އަލްފާޟިލް މުޙައްމަދު ޢާމިރު
މުޙައްމަދު ޢާމިރު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 13 ފެބުރުވަރީ 1986 ގައެވެ. ފުރަތަމަ އަދާކުރެއްވީ، ސިވިލްއޭވިއޭޝަން އޮތޯރިޓީގެ ރޭޑިއޯ ޓެކްނީޝަން (ޓްރޭނީ)ގެ މަގާމެވެ. އޭގެފަހުން، މޯލްޑިވްސް އެއަރޕޯޓްސް އޮތޯރިޓީގެ އިލެކްޓްރޯނިކްސް އިންޖިނިއަރގެ މަގާމާއި، ސީނިއަރ އިންޖިނިއަރގެ މަގާމާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ޑެޕިއުޓީ ޑިރެކްޓަރުގެ މަގާމާއި، ޗީފް ސްޓްރެޓީޖިކް ޕްލޭނިންގ އޮފިސަރުގެ މަގާމު އަދާކުރައްވައިފައި ވެއެވެ. އަދި ޗީފް، އިންޖިނިއަރިންގ އެންޑް މެއިންޓެނަންސް ކަމުގެ މަގާމާއި، ޗީފް، ކޯޕަރޭޓް ސްޓްރެޓީޖިކް ޕްލޭނިންގގެ މަގާމާއި، ޖެނެރަލް މެނޭޖަރު ކަމުގެ މަގާމާއި، ސީނިއަރ ޖެނެރަލް މެނޭޖަރު ކަމުގެ މަގާމުވެސް އަދާކުރައްވައިފައި ވެއެވެ. މުޙައްމަދު ޢާމިރު މިހާރު ހުންނެވީ، ޑެޕިއުޓީ ޗީފް އޮފިސަރުގެ މަގާމުގައެވެ.
މުޙައްމަދު ޢާމިރު ވަނީ، އިނގިރޭސިވިލާތުގައި، އިލެކްޓްރިކަލް އެންޑް އިލެކްޓްރޯނިކްސްގެ ދާއިރާއިން ބެޗްލަރ އޮފް އިންޖިނިއަރިންގ ޑިގްރީ ހާސިލުކުރައްވައިފައެވެ. އަދި، ނެޝަނަލް ޔުނިވަރސިޓީ އޮފް ސިންގަޕޫރުން ގްރެޖުއޭޓް ޑިޕްލޮމާ އިން އޭވިއޭޝަން މެނޭޖްމަންޓާއި، އެއަރޕޯޓް މާސްޓަރ ޕްލޭނިންގއާއި، އެއަރފީލްޑް ޕޭވްމަންޓް އިންޖިނިއަރިންގ ފުރިހަމަކުރައްވައިފައި ވެއެވެ.
މި ވޭތުވެދިޔަ 35 އަހަރަށްވުރެ ދިގު މުއްދަތުގެ ތެރޭގައި، މުޙައްމަދު ޢާމިރު އަދާކުރެއްވި މަގާމުގެ މަސްއޫލިއްޔަތުގެ ގޮތުން ކުރެއްވި މަސައްކަތްތަކުގެ ތެރޭގައި، ވައިގެ ދަތުރުފަތުރާ ގުޅުންހުރި ނިޔަމިކަމާއި، މުވާސަލާތާ ގުޅޭ އާލާތްތައް ހިމެނޭގޮތަށް، އެއަރޕޯޓުގެ އެކި ފަންނީ އާލާތްތަކާއި، އިންސްޓޮލޭޝަންސްތައް ބެލެހެއްޓުމާއި، ފެންވަރު މަތިކުރުމުގެ މަސައްކަތުގައިވެސް ޢަމަލީގޮތުން ބައިވެރިވެވަޑައިގަތުން ހިމެނެއެވެ. ޕީ.ޕީ.އެސް.އެސް.ގެ ޑެޕިއުޓީ ޑިރެކްޓަރުގެ ހައިސިއްޔަތުން، ޕްރޮޖެކްޓް ފޭސް 4 އަޕްގްރޭޑިންގ ޕުރޮޖެކްޓުގެ މަސައްކަތްތައް ކުރައްވައި، އާ ކޮންޓްރޯލް ޓަވަރު، އޭ.ޓީ.އެސް. ބިލްޑިންގ، ސެކަންޑްރީ ސަރވައިލަންސް ރާޑަރ އަދި އެއާ ގުޅުންހުރި އިކުއިޕްމަންޓުތައް ހިމެނޭގޮތަށް ޕްރޮޖެކްޓް ކޮންސަލްޓަންޓާއި، އެކިއެކި ކޮންޓްރެކްޓަރުންނާއި، ޑިޕާޓްމަންޓުގެ ޑިރެކްޓަރާ އެކުގައި، ފަރުވާތެރިކަމާއެކުގައި ޢާމިރު ވަނީ، މަސައްކަތް ކުރައްވައިފައެވެ.
ޕްރޮޖެކްޓް ފޭސް 4 ކުރިއަށް ގެންދިޔުމުގައި ހުރި ގޮންޖެހުންތަކާއި، ގެންނަންޖެހޭ ބަދަލުތަކާ ގުޅޭ ރިޕޯޓުތައް ތައްޔާރުކުރައްވައި، ކުންފުނީގެ މެނޭޖްމަންޓަށާއި، ޕްރޮޖެކްޓް ކޯޑިނޭޓިންގ ކޮމިޓީއަށާއި، ޑިރެކްޓަރުންގެ ބޯޑަށް ހުށަހަޅުއްވައި ދެއްވުމުގައި، ޑިރެކްޓަރާއެކުގައިވެސް މުޙައްމަދު ޢާމިރު މަސައްކަތް ކުރައްވައިފައި ވެއެވެ. އަދި، ކުންފުނީގެ މުހިންމު މުވައްޒަފެއްގެ ހައިސިއްޔަތުން، އެއަރޕޯޓުގެ މާސްޓަރ ޕްލޭން ތައްޔާރުކުރެއްވުމުގައިވެސް މުހިންމު ދައުރެއް އަދާކުރައްވައި، އެއަރޕޯޓުގެ އިންފްރާސްޓްރަކްޗަރ ޕްލޭނިންގއާ ބެހޭ އެކި ކަންކަމުގައި، މުޙައްމަދު ޢާމިރު އެކި ގޮތްގޮތުން އެހީތެރިކަން ދެއްވައިފައިވާކަންވެސް ފާހަގަކޮށްލަން ޖެހެއެވެ.
މުޙައްމަދު ޢާމިރު ވަނީ، އެއަރޕޯޓުގެ ގިނަ އިންފްރާސްޓްރަކްޗަރ ޑިޒައިން ކުރުމުގައި، ލީޑް ރޯލެއް އަދާކުރައްވައިފައެވެ. އަދި، ޕްލޭނިންގގެ މަސައްކަތްތައް ހަރުދަނާގޮތެއްގައި ކުރުމަށްޓަކައި ރަނގަޅު ޕްލޭނިންގ ޓީމެއް ބިނާކުރުމުގައި، މުޙައްމަދު ޢާމިރު ކޮށްދެއްވައިފައިވާ މަސައްކަތްތައްވެސް ޚާއްޞަގޮތެއްގައި ފާހަގަކޮށްލަން ޖެހެއެވެ.
ކުންފުނީގެ ޚިދުމަތުގައި މުޙައްމަދު ޢާމިރު ހޭދަކުރެއްވި ދިގު މުއްދަތުގެ ތެރޭގައި، މަސައްކަތް ކުރައްވާ ޑިޕާޓްމަންޓް ހިންގެވުމުގެ އިސްވެރިޔާގެ ހައިސިއްޔަތުން އުފުއްލަވަންޖެހޭ ޒިންމާއާއި މަސްއޫލިއްޔަތު އުފުއްލަވައި، އެއަރޕޯޓުގައި ހިންގާ މަޝްރޫޢުތަކާއި، ޕްލޭނިންގ މަސައްކަތްތައް، ޒިންމާދާރުކަމާއެކުގައި ކުރައްވައިފައި ވެއެވެ.
