އަލްފާޟިލް ޢަބްދުﷲ ޖަމީލް
ޢަބްދުﷲ ޖަމީލް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 28 މޭ 1988 ގައި، ސިވިލްއޭވިއޭޝަން އޮތޯރިޓީގެ އެސިސްޓެންޓް މެކޭނިކެއްގެ ވަޒީފާއިންނެވެ. އޭގެފަހުން، މޯލްޑިވްސް އެއަރޕޯޓްސް އޮތޯރިޓީގެ އެސިސްޓެންޓް މެކޭނިކުގެ މަގާމާއި، މެކޭނިކް ގްރޭޑް 3ގެ މަގާމާއި، ސީނިއަރ މެކޭނިކް ގްރޭޑް 1ގެ މަގާމާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ސީނިއަރ މެކޭނިކް ގްރޭޑް 2ގެ މަގާމާއި، އެސިސްޓެންޓް އިންޖިނިއަރގެ މަގާމާއި، އެގްޒެކެޓިވް މެކޭނިކުގެ މަގާމާއި، އެސޯސިއޭޓް އިންޖިނިއަރެއްގެ މަގާމު އަދާކުރައްވައިފައި ވެއެވެ. ޢަބްދުﷲ ޖަމީލް މިހާރު ހުންނެވީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ އެސިސްޓެންޓް މެނޭޖަރު ކަމުގެ މަގާމުގައެވެ.
ޢަބްދުﷲ ޖަމީލަކީ، އެއަރޕޯޓުގެ މެކޭނިކަލް ސަރވިސަސް ޑިޕާޓްމަންޓުން ހަވާލުކުރާ ކޮންމެ މަސައްކަތެއްވެސް، ދެވޭ އިރުޝާދާ އެއްގޮތަށް ފުރިހަމައަށް ނިންމެވުމަށް ޚާއްޞަ ސަމާލުކަމެއް ދެއްވަމުން، ވަރަށް ފަރުވާތެރިކަމާއެކުގައި މަސައްކަތް ކުރައްވަމުން ގެންދަވާ ބޭފުޅެކެވެ. މިގޮތުން، އެއަރޕޯޓުގައި ބޭނުންކުރާ ހުރިހާ މެޝިނަރީތަކާއި އިކުއިޕްމަންޓުތައް ސަރވިސްކޮށް ބެލެހެއްޓެވުމާއި، ސަރވިސް ޝެޑިއުލް ހައްދަވައިގެން، އެ ޝެޑިއުލްތަކާ އެއްގޮތަށް ކަންކަން ކުރައްވަމުން ގެންދަވައެވެ. އަދި އިމަރޖެންސީއެއް ދިމާވެގެން މެކޭނިކަލް ސަރވިސްއިން ކުރާ ކޮންމެ މަސައްކަތެއްގައިވެސް، ޢަބްދުﷲ ޖަމީލް، ޢަމަލީގޮތުން ބައިވެރިވެވަޑައިގެންފައިވާކަން ފާހަގަކޮށްލަން ޖެހެއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ކުރިއެރުމަށް ޢަބްދުﷲ ޖަމީލް ކޮށްދެއްވައިފައިވާ ބައެއް މުހިންމު ކަންތައްތަކުގެ ތެރެއިން، އެއަރޕޯޓުގެ މަގުތައް ހެދުމަށް ބޭނުންކުރެވުނު ބޮޑެތި އިކުއިޕްމަންޓުތައް މަރާމާތުކުރައްވައި ބެލެހެއްޓެވުން ހިމެނެއެވެ. ޢަބްދުﷲ ޖަމީލް ފާހަގަކުރެވެނީ، ކުންފުނިން ހިންގާ ހުރިހާ މަސައްކަތެއްގައިވެސް ޢަމަލީގޮތުން ބައިވެރިވެވަޑައިގެން އެއްބާރުލުން ދެއްވަމުން ގެންދަވާ ބޭފުޅެއްގެ ގޮތުގައެވެ. ކުންފުނީގެ އެސިސްޓެންޓް މެކޭނިކެއްގެ ވަޒީފާއިން ޚިދުމަތް ފަށްޓަވައި، މިހާރު އެސިސްޓެންޓް މެނޭޖަރެއްގެ މަގާމާ ހަމަޔަށް ވަޑައިގެންނެވުމަކީވެސް ޢަބްދުﷲ ޖަމީލް ހޯއްދަވައިފައިވާ މުހިންމު ކާމިޔާބީއެކެވެ.
ޢަބްދުﷲ ޖަމީލް، ކުންފުނީގައި ޚިދުމަތް ކުރައްވަމުން ގެންދަވާތާ މިހާރު 35 އަހަރަށްވުރެ ދިގު މުއްދަތެއް ވެއްޖެއެވެ.