އަލްފާޟިލް މުޙައްމަދު ރަޝީދު
މުޙައްމަދު ރަޝީދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 26 ޖަނަވަރީ 1989 ގައި، ޓެލެވިޜަން މޯލްޑިވްސްގެ ކެމެރާމަން (ޓްރޭނީ) އެއްގެ މަގާމުންނެވެ. އޭރުއްސުރެ ފެށިގެން ޚިދުމަތް ކުރައްވަމުން ގެންދަވަނީ، ޓެލެވިޜަން މޯލްޑިވްސްގައި، މިހާރުގެ ޕަބްލިކް ސަރވިސް މީޑިއާގައެވެ. އަދާކުރައްވައިފައިވާ މަގާމުތަކުގެ ތެރޭގައި، އެސިސްޓެންޓް ކެމެރާމަންގެ މަގާމާއި، ކެމެރާމަން ގްރޭޑް 1ގެ މަގާމާއި، ކެމެރާމަން ގްރޭޑް 2ގެ މަގާމާއި، ކެމެރާމަން ގްރޭޑް 3ގެ މަގާމާއި، ސީނިއަރ ކެމެރާމަން ގްރޭޑް 1ގެ މަގާމާއި، ޕްރޮޑަކްޝަން އެގްޒެކެޓިވް ކެމެރާމަންގެ މަގާމާއި، އެގްޒެކެޓިވް ކެމެރާމަންގެ މަގާމު ހިމެނެއެވެ. މުޙައްމަދު ރަޝީދު މިހާރު ހުންނެވީ، ޗީފް ކެމެރާމަން ކަމުގެ މަގާމުގައެވެ.
މުޙައްމަދު ރަޝީދު، ޓީ.ވީ. މޯލްޑިވްސްގެ ކެމެރާމަންގެ ވަޒީފާ އަދާކުރައްވަން ފެށްޓެވިއިރު، އެ މަސައްކަތަށް މާބޮޑު ޝައުޤުވެރިކަމެއް ނެތްނަމަވެސް، މަސައްކަތް ފެށްޓެވި ހިސާބުން ފެށިގެން ހިތްޕުޅުގައި ޝައުޤުވެރިކަން އުފެދުނެވެ. އޭރު ކެމެރާއާބެހޭ އެއްވެސް މައުލޫމާތެއް އެނގިވަޑައިގެންފައެއް ނުވެއެވެ. ނަމަވެސް، ޓީ.ވީ. މޯލްޑިވްސްގައި އޭރު ތިއްބެވި ކެމެރާމަނުންގެ އެހީތެރިކަމާ އެކީގައި، ކެމެރާ ކުރުމުގެ މަސައްކަތް މުޙައްމަދު ރަޝީދު ދަސްކުރެއްވިއެވެ.
ވަޒީފާގައި ކުރިއަށް ވަޑައިގަތުމަށްޓަކައި އެންމެބޮޑު ހިތްވަރެއް ދެއްވީ، މުޙައްމަދު ރަޝީދުގެ ލޮބުވެތި މަންމައެވެ. ކަމެއް ކުރާނަމަ، ޝައުޤުވެރިކަމާއެކުގައި، ވީ އެންމެ ރަނގަޅަކަށް އެކަމެއް ކުރަން އާދަކުރަންވާނެ ކަމަށް ވިދާޅުވެ، މަންމަ ދެއްވި ނަސޭހަތުގައި ހިއްޕަވައިގެން، ވަޒީފާ އަދާކުރައްވަން ފެށްޓެވިގޮތަށް މިހާރުވެސް ހުންނެވީ، ކެމެރާ ކުރެއްވުމުގައެވެ. މަގާމުގެ ކުރިއެރުންތަކެއް ލިބިވަޑައިގެންނެވި ކަމުގައިވިޔަސް، ލިބިވަޑައިގެންނެވި ތަޖުރިބާއާ އެކުގައި ކެމެރާއާ ގުޅޭގޮތުން ކުރަންޖެހޭ އިތުރު މަސައްކަތްތައްވެސް މިހާރު ކުރައްވަމުން ގެންދަވައެވެ. މި ވޭތުވެދިޔަ
35 އަހަރަށްވުރެ ދިގު މުއްދަތުގެ ތެރޭގައި މުޙައްމަދު ރަޝީދު ފާހަގަކުރެވިފައި ވަނީ، ހާޒިރީއަށް ފަރުވާތެރި، ދުވަހަކުވެސް ގަޑިޖެހިފައި ނުވާ އަދި ސަލާން ވިދާޅުނުވާ، ހަވާލުކުރާ ކޮންމެ މަސައްކަތެއްވެސް ވަރަށް ފުރިހަމައަށް ކުރައްވާ ބޭފުޅެއްގެ ގޮތުގައެވެ.
ކެމެރާމަނެއްގެ ހައިސިއްޔަތުން، މުޙައްމަދު ރަޝީދު ކުރެއްވި މަސައްކަތްތަކުގެ ތެރޭގައި، ޓީ.ވީ. މޯލްޑިވްސްގެ ޚަބަރާއި، އެކި ޕުރޮގުރާމުތަކަށް ބޭނުންވާ ވީޑިއޯތައް، އެ ބޭނުންވާ ގޮތަށް ނަންގަވައި ދެއްވުމާއި، ޕުރޮގުރާމުތަކުގައްޔާއި، ބޮޑެތި ޕްރޮޑަކްޝަންތަކުގައި އެކިއެކި ރެކޯޑިންގތައް ތައްޔާރުކުރެއްވުން ހިމެނެއެވެ. އަދި، މާލޭގައި ބާއްވަވާ އެކިއެކި ރަސްމިއްޔާތުތަކާއި، ޖަލްސާތަކާއި، ޙަފުލާތައް ލައިވްކުރުން ފަދަ ކަންކަމުގައި ދުރާލައި ރާއްވަވައިގެން އިންތިޒާމުތައް ހަމަޖައްސަވަމުން ގެންދަވައެވެ. ކަންކަމުގައި ބޭނުންވާ ލަފަޔާއި އެހީތެރިކަން، ކަމާބެހޭ ބައްދަލުވުންތަކުގައި ބައިވެރިވާ ޓީމުގެ މެންބަރުންނަށް ހިއްސާކުރައްވައި، ކެމެރާމަން އެކަނި ކުރާ ޝޫޓުތަކުގައި ލައިޓް އަދި ސައުންޑް ބޭނުންކޮށްގެން، ބޭނުންވާ މެޓީރިއަލް ނެންގެވުމާއި، ލައިވް އިވެންޓަކަށް ނުވަތަ ރެކޯޑިންގ ހެދުމަށް ބޭނުންވާ ތަކެތީގެ ލިސްޓުތައް ތައްޔާރުކުރެއްވުމާއި، ލިބިފައި ހުރި ވަސީލަތްތަކާއި، ހާލަތާއި ވަގުތު ތަންދޭ އެންމެ ފުރިހަމައަކަށް އެ ވީޑިއޯތައް ނަންގަވައި ދެއްވުމުގެ މަސައްކަތް، މުޙައްމަދު ރަޝީދު ކުރައްވަމުން ގެންދަވައެވެ.
މުޙައްމަދު ރަޝީދަކީ، ޓީ.ވީ. މޯލްޑިވްސް އިން ގެނެސްދީފައިވާ އެންމެ މަޝްހޫރު ޑުރާމާތަކާއި، ޕުރޮގުރާމުތަކުގައި، އިސް ކެމެރާމަނެއްގެ ގޮތުން ގިނަ މަސައްކަތްތަކެއް ކުރައްވައިފައިވާ ބޭފުޅެއްވެސް މެއެވެ. އާންމުންގެ މެދުގައި މަގުބޫލުކަން ލިބިގެންދިޔަ ގިނަ ޑްރާމާތަކުގެ ކެމެރާމަނަކީ، މުޙައްމަދު ރަޝީދެވެ. ޓީ.ވީ. މޯލްޑިވްސްއިން ގެނެސްދޭ ޕުރޮގުރާމުތަކުގެ ތެރެއިން "ހޭޔަންބޯ" ޕުރޮގުރާމަކީ މުޙައްމަދު ރަޝީދު އެންމެ ގިނަ ދުވަހު ކެމެރާ ކޮށްދެއްވި ޕުރޮގުރާމެވެ. މި ޕުރޮގުރާމު މެދުނުކެނޑި، 17 އަހަރު ވަންދެން ކެމެރާ ކޮށްދެއްވައިފައި ވެއެވެ.
މަސައްކަތުގެ ދާއިރާއިން މުޙައްމަދު ރަޝީދަށް ލިބިވަޑައިގެންފައިވާ ތަޖުރިބާގެ އަލީގައި، އެކުގައި މަސައްކަތް ކުރައްވާ އެހެން މުވައްޒަފުންނަށް ކަންކަން އޮޅުންފިލުއްވައި ދެއްވަމުން ގެންދަވައެވެ.
ދައުލަތަށް މި ކުރެއްވި ޚިދުމަތުގެ އަގު ވަޒަންކުރައްވައި، ދިގު މުއްދަތަށް ޚިދުމަތް ކުރުމުގެ ޝަރަފު މިއަދު ލިބިވަޑައިގަންނަވާކަން އެއީ، މުޙައްމަދު ރަޝީދަށް ލިބިވަޑައިގަންނަވާ ވަރަށްބޮޑު އުފާފުޅެކެވެ. އަދި ވަރަށްބޮޑު ހިތްޕުޅުހަމަޖެހިވަޑައިގަތުމެއްވެސް މެއެވެ.
