އަލްފާޟިލް އިބްރާހީމް ރިޔާޟް
އިބްރާހީމް ރިޔާޟް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 7 މޭ 1988ގައި، ވޮކޭޝަނަލް ޓްރޭނިންގ ސެންޓަރުގެ އިންސްޓްރަކްޓަރ ގްރޭޑް 2ގެ ވަޒީފާއިންނެވެ. އޭގެފަހުން، އެ ސެންޓަރުގެ ޖޫނިއަރ އިންސްޓްރަކްޓަރުގެ މަގާމުވެސް އަދާކުރެއްވިއެވެ. 12 ސެޕްޓެންބަރު 1990 އިން ފެށިގެން އިބްރާހީމް ރިޔާޟް، ޚިދުމަތް ކުރައްވަމުން ގެންދަވަނީ، މޯލްޑިވްސް އެއަރޕޯޓްސް އޮތޯރިޓީގައެވެ. އެތާނގެ ސީނިއަރ ރެފްރިޖަރޭޝަން މެކޭނިކް ކަމާއި، އެސިސްޓެންޓް ރެފްރިޖަރޭޝަން އިންޖިނިއަރު ކަމާއި، ރެފްރިޖަރޭޝަން އިންޖިނިއަރު ކަމާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ސީނިއަރ އިންޖިނިއަރު ކަމާއި، މެނޭޖަރު ކަމާއި، އެޑްމިނިސްޓްރޭޓިވް ސަރވިސަސް ކޯޑިނޭޓަރުކަން ކުރައްވައިފައި ވެއެވެ. އިބްރާހީމް ރިޔާޟް މިހާރު ހުންނެވީ، އެއަރޕޯޓްސް ކޮމްޕެނީގެ އެގްޒެކެޓިވް އިންޖިނިއަރުގެ މަގާމުގައެވެ.
އިބްރާހީމް ރިޔާޟް، ވީ.ޓީ.ސީ.ގައި ކުރެއްވީ، މީހުން ތަމްރީނު ކުރެއްވުމުގެ މަސައްކަތެވެ. އެއީ، ރެފްރިޖަރޭޝަން އެންޑް އެއަރކޮންޑިޝަންގެ ދާއިރާއިންނެވެ. އޭގެފަހުން، އެއަރޕޯޓަށް ބަދަލުވެވަޑައިގެން މަސައްކަތް ކުރައްވަމުން ގެންދަވަނީވެސް، ރެފްރިޖަރޭޝަން އެންޑް އެއަރކޮންޑިޝަންގެ މަސައްކަތެވެ. އިބްރާހީމް ރިޔާޟް ވަނީ، އެއަރޕޯޓުގައި މަސައްކަތްކުރާ އެ ދާއިރާގެ ވަރަށްގިނަ ބަޔަކަށް އެކަމުގެ ތަމްރީނުތައް ދެއްވައިފައެވެ. އަދި އެ ދާއިރާގައި، އެއަރޕޯޓުގެ ވަޒީފާގައި ތިއްބެވި ގިނަ މުވައްޒަފުންނަކީ، އިބްރާހީމް ރިޔާޟް ތަމްރީނު ކުރެއްވި މުވައްޒަފުންނެވެ.
އިބްރާހީމް ރިޔާޟަކީ، ހަވާލުކުރެވޭ މަސައްކަތްތައް ވަރަށް ފަރުވާތެރިކަމާއެކުގައި ކުރައްވާ ބޭފުޅެކެވެ. އަދި، ވަގުތަށް ކަމޭހިއްތަވައިގެން، ކަނޑައެޅިފައިވާ ގަޑިއަކަށް، އެ މަސައްކަތެއް ނިންމެވުމަށް ޚާއްޞަ ސަމާލުކަމެއް ދެއްވައިގެން، ނިންމަވަންޖެހޭ މަސައްކަތްތައް ނިންމެވުމަށް ގިނަ ވަގުތު ހޭދަކުރައްވަމުން ގެންދަވާ ބޭފުޅެއްވެސް މެއެވެ.
ކުންފުނިން ބައިވެރިވާ އެކިއެކި ކުޅިވަރު މުބާރާތްތަކުގައްޔާއި، އަދި އިޖުތިމާއީ ހަރަކާތްތަކުގައި ކުންފުނި ތަމްސީލު ކޮށްދެއްވައި، ކުންފުންޏަށް އެކިފަހަރު މަތިން، އިބްރާހީމް ރިޔާޟް، ރީތި ނަން ހޯއްދަވައި ދެއްވައިފައި ވެއެވެ. އަދި، 1990ގެ އަހަރުތަކުން ފެށިގެން، އެއަރޕޯޓް ރިކްރިއޭޝަން ކުލަބުގެ އެކި މަގާމުތައްވެސް އަދާކުރައްވައިފައި ވެއެވެ.
އިބްރާހީމް ރިޔާޟް ފާހަގަކުރެވެނީ، ކުންފުނިން ހިންގާ އެކިއެކި ކަންކަމުގައި ޢަމަލީގޮތުން ބައިވެރިވެވަޑައިގަންނަވާ އަދި އެކަންކަން ފުރިހަމަގޮތުގައި ކުރައްވަމުން ގެންދަވާ ބޭފުޅެއްގެ ގޮތުގައެވެ. އެގޮތުން، މިނިވަންދުވަހާ ގުޅިގެން ތައްޔާރުކުރާ އެއަރޕޯޓުގެ ފުލޯޓުތައް ތައްޔާރުކުރުމުގެ މަސައްކަތުގައްޔާއި، ހުޅުލެ ސާފުކުރުމުގެ ހަރަކާތްތަކުގައްޔާއި، އަހަރީ ހަރަކާތްތަކުގެ އިތުރުން، ކުޅިވަރުތައް ރާއްވަވައި ހިންގެވުމުގައި، ޢަމަލީގޮތުން އަދާކުރައްވާ ދައުރު ފާހަގަކޮށްލަން ޖެހެއެވެ.
އިބްރާހީމް ރިޔާޟް ވަނީ، 35 އަހަރަށްވުރެ ދިގު މުއްދަތަކަށް ދައުލަތަށް ޚިދުމަތް ކުރައްވައިފައެވެ.