އަލްޙާފިޡާ ޢާއިޝަތު ލިޒީ
ޢާއިޝަތު ލިޒީ، ސްކޫލްގައި ކިޔަވައި ވިދާޅުވި ދުވަސްވަރު، ށ. މިލަންދޫ ސްކޫލުން އިންތިޒާމުކުރާ ޤުރްއާން މުބާރާތުގައްޔާއި، މިލަންދޫގެ އެކިއެކި ޖަމްޢިއްޔާ ޖަމާޢަތްތަކުން އިންތިޒާމުކުރާ ޤުރްއާން މުބާރާތުގައްޔާއި، އަތޮޅު ކައުންސިލުގެ ޤުރްއާން މުބާރާތުގެ އިތުރުން، ކީރިތި ޤުރްއާން ކިޔެވުމުގެ ޤައުމީ މުބާރާތްތަކުގެ ހިތުދަސްކުރުމުގެ ގޮފީގައި އެކި އުމުރުފުރާތަކުން ބައިވެރިވެވަޑައިގެން، ގިނަ ކާމިޔާބީތަކެއް ހޯއްދަވައިފައި ވެއެވެ.
ޢާއިޝަތު ލިޒީ، ކީރިތި ޤުރްއާން ހިތުދަސްކުރައްވަން ފެށްޓެވީ، އެ ކާމިޔާބީތަކުގެ ތެރެއިންނެވެ. އެގޮތުން، ށ. މިލަންދޫގައި ހިންގަމުންގެންދާ ޢަފާފް ޤުރްއާން ކުލާހުގައި 2015ވަނަ އަހަރު، ކީރިތި ޤުރްއާން ހިތުދަސްކުރައްވަން ފެށްޓެވިއެވެ. ހުކުރު ދުވަހާއި، ހޮނިހިރު ދުވަސް ފިޔަވައި، ކޮންމެ ދުވަހަކު ހަވީރާއި ރޭގަނޑު ކީރިތި ޤުރްއާން ހިތުދަސްކުރައްވަމުން ގެންދެވިއެވެ. އަދި އުމުރުން 18 އަހަރުގައި ކީރިތި ޤުރްއާން އެކީގައި ހިތުދަސްކުރައްވައި ނިންމެވިއެވެ. މީގެއިތުރުން، 2020ވަނަ އަހަރުގެ ޑިސެންބަރު މަހުން ފެށިގެން 2023ވަނަ އަހަރުގެ ޑިސެންބަރު މަހުގެ ނިޔަލަށް ތަދައްބުރު އޮންލައިން ޙިފްޡު ކުލާހުގައި ކީރިތި ޤުރްއާން މުރާޖަޢާ ކުރެއްވުމުގެ މަސައްކަތް ކުރެއްވިއެވެ. މި ކުލާހުގައި ޤުރްއާން އެއްކޮށް މުރާޖަޢާ ކުރެއްވުމަށްފަހު، 2024ވަނަ އަހަރު މާލެއަށް ވަޑައިގެން، ކީރިތި ޤުރްއާނާބެހޭ ޤައުމީ މަރުކަޒުގެ މުރާޖަޢާ ކުލާހުގައި ބައިވެރިވެވަޑައިގެން، މުރާޖަޢާ ކުރައްވައި ނިންމަވައި، ޙިފްޡު ކޮމިޓީއަށް އެ އަހަރު ކިޔުއްވައި ދެއްވައި ނިންމެވިއެވެ.
الله سُبْحَانَهُ وَتَعَالَى ދެއްވި މި މަތިވެރި ނިޢުމަތަށް ޝުކުރުވެރިވާ ހާލު، މި ކާމިޔާބީއަށް ޢާއިޝަތު ލިޒީއަށް ވާސިލުވެވަޑައިގެންނެވުނީ، ލޮބުވެތި މައިންބަފައިންނާއި، ޢާއިލާގެ މެންބަރުންނާއި، ކިޔަވައިދެއްވި އުސްތާޛުންގެ އިތުރުން، މިކަމުގައި ހިތްވަރު ދެއްވި ގާތް އެކުވެރިންގެ ހެޔޮ ދުޢާއާއި، ދެއްވި ހިތްވަރުންކަން ޢާއިޝަތު ލިޒީ އުފަލާއެކުގައި ފާހަގަކުރައްވައެވެ.
ޢާއިޝަތު ލިޒީ، 1ވަނަ ދަރަޖައިގައި ފާސްވެ، ޙާފިޡް ކަމުގެ ސަނަދު ހާސިލުކުރެއްވީ، 3 ސެޕްޓެންބަރު 2024 ގައެވެ.