އަލްފާޟިލް ޢީސާ ނަޞީރު
ޢީސާ ނަޞީރު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 22 ފެބުރުވަރީ 1989 ގައެވެ. ފުރަތަމަ އަދާކުރެއްވީ، މޯލްޑިވްސް އެއަރޕޯޓްސް އޮތޯރިޓީގެ އިލެކްޓްރިޝަން ގްރޭޑް 3ގެ މަގާމެވެ. އޭގެފަހުން، އިލެކްޓްރިޝަން ގްރޭޑް 2ގެ މަގާމުވެސް އަދާކުރެއްވިއެވެ. އަދި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ސީނިއަރ އިލެކްޓްރިޝަން ގްރޭޑް 2ގެ މަގާމާއި، އެގްޒެކެޓިވް ކަމުގެ މަގާމާއި، އެސޯސިއޭޓް އިންޖިނިއަރ ކަމުގެ މަގާމާއި، ސީނިއަރ އެސޯސިއޭޓް އިންޖިނިއަރ ކަމުގެ މަގާމުވެސް އަދާކުރެއްވިއެވެ. ޢީސާ ނަޞީރު މިހާރު އަދާކުރައްވަމުން ގެންދަވަނީ، އެސިސްޓެންޓް މެނޭޖަރު ކަމުގެ މަގާމެވެ.
ޢީސާ ނަޞީރު ފާހަގަކުރެވެނީ، އެއަރޕޯޓުގެ އިލެކްޓްރިކަލް ސިސްޓަމްތައް މަރާމާތުކުރައްވައި، ބަލަހައްޓަވަމުން ގެންދަވާ ހީވާގި ބޭފުޅެއްގެ ގޮތުގައެވެ. މީގެތެރޭގައި، ބެގެޖް ހޭންޑްލިންގ ސިސްޓަމާއި، ފިއުލްފާރމްގެ އިލެކްޓްރިކަލް ކޮންޓްރޯލް ސިސްޓަމާއި، އޮޓޮމެޓިކް ދޮރުތަކާއި، ލޯންޑްރީ މެޝިންތައް ހިމެނެއެވެ. މީގެއިތުރުން، މަސައްކަތް ކުރައްވާ ޔުނިޓުގެ އިސް ބޭފުޅެއްގެ ހައިސިއްޔަތުން މުވައްޒަފުންނާ ގުޅޭ ހުރިހާ ކަމެއްވެސް، މުވައްޒަފުންނާ ވަރަށްގާތުން ޢީސާ ނަޞީރު ބަލަހައްޓަވަމުން ގެންދަވައެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ކުރިއެރުމަށް، ޢީސާ ނަޞީރު ކޮށްދެއްވައިފައިވާ ބައެއް އެހެން ކަންތައްތަކުގެ ތެރޭގައި، އާ ޓެކްނޮލޮޖީ ބޭނުންކުރައްވައިގެން، ސްޓޯމް ވޯޓަރ ސިސްޓަމް އޮޓޮމައިޒް ކުރެއްވުމާއި، ރާއްޖޭގެ މޫސުމަށް ފެތޭގޮތަށް، އޮޓޯ ދޮރުތައް މަރާމާތު ކުރެއްވުން ހިމެނެއެވެ.
ޢީސާ ނަޞީރަކީ، ކުންފުނިން ހިންގާ ހުރިހާ މަސައްކަތްތަކެއްގައިވެސް ޢަމަލީގޮތުން ބައިވެރިވެވަޑައިގެން، އެއްބާރުލުން ދެއްވަމުން ގެންދަވާ ބޭފުޅެކެވެ. ޚާއްޞަކޮށް، ޤައުމީ އެކިއެކި މުނާސަބަތު ފާހަގަކުރުމުގެ ގޮތުން ކުންފުނިން ތައްޔާރުކުރާ އެކިއެކި ފުޅަނދުތައް ހެދުމުގައި ޢަމަލީގޮތުން ބައިވެރިވެވަޑައިގަންނަވަމުން ގެންދަވާ ބޭފުޅެކެވެ. އަދި، ސްކައުޓް އެސޯސިއޭޝަން ފަދަ ހިލޭ ސާބަހަށް މަސައްކަތްކުރާ ޖަމާޢަތްތަކުގެ އިވެންޓްތަކުގައި ކުންފުނި ތަމްސީލު ކުރައްވަމުން ގެންދަވާ، ހާޒިރީއަށް ފަރުވާތެރި ބޭފުޅެއްވެސް މެއެވެ.
ޢީސާ ނަޞީރު، ދައުލަތަށް ޚިދުމަތް ކުރައްވަމުން ގެންދަވާތާ މިހާރު 35 އަހަރަށްވުރެ ދިގު މުއްދަތެއް ވެއްޖެއެވެ.
