އަލްފާޟިލް މުޙައްމަދު ޝިޔާޟް
މުޙައްމަދު ޝިޔާޟް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 26 ޖަނަވަރީ 1989 ގައި، ޓެލެވިޜަން މޯލްޑިވްސްގެ ކެމެރާމަން (ޓްރޭނީ) އެއްގެ މަގާމުންނެވެ. އޭގެފަހުން، ޓީ.ވީ. މޯލްޑިވްސްގެ އެސިސްޓެންޓް ކެމެރާމަންގެ މަގާމާއި، ކެމެރާމަން ގްރޭޑް 1ގެ މަގާމާއި، ކެމެރާމަން ގްރޭޑް 2ގެ މަގާމާއި، ކެމެރާމަން ގްރޭޑް 3ގެ މަގާމާއި، ސީނިއަރ ކެމެރާމަން ގްރޭޑް 1ގެ މަގާމާއި، ސީނިއަރ ކެމެރާމަންގެ މަގާމު އަދާކުރައްވައިފައި ވެއެވެ. އަދި، ޕްރޮޑަކްޝަން އެގްޒެކެޓިވް ކެމެރާމަންގެ މަގާމާއި، އެގްޒެކެޓިވް ކެމެރާމަންގެ މަގާމުވެސް އަދާކުރައްވައިފައި ވެއެވެ. މުޙައްމަދު ޝިޔާޟް މިހާރު ހުންނެވީ، ޗީފް ކެމެރާމަންގެ މަގާމުގައެވެ. މުޙައްމަދު ޝިޔާޟް ދައުލަތަށް އަދި ޓެލެވިޜަން މޯލްޑިވްސްއަށާއި، ޕަބްލިކް ސަރވިސް މީޑިއާއަށް ޚިދުމަތް ކުރައްވަމުން ގެންދަވާތާ 35 އަހަރަށްވުރެ ދިގު މުއްދަތެއް ވެއްޖެއެވެ.
ކެމެރާމަން (ޓްރޭނީ) ގެ ވަޒީފާ އަދާކުރައްވަން ފެށްޓެވީއްސުރެ މުޙައްމަދު ޝިޔާޟް އެންމެބޮޑު އިސްކަމެއް ދެއްވީ، އެ މަސައްކަތް ވަރަށް ރަނގަޅަށް ދަސްކުރެއްވުމަށެވެ. އެގޮތުން، އޭރު ޓީ.ވީ. މޯލްޑިވްސްގައި ތިއްބެވި ތަޖުރިބާކާރު ކެމެރާމަނުންގެ އަރިހުން މަސައްކަތް ދަސްކުރައްވައި، އެ ބޭފުޅުންނާ ވަރަށް ގާތުން މަސައްކަތް ކުރައްވަމުން ގެންދެވިއެވެ.
މުޙައްމަދު ޝިޔާޟަކީ، ކެމެރާ އޮޕަރޭޓް ކުރުމާއި، ޚަބަރާއި، ޕުރޮގުރާމުތަކަށް ބޭނުންވާ ވީޑިއޯ މެޓީރިއަލްތައް، ބޭނުންވާ ގޮތަށް ވީޑިއޯ ކޮންޓެންޓް މޭކަރގެ ހާޒިރުގައި ނޫން ހާލަތުގައިވެސް ކޮންޓެންޓް މޭކަރ އެދޭގޮތަށް، ލިބިހުރި ވަސީލަތާއި، ހާލަތާއި ވަގުތަށް ރިޢާޔަތް ކުރައްވައިގެން، ވީހާވެސް ފުރިހަމައަކަށް ކުރައްވަމުން ގެންދަވާ ބޭފުޅެކެވެ. އަދި ލޮކޭޝަންގައި ރެކޯޑުކުރެވޭ ވީޑިއޯ ކޮންޓެންޓާއި، އެ ތަންތަނުން ލައިވްކުރެވޭ ވީޑިއޯއާއި، ޕުރޮގުރާމުތަކުގައްޔާއި، ބޮޑެތި ޕްރޮޑަކްޝަންތަކުގައި، ފަންނީގޮތުން ބޭނުންވާ ލަފައާއި އެހީތެރިކަން ދެއްވައި، ޓީމެއްގެ ގޮތުގައި މަސައްކަތް ކުރައްވަމުން ގެންދަވާކަން ފާހަގަކޮށްލަން ޖެހެއެވެ. މުޙައްމަދު ޝިޔާޟަކީ، ޕީ.އެސް.އެމް.އާ އަލަށް ގުޅިވަޑައިގަންނަވާ ކެމެރާމަނުންނަށް، އެ މުވައްޒަފުންގެ ފަންނީ ޤާބިލުކަން އިތުރުކުރުމަށާއި، ފެންވަރު ރަނގަޅުކުރެއްވުމަށްޓަކައި އެކިއެކި ތަމްރީނުތައް ދެއްވަމުން ގެންދަވާ ބޭފުޅެއްވެސް މެއެވެ.
މުޙައްމަދު ޝިޔާޟަކީ، މޯލްޑިވްސް މީޑިއާ އިންސްޓިޓިއުޓުން ހިންގާ ކޯސްތަކާއި، ތަމްރީނު ޕުރޮގުރާމުތަކުގައި ކިޔަވައިދެއްވައި، އެ ތަމްރީނުތަކަށް ބޭނުންވާ މެޓީރިއަލްތައް ތައްޔާރުކުރައްވަމުން ގެންދަވާ ބޭފުޅެކެވެ. އަދި، ކުންފުނީގައި ޚިދުމަތް ކުރައްވާ ނިއުސް ކާސްޓަރުން ތަމްރީނުކުރުމަށް، 2005ވަނަ އަހަރުން ފެށިގެން ހިންގުނު ހުރިހާ ޕުރޮގުރާމުތަކެއްގައި، އިސް ދައުރެއް އަދާކުރައްވައިފައިވާ ބޭފުޅެއްވެސް މެއެވެ. މިގޮތުން، ރާއްޖޭގެ އެކި ކަންކޮޅުތަކަށް ދަތުރުކުރައްވައި، މީހުން ތަމްރީނުކުރުމުގެ ޕުރޮގުރާމުތައް، އެކި ރަށްރަށުގައި ހިންގަވައި ދެއްވައިފައި ވެއެވެ. މީގެއިތުރުން، އެމް.އެމް.އައި. އިން ހިންގާ ޖާރނަލިޒަމް ސެޓުފިކެޓު 3 ގެ ޕްރޮގުރާމުގައްޔާއި، ދިވެހިރާއްޖޭގެ ޤައުމީ ޔުނިވަރސިޓީގެ ޖާރނަލިޒަމް ޑިގްރީ ޕުރޮގުރާމުގައި، ކެމެރާ މޮޑިއުލް ކިޔަވައި ދެއްވަމުންވެސް ގެންދަވައެވެ.
މުޙައްމަދު ޝިޔާޟަކީ، ޓެލެވިޜަން މޯލްޑިވްސްއިން ތައްޔާރުކޮށްފައިވާ އެކި ފިލްމުތަކާއި، ޑްރާމާތައްވެސް ކެމެރާ ކުރައްވައިފައިވާ ހުނަރުވެރި ކެމެރާމަނެއްވެސް މެއެވެ.