ޕްރިޒަން ސްޓާފް ސާރޖަންޓް މުޙައްމަދު ވަޙީދު
ޕްރިޒަން ސްޓާފް ސާރޖަންޓް މުޙައްމަދު ވަޙީދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 21 ޖޫން 1988 ގައި، މާފުށީގައި ހުންނަ ކުޑަކުދިންގެ އިޞްލާޙިއްޔާގެ ޑްރައިވަރު ކަމުގެ މަގާމުންނެވެ. އޭގެފަހުން، ޕްރިޒަންސް ޑިވިޜަންގެ ޑްރައިވަރުގެ މަގާމާއި، މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީގެ ގާމާދޫ ޑްރައިވަރުގެ މަގާމާއި، ޑިޕާޓްމަންޓް އޮފް ކަރެކްޝަންސްގެ ދޯނީގެ ފަޅުވެރި ކަމުގެ މަގާމާއި، ޑިޕާޓްމަންޓް އޮފް ޕެނިޓެންޝަރީ އެންޑް ރިހެބިލިޓޭޝަން ސަރވިސަސްގެ ފަޅުވެރި ކަމުގެ މަގާމާއި، ލޯންޗު ފަޅުވެރި ކަމުގެ މަގާމާއި، ޕްރިޒަންސް އޮފިސަރ (ޓްރޭނީ)ގެ ރޭންކުގައްޔާއި، ޕްރިޒަން ލާންސްކޯޕްރަލްގެ ރޭންކުގައްޔާއި، މޯލްޑިވްސް ކަރެކްޝަނަލް ސަރވިސްގެ ޕްރިޒަން ސާރޖަންޓުގެ ރޭންކުގައި ޚިދުމަތް ކުރައްވައިފައި ވެއެވެ.
މުޙައްމަދު ވަޙީދު، ޑިޕާޓްމަންޓް އޮފް ކަރެކްޝަންސްގައި، ދޯނީގެ ފަޅުވެރިއެއްގެ ގޮތުން، 10 އަހަރަށްވުރެ ގިނަދުވަހު ޚިދުމަތް ކުރައްވައިފައި ވެއެވެ. މީގެއިތުރުން، 2007ވަނަ އަހަރުން ފެށިގެން ޚިދުމަތް ކުރައްވަމުން ގެންދަވަނީ، ޖަލާބެހޭ ބައިގައެވެ.
މުޙައްމަދު ވަޙީދަކީ، ވަރަށް ފަރުވާތެރިކަމާއި، އިޚުލާޞްތެރިކަމާއި، ހީވާގިކަމާއެކުގައި ޚިދުމަތް ކުރައްވަމުން ގެންދަވާ ބޭފުޅެކެވެ. ހަވާލުކުރައްވާ ކޮންމެ ކަމެއްވެސް، ގަޑިއަކަށް ނިންމެވުމަށް ޚާއްޞަ ސަމާލުކަމެއް ދެއްވައިގެން މަސައްކަތް ކުރައްވަމުން ގެންދަވާ ބޭފުޅެކެވެ. އަދި ޖަލުގައި ވަޒީފާ އަދާކުރައްވާ އެހެން މުވައްޒަފުންނަށް ނަމޫނާ ދައްކަވަމުން ގެންދަވާ ބޭފުޅެއްވެސް މެއެވެ.
ޕްރިޒަން ސްޓާފް ސާރޖަންޓް މުޙައްމަދު ވަޙީދު، ދައުލަތަށް ޚިދުމަތް ކުރައްވަމުން ގެންދަވާތާ މިހާރު 35 އަހަރަށްވުރެ ދިގު މުއްދަތެއް ވެއްޖެއެވެ.