އަލްޙާފިޡް އިބްރާހީމް ނަފީސް ޙުސައިން
އިބްރާހީމް ނަފީސް ޙުސައިނަކީ، ޢިލްމު އުނގެނުމުގައި ގިނަ ހަރުފަތްތަކެއް ގިރާކުރައްވައި، ގިނަގުނަ ކާމިޔާބީތަކެއް ހޯއްދަވައިފައިވާ ބޭފުޅެކެވެ. ކީރިތި ޤުރްއާނަކީ، މާތްﷲގެ މަތިވެރި ކަލާމްފުޅު ކަމުގައިވާތީ، އެ ކަލާމްފުޅު ދަސްކުރުމަކީ، ދުނިޔެއާއި އާޚިރަތުގައި މަތީ ދަރަޖައެއް ލިބިގެންވާ ކަމަކަށްވުމާއެކު، އިބްރާހީމް ނަފީސް ޙުސައިންގެ ހިތްޕުޅުގައި ކީރިތި ޤުރްއާން ހިތުދަސްކުރެއްވުމުގެ ޝައުޤުވެރިކަން އުފެދި، އެކަމަށް މަސައްކަތް ފެށްޓެވިއެވެ.
އިބްރާހީމް ނަފީސް ޙުސައިން، ކީރިތި ޤުރްއާން ހިތުދަސްކުރެއްވީ، އައްޑުއަތޮޅު ހިތަދޫ "މަސްޖިދު އިބްރާހީމް" ގައެވެ. އެ މިސްކިތް ހުޅުވުމާއެކު، އެ މިސްކިތުގެ އިމާމު އަލްޙާފިޡް އިބްރާހީމް ޝިހާބުގެ އިރުޝާދުގެ ދަށުން ކީރިތި ޤުރްއާން ހިތުދަސްކުރެއްވުމުގެ ޢަމަލީ މަސައްކަތް ފެށްޓެވިއެވެ.
ގިނަދުވަސްތަކެއްނުވެ ކީރިތި ޤުރްއާން ހިތުދަސްކުރެއްވުމަށް ފެށްޓެވި ދަތުރު ނިންމަވައިލެއްވީ، 2024ވަނަ އަހަރު އައްޑޫސިޓީގެ ޙިފްޡު ކޮމިޓީއަށް ކިޔުއްވައި ދެއްވައިގެންނެވެ. ކީރިތި ޤުރްއާން ހިތުދަސްކުރެއްވުމަށް އެންމެބޮޑު އެހީތެރިކަމަކާއި ހިތްވަރެއް ދެއްވި އަލްޙާފިޡް އިބްރާހީމް ޝިހާބުގެ ޚިދުމަތް، އިބްރާހީމް ނަފީސް ޙުސައިން، ޝުކުރުވެރިކަމާއެކުގައި ފާހަގަކުރައްވައެވެ.
އިބްރާހީމް ނަފީސް ޙުސައިން، 2ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 7 ސެޕްޓެންބަރު 2024 ގައެވެ.