އަލްފާޟިލާ ސަޢުދިއްޔާ ޢަލީ
ސަޢުދިއްޔާ ޢަލީ، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 27 މާރިޗު 1989 ގައެވެ. ފުރަތަމަ އަދާކުރެއްވީ، ފ.އަތޮޅު އަތޮޅުއޮފީހުގެ ވޯކީޓޯކީ އޮޕަރޭޓަރުގެ މަގާމެވެ. އޭގެފަހުން، އަތޮޅުއޮފީހުގެ ރޭޑިއޯ ޓެލެފޯން އޮޕަރޭޓަރު ކަމާއި، ފ.މަގޫދޫ އޮފީހުގެ ވޯކީޓޯކީ އޮޕަރޭޓަރ ކަމާއި، ސީނިއަރ ވޯކީޓޯކީ އޮޕަރޭޓަރ ކަމާއި، އެސިސްޓެންޓް ސެކްރެޓެރީ ކަމާއި، މަގޫދޫ ކައުންސިލުގެ އިދާރާގެ އެސިސްޓެންޓް އެޑްމިނިސްޓްރޭޓިވް އޮފިސަރު ކަމުގެ މަގާމުވެސް އަދާކުރެއްވިއެވެ. ސަޢުދިއްޔާ މިހާރު ހުންނެވީ، އެސިސްޓެންޓް ކައުންސިލް އޮފިސަރު ކަމުގެ މަގާމުގައެވެ.
މި ވޭތުވެދިޔަ 35 އަހަރަށްވުރެ ދިގު މުއްދަތުގެތެރޭގައި، ސަޢުދިއްޔާ ޢަލީ މައިގަނޑު ގޮތެއްގައި ކުރައްވައިފައި ވަނީ، އިދާރީ މަސައްކަތްތަކެވެ. އެގޮތުން، ވޯކީޓޯކީގެ ޒަރީއާއިންނާއި، ރޭޑިއޯ ޓެލެފޯނުން އަތޮޅުގެ ރަށްރަށާ ގުޅުއްވައިގެން، މެސެޖު ނަންގަވައި ފޮނުއްވުމާއި، އަތޮޅުއޮފީހަށް ލިބޭ މެސެޖުތައް ނަންގަވައި، ވެރިންގެ މަޝްވަރާގެ މަތިން މެސެޖުތަކަށް ޖަވާބު ދެއްވުން ހިމެނެއެވެ. އަދި މުވައްޒަފުންގެ ހާޒިރީއާއި، ސަލާމާއި ޗުއްޓީއާ ބެހޭ ކަންތައްތައް ބެލެހެއްޓެވުމާއި، ފައިސާއާ ބެހޭ މަސައްކަތްތައްވެސް ވަނީ ކުރައްވައިފައެވެ. މީގެ އިތުރުން، ރަށުއޮފީހުގައި ބާއްވަންޖެހޭ އެކިއެކި ބައްދަލުވުންތަކުގައި ބައިވެރިވެވަޑައިގެން، ޔައުމިއްޔާ ލިޔުއްވުމާއި، އޮފީހުގެ ވަޒީފާއާ އަލަށް ގުޅިވަޑައިގަންނަވާ މުވައްޒަފުންނަށް މަސައްކަތްތައް ކުރާނެގޮތް އޮޅުންފިލުއްވައި ދެއްވައި، އިރުޝާދު ދެއްވަމުންވެސް ގެންދަވައިފައި ވެއެވެ. އޮފީހުގެ ސްޓޮކް ބެލެހެއްޓުމާއި، ތަކެތި ދޫކުރެއްވުމާއި، ޚުޠުބާ ހަވާލުކުރެއްވުމުގެ މަސައްކަތްވެސް ސަޢުދިއްޔާ ކުރައްވަމުން ގެންދަވައިފައި ވެއެވެ.
ސަޢުދިއްޔާ ޢަލީ، މިހާރު އަދާކުރައްވަމުން ގެންދަވާ ވަޒީފާގެ ހައިސިއްޔަތުން ކުރައްވަމުން ގެންދަވާ މަސައްކަތްތަކުގެ ތެރޭގައި، ކައުންސިލުގެ ބައްދަލުވުންތައް އިންތިޒާމު ކުރެއްވުމާއި، ކައުންސިލުގެ ބައްދަލުވުންތަކަށް ބޭނުންވާ މައުލޫމާތުތައް އެއްކުރެއްވުމާއި، ބައްދަލުވުންތަކުގެ ޔައުމިއްޔާ ލިޔުއްވުން ހިމެނެއެވެ. ޞިއްޙީ މަރުކަޒުން ހިންގާ، ރަށުތެރެ ސާފުކުރުމުގެ މަސައްކަތުގައިވެސް ސަޢުދިއްޔާ ޢަމަލީގޮތުން ބައިވެރިވެވަޑައިގަންނަވަމުން ގެންދަވާކަން ފާހަގަކޮށްލަން ޖެހެއެވެ.
ސަޢުދިއްޔާ ޢަލީ، 35 އަހަރަށްވުރެ ދިގު މުއްދަތެއް ވަންދެން ދައުލަތަށް ޚިދުމަތް ކޮށްދެއްވައިފައިވާއިރު، ދުވަހަކުވެސް އޮފީހަށް ގަޑިޖެހިފައެއް ނުވެއެވެ.