އަލްފާޟިލް މުޙައްމަދު ސަޢީދު
މުޙައްމަދު ސަޢީދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 22 މޭ 1988 ގައި، ޓެލެވިޜަން މޯލްޑިވްސްގެ ޓެކްނީޝަން (ޓްރޭނީ) ގެ މަގާމުންނެވެ. މި ވޭތުވެދިޔަ 35 އަހަރަށްވުރެ ދިގު މުއްދަތުގައި ޚިދުމަތް ކުރައްވައިފައި ވަނީ، ޓެލެވިޜަން މޯލްޑިވްސްގައި، މިހާރުގެ ޕީ.އެސް.އެމް. ގައެވެ. މުޙައްމަދު ސަޢީދު އަދާކުރައްވައިފައިވާ މަގާމުތަކުގެ ތެރޭގައި، ޓެލެވިޜަން މޯލްޑިވްސްގެ އެސިސްޓެންޓް ޓެކްނީޝަންގެ މަގާމާއި، ޕްރޮޑަކްޝަން ޓެކްނީޝަންގެ މަގާމާއި، ސީނިއަރ ޕްރޮޑަކްޝަން ޓެކްނީޝަން ގްރޭޑް 1ގެ މަގާމާއި، އެސިސްޓެންޓް ޑިރެކްޓަރ، ސޭލްސް އެންޑް މާކެޓިންގގެ މަގާމު ހިމެނެއެވެ. މީގެއިތުރުން، ޑިރެކްޓަރ، ސޭލްސް އެންޑް މާކެޓިންގގެ މަގާމާއި، ޑިރެކްޓަރ، ކޯޕަރޭޓް އެފެއާޒްގެ މަގާމާއި، ޗީފް އޮޕަރޭޓިންގ އޮފިސަރުގެ މަގާމުވެސް އަދާކުރައްވައިފައި ވެއެވެ. މުޙައްމަދު ސަޢީދު މިހާރު ހުންނެވީ، ޑިރެކްޓަރ، ޕްރޮކިއުމަންޓުގެ މަގާމުގައެވެ.
މި ވޭތުވެދިޔަ ދިގު މުއްދަތުގެ ތެރޭގައި، މުޙައްމަދު ސަޢީދު އަދާކުރެއްވި މަގާމުގެ މަސްއޫލިއްޔަތުގެ ގޮތުން، ކުންފުނީގެ ޗެނަލްތަކުން އިޝްތިހާރު ފޮނުވުމުގެ މަސައްކަތާ އިސްވެ ހަވާލުވަޑައިގެން ހުންނަވައި، އެ މަސައްކަތް ސައުވީހަކަށް އަހަރު ކުރެއްވިއެވެ. އަދި "ޓީ.ވީ.އެމް. ޕްލަސް"ގެ ނަމުގައި، އާ ޗެނަލެއް އުފެއްދެވުމަށް ކުންފުނިން ނިންމެވުމާ ގުޅިގެން، އެ ޗެނަލް ޚިދުމަތަށް ގެނެސްދެއްވުމަށާއި، ޗެނަލް ހިންގުމަށް އެކުލަވައިލެއްވި ތިން ބޭފުޅުންގެ ޓީމުގައި މުޙައްމަދު ސަޢީދު ހިމެނިވަޑައިގެން، އެ ޗެނަލަކީ، ކާމިޔާބު އަދި ބަލާ މީހުން ޝައުޤުވެރިވާނެ ޗެނަލަކަށް ހެއްދެވުމަށް ކުރެއްވި މަސައްކަތް، ކާމިޔާބުކަމާ އެކުގައި ކުރެއްވިކަން ފާހަގަކޮށްލަން ޖެހެއެވެ. މި ޗެނަލްގައި، މުޙައްމަދު ސަޢީދުގެ އިތުރުން، އިސްކޮށް މަސައްކަތް ކުރެއްވީ، އޭރުގެ ސީނިއަރ ކެމެރާމަން ޙަސަން މައުމޫނާއި، ޓެކްނީޝަން ޙުސައިން ޝުހާދެވެ. މި ޗެނަލަކީ، ކުންފުންޏަށް އާމްދަނީ ލިބޭގޮތަށް، މަހު ފީއެއް ދައްކައިގެން، ޚިދުމަތް ދެމުން ގެންދިޔަ ޗެނަލެކެވެ. މިގޮތުން، ނުވަވަރަކަށް އަހަރު މި ޗެނަލް ހިންގުމުގައި، ޓީމާ އެކީގައި މުޙައްމަދު ސަޢީދު މަސައްކަތް ކުރެއްވިއެވެ. ކޯޕަރޭޓް އެފެއާޒް ޑިޕާޓްމަންޓުގެ ޑިރެކްޓަރ ކަމުގެ މަގާމާއި، ޗީފް އޮޕަރޭޓިންގ އޮފިސަރުގެ މަގާމުގެ ހައިސިއްޔަތުން ކުންފުނީގެ ހިންގުން ހަރުދަނާކުރައްވައި، ކަންކަން ތަރުތީބު ކުރައްވައި، އިސް މެނޭޖްމަންޓުގައި ގިނަގުނަ މަސައްކަތްތަކެއް މުޙައްމަދު ސަޢީދު ކުރައްވައިފައި ވެއެވެ.
މިހާރު ހަވާލުވެވަޑައިގެންފައިވާ މަގާމުގެ ހައިސިއްޔަތުން، ކުންފުނިން ކަނޑައަޅުއްވައިފައިވާ ސިޔާސަތުތަކުގެ ދަށުން، ކުންފުނީގެ އެކި ޑިޕާޓްމަންޓުތަކަށް ބޭނުންވާ މުދަލާއި، ޚިދުމަތް ހޯދައި ލިބިގަތުމުގައި ކުރައްވަންޖެހޭ މަސައްކަތްތައް، މުޙައްމަދު ސަޢީދު ގެންދަވަނީ ކުރައްވަމުންނެވެ.