިތުން ދަސްކޮށް، މުބާރާތްތަކުގައި ޒީކް ވާދަކުރަމުންދިޔައެވެ.
ޢާއިޝަތު ޒީކް ރިޔާޟް، ކީރިތި ޤުރްއާން ހިތުދަސްކުރަން ފެށީ، 2018ވަނަ އަހަރު، ކީރިތި ޤުރްއާނާބެހޭ ޤައުމީ މަރުކަޒުގެ ޙިފްޡު ކުލާހުގައި ބައިވެރިވެގެންނެވެ. ކީރިތި ޤުރްއާން ހިތުދަސްކުރުމުގައި ޒީކް ގެންގުޅޭ އުސޫލުތަކަށް ބަލާއިރު، އާ ކޮންމެ ފިލާވަޅެއް ދަސްކުރަނީވެސް އެ ފިލާވަޅު ކިޔަވައިފައިވާ މަޝްހޫރު ޤާރީއެއްގެ ކިޔެވުން 10 ވަރަކަށް ފަހަރު އަޑުއަހައި އަދި އެ ފިލާވަޅު ބަލައިގެން ކިޔަވައި، ކުށެއްނުލައި ކިޔެވޭވަރަށް ފަރިތަކޮށްގެންނެވެ. މިއީ ކީރިތި ޤުރްއާން ހިތުދަސްކުރާ ކުއްޖަކަށް ވަރަށް މުހިންމު ކަމެއް ކަމަށް ޒީކް ގަބޫލުކުރެއެވެ.
ޢާއިޝަތު ޒީކް ރިޔާޟް، ކީރިތި ޤުރްއާން ހިތުދަސްކޮށް ނިމުނީ، އުމުރުން އެންމެ 12 އަހަރުގައި 2022ވަނަ އަހަރުއެވެ. އެއަށްފަހު، ކީރިތި ޤުރްއާނާބެހޭ ޤައުމީ މަރުކަޒުގެ މުރާޖަޢާ ކުލާހުން މުރާޖަޢާކޮށް، ޙިފްޡު ކޮމިޓީއަށް ކިޔައިދިނީއެވެ.
ކީރިތި ޤުރްއާން ހިތުދަސްކުރުމުގައި އެކިގޮތްގޮތުން އެހީވެދިން ހުރިހާ ފަރާތްތަކުގެ އަގު ޒީކް ވަޒަން ކުރެއެވެ. ޚާއްޞަކޮށް، މައިންބަފައިންނާއި ޢާއިލާގެ އިތުރަށް، ކީރިތި ޤުރްއާނާބެހޭ ޤައުމީ މަރުކަޒުގެ ލޮބުވެތި މުދައްރިސުން ހިމެނޭ ގޮތުންނެވެ.
ޢާއިޝަތު ޒީކް ރިޔާޟް، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރީ، 22 ސެޕްޓެންބަރު 2024 ގައެވެ.