އަލްފާޟިލް ޙުސައިން ޝުހާދު
ޙުސައިން ޝުހާދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، ޓެލެވިޜަން މޯލްޑިވްސްގެ ޓެކްނީޝަން (ޓްރޭނީ) ގެ ވަޒީފާއިން، 9 ޖަނަވަރީ 1989 ގައެވެ. ފުރަތަމަ މަސައްކަތް ކުރެއްވީ، ޓެކްނީޝަނެއްގެ ގޮތުގައެވެ. އޭގެފަހުން، ޓީ.ވީ. މޯލްޑިވްސްގެ ޕްރޮޑަކްޝަން ޓެކްނީޝަން ގްރޭޑް 1ގެ މަގާމާއި، ޕްރޮޑަކްޝަން ޓެކްނީޝަން ގްރޭޑް 2ގެ މަގާމާއި، ޕްރޮޑަކްޝަން ޓެކްނީޝަން ގްރޭޑް 3ގެ މަގާމާއި، ސީނިއަރ ޕްރޮޑަކްޝަން ޓެކްނީޝަން ގްރޭޑް 1ގެ މަގާމާއި، ސީނިއަރ ޕްރޮޑަކްޝަން ޓެކްނީޝަން ގްރޭޑް 3ގެ މަގާމާއި، އެސިސްޓެންޓް ޑިރެކްޓަރުގެ މަގާމު އަދާކުރައްވައިފައި ވެއެވެ. އަދި، އެކްޓިންގ ޑިރެކްޓަރ، އިންޖިނިއަރިންގގެ މަގާމާއި، ޑިރެކްޓަރ، އިންޖިނިއަރިންގގެ މަގާމާއި، ޑިރެކްޓަރ، ޕްލޭނިންގ އެންޑް އިންފްރާސްޓްރަކްޗަރގެ މަގާމާއި، ޗީފް ޓެކްނިކަލް އޮފިސަރުގެ މަގާމުވެސް އަދާކުރައްވައިފައި ވެއެވެ. ޙުސައިން ޝުހާދު މިހާރު ހުންނެވީ، ޕަބްލިކް ސަރވިސް މީޑިއާގެ ޑިރެކްޓަރ، ބްރޯޑްކާސްޓިންގ ޓެކްނޮލޮޖީގެ މަގާމުގައެވެ.
ޕަބްލިކް ސަރވިސް މީޑިއާގެ ރޭޑިއޯއާއި، ޓީ.ވީ.ގެ ބްރޯޑްކާސްޓިންގއާ ގުޅޭ ޓެކްނިކަލް ވަސީލަތްތަކާއި، އެކިއެކި އާލާތްތައް، ބޭނުންކުރެވޭ ހާލަތުގައި ބެހެއްޓުމަށްޓަކައި ކުރަންޖެހޭ މަސައްކަތްތައް ރާއްވަވައި އިންތިޒާމު ކުރައްވަމުން ގެންދަވާ އެންމެ އިސް ބޭފުޅަކީ، ޙުސައިން ޝުހާދެވެ. އަދި، މުޅި ރާއްޖެއަށް ރޭޑިއޯއާއި، ޓީ.ވީ.ގެ ޚިދުމަތް ފޯރުކޮށްދިނުމަށްޓަކައި ބޭނުންވާ ޓެކްނިކަލް އިންފްރާސްޓްރަކްޗަރ ގާއިމުކޮށް، ޚިދުމަތް ދިނުމުގެ އެންމެ އިސް ބޭފުޅަކީވެސް ޙުސައިން ޝުހާދެވެ. ޙުސައިން ޝުހާދަކީ، ޕަބްލިކް ސަރވިސް މީޑިއާއިން ދޭ ޚިދުމަތްތައް، ޒަމާނީ ޓެކްނޮލޮޖީއަށް ބަދަލުކުރުމަށް ކުރެވުނު މަސައްކަތުގައްޔާއި، އެކަންކަން ހިންގެވުމުގައި އެންމެ އިސްކޮށް މަސައްކަތް ކުރެއްވި އެއް ބޭފުޅެވެ.
1994ވަނަ އަހަރު "ޓީ.ވީ.އެމް. ޕްލަސް"ގެ ނަމުގައި ޓީ.ވީ. ޗެނަލެއް ވުޖޫދަށް ގެނައުމުގެ އެއް މޭސްތިރިއަކީ، ޙުސައިން ޝުހާދެވެ. އަދި ރާއްޖޭގެ އެންމެ ގިނަ ދުވަސްވީ ޓެލެވިޜަން ޝޯ "ހޭޔަންބޯ" އެންމެ ފުރަތަމަ އުފެއްދުމުގެ އިސް މޭސްތިރިންގެ ތެރޭގައިވެސް، ޙުސައިން ޝުހާދު ހިމެނިވަޑައިގަންނަވައެވެ. ޙުސައިން ޝުހާދު ވަނީ ދެފަހަރެއްގެ މަތިން ޤައުމީ ފިލްމު އެވޯޑްސްގެ އެންމެ މޮޅު ޑޮކިއުމެންޓްރީ އެޑިޓަރ ކެޓަގަރީން އެވޯޑު ހާސިލުކުރައްވައިފައެވެ.
ޙުސައިން ޝުހާދު ވަނީ، ވޭތުވެދިޔަ 35 އަހަރުގެ ތެރޭގައި، ބްރޯޑްކާސްޓިންގ ދާއިރާގައި، ހިންގުންތެރިކަމާއި، ފަންނިއްޔާތުގެ ދާއިރާއިން ފާހަގަކޮށްލެވޭ މުހިންމު ޚިދުމަތްތަކެއް ކުރައްވައިފައެވެ. މިގޮތުން، ސަރުކާރުން ބާއްވަވާ ކޮންމެ ރަސްމިއްޔާތެއް ނުވަތަ ޖަލްސާއެއް ނުވަތަ ހަފުލާއެއް ހިނގަމުންދާއިރު، އެއިން ކޮންމެ ކަމެއްގައިވެސް ޝުހާދުގެ ބައިވެރިވެވަޑައިގަތުން ވަރަށް ފުރިހަމައަށް ލިބެމުންދާކަންވެސް ފާހަގަކޮށްލަން ޖެހެއެވެ.
ވަޒީފާ އަދާކުރާ މާޙައުލަކީ، ގިނަ އެއްޗެހި ދަސްވާ މާޙައުލެއް ކަމަށް ޙުސައިން ޝުހާދު އަބަދުވެސް ދެކެވަޑައިގަންނަވައެވެ. ޝުހާދަށް ލިބިވަޑައިގަންނަވާ އެންމެބޮޑު އުފާފުޅަކީ، ޓެލެވިޜަން މޯލްޑިވްސްގައި، 35 އަހަރަށްވުރެ ދިގު މުއްދަތެއްގައި ޚިދުމަތް ކުރައްވައިފައި ވުމާއެކު، ޕަބްލިކް ސަރވިސް މީޑިއާގެ ވަޒީފާއާ އަލަށް ގުޅިވަޑައިގަންނަވާ މުވައްޒަފުން ބިނާކުރެއްވުމަށާއި، އެ މުވައްޒަފުން ކުރިއަށް ދިޔުމަށް މަގުފަހިކޮށްދިނުމުގެ ފުރުޞަތު ލިބިވަޑައިގެންފައި ވުމެވެ. ޝުހާދުގެ ޓީމުގައި މަސައްކަތް ކުރައްވަމުން ގެންދަވާ އަދި ކުރައްވައިފައިވާ ގިނަ މުވައްޒަފުން މިހާރުވެސް ޕަބްލިކް ސަރވިސް މީޑިއާގެ އެކި ޑިޕާޓްމަންޓުތަކުގައްޔާއި، މީޑިއާގެ އެކި ދާއިރާތަކުގައި ގެންދަވަނީ، ޚިދުމަތް ކުރަމުންނެވެ.