އަލްފާޟިލް އަޙްމަދު ނަޝީދު
އަޙްމަދު ނަޝީދު، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 1 މޭ 1988ގައި، އޭރު އޭވިއޭޝަން ސެކިއުރިޓީގެ ޚިދުމަތް ފޯރުކޮށްދެއްވަމުން ގެންދެވި ސިވިލްއޭވިއޭޝަން އޮތޯރިޓީގެ ސެކިއުރިޓީ އޮފިސަރެއްގެ މަގާމުންނެވެ. އޭގެފަހުން، މޯލްޑިވްސް އެއަރޕޯޓްސް އޮތޯރިޓީގެ އެއަރޕޯޓް ސެކިއުރިޓީ އޮފިސަރ ގްރޭޑް 3ގެ މަގާމާއި، އެއަރޕޯޓް ސެކިއުރިޓީ އޮފިސަރ ގްރޭޑް 4ގެ މަގާމާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ސީނިއަރ އެއަރޕޯޓް ސެކިއުރިޓީ އޮފިސަރުގެ މަގާމާއި، އޭވިއޭޝަން ސެކިއުރިޓީ ކޮމާންޑުގެ ޗީފް ސުޕްރިންޓެންޑެންޓް އޮފް އެވްސެކްގެ މަގާމު އަދާކުރައްވައިފައި ވެއެވެ. އަޙްމަދު ނަޝީދު މިހާރު ހުންނެވީ، ޑައިރެކްޓަރޭޓް އޮފް އޭވިއޭޝަން ސެކިއުރިޓީ އެޑްމިނިސްޓްރޭޝަންގެ ޗީފް އިންސްޕެކްޓަރ ކަމުގެ މަގާމުގައެވެ.
އަޙްމަދު ނަޝީދަކީ، 2005ވަނަ އަހަރުން ފެށިގެން 2013ވަނަ އަހަރާ ހަމަޔަށް، އެއަރޕޯޓް ސެކިއުރިޓީ ދާއިރާއިން މީހުން ބިނާކުރެއްވުމަށްޓަކައި ގިނަ ތަމްރީނުތަކެއް ހިންގަވައި ދެއްވައިފައިވާ ބޭފުޅެކެވެ. އަދި މިހާރު، އޭވިއޭޝަން ސެކިއުރިޓީ ކޮމާންޑުގައި މުދައްރިބުންގެ ގޮތުގައި މަސައްކަތް ކުރައްވަމުން ގެންދަވާ ގިނަ މުވައްޒަފުންނަކީ، އަޙްމަދު ނަޝީދު ތަމްރީނު ކުރައްވައިފައިވާ މުވައްޒަފުންނެވެ. 2013ވަނަ އަހަރު، ދިވެހިރާއްޖޭގެ އޭވިއޭޝަން ސެކިއުރިޓީ ބެލެހެއްޓެވުމުގެ މަސައްކަތް، އޭވިއޭޝަން ސެކިއުރިޓީ ކޮމާންޑަށް ބަދަލުކުރެއްވުމާ ގުޅިގެން، އަޙްމަދު ނަޝީދު ޚިދުމަތް ކުރައްވަމުން ގެންދަވަނީ އެތާނގައެވެ.
2013ވަނަ އަހަރުން ފެށިގެން 2016ވަނަ އަހަރާ ދެމެދު، އޭވިއޭޝަން ސެކިއުރިޓީ ކޮމާންޑުގައި އަޙްމަދު ނަޝީދު ހޭދަކުރެއްވި މުއްދަތުގެ ތެރޭގައި، މަދަނީ ވައިގެ ބަނދަރުތަކުން ޚިދުމަތް ލިބިގަންނަ ފަރާތްތަކަށް ރައްކާތެރި މާޙައުލެއް ގާއިމުކޮށްދެއްވުމަށްޓަކައި ގިނަގުނަ މަސައްކަތްތަކެއް ކުރައްވައިފައި ވެއެވެ. މިގޮތުން، އެއަރޕޯޓުގެ ސަލާމަތީ ކަންކަން ހަރުދަނާ ކުރެއްވުމަށްޓަކައި މެނެޖީރިއަލް ލެވެލްގައި ގިނަ މަސައްކަތްތަކެއްވެސް ވަނީ ކުރައްވައިފައެވެ.
އަޙްމަދު ނަޝީދަކީ، ޑައިރެކްޓަރޭޓް އޮފް އޭވިއޭޝަން ސެކިއުރިޓީ އެޑްމިނިސްޓްރޭޝަނާ ހަވާލުކުރެވިފައިވާ، ދިވެހިރާއްޖޭގެ ސިވިލްއޭވިއޭޝަންގެ ސެކިއުރިޓީ ރެގިއުލޭޓްކޮށް ބެލެހެއްޓުމުގެ މަސްއޫލިއްޔަތު އަދާކުރުމަށްޓަކައި ބޭނުންވާ އޯގަނައިޒޭޝަން އޮފް ސްޓްރަކްޗަރ ތައްޔާރުކުރެއްވުމާއި، "އިކާއޯ" އިން ކަނޑައަޅައިފައިވާ އޭވިއޭޝަން ސެކިއުރިޓީއާ ގުޅުންހުރި މިންގަނޑުތަކަށް ދިވެހިރާއްޖެއިން ޢަމަލުކުރުމަށް ބޭނުންވާ، ނޭޝަނަލް ސިވިލްއޭވިއޭޝަން ސެކިއުރިޓީ ޕުރޮގުރާމު އަދި މަސައްކަތަށް ބޭނުންވާ ޕޮލިސީ ޑޮކިއުމަންޓްތައް އެކުލަވައިލެއްވުމުގައި، އިސްކޮށް ހަރަކާތްތެރިވެވަޑައިގެންފައިވާ ބޭފުޅެކެވެ. އަދި، ޑާސާގެ ހެޑް އޮފް ޕޮލިސީ ރެގިއުލޭޝަން އެންޑް ޕްލޭނިންގ ސެކްޝަނާއި، ހެޑް އޮފް އިންޓަރނޭޝަނަލް ރިލޭޝަންސް އެންޑް ނިއު ޓެކްނޯލޮޖީ ޑިވެލޮޕްމަންޓް ސެކްޝަން ހިންގެވުމުގެ މަސްއޫލިއްޔަތުވެސް އަދާކުރައްވައިފައި ވެއެވެ. މިހާރު، ޑިފެންސް މިނިސްޓަރުގެ ބެއްލެވުމުގެ ދަށުން، ޑާސާ ހިންގުމުގެ އެންމެ އިސް ބޭފުޅެއްގެ ގޮތުގައި ހަމަޖައްސަވައިފައި ވަނީވެސް އަޙްމަދު ނަޝީދެވެ.
އަޙްމަދު ނަޝީދަކީ، "އިކާއޯ" އާއި، ބޭރު ޤައުމުތަކުގެ އޭވިއޭޝަން ސެކިއުރިޓީ ރެގިއުލޭޓަރީ އޮތޯރިޓީތަކާ ވިލަރެސް ކުރުމަށް ޑާާސާއިން ކަނޑައަޅުއްވައިފައި ހުންނަ "ޕޮއިންޓް އޮފް ކޮންޓެކްޓް" ވެސް މެއެވެ. މި ދެންނެވި ފަރާތްތަކާ ގުޅިގެން، ދިވެހިރާއްޖޭގެ އޭވިއޭޝަން ސެކިއުރިޓީގައި މަސައްކަތްކުރާ ފަރާތްތަކުގެ ޤާބިލުކަން އިތުރުކުރުމަށްޓަކައި ތަފާތު ގިނަ ތަމްރީނު ޕުރޮގުރާމުތަކެއް ދިވެހިރާއްޖޭގައި އަޙްމަދު ނަޝީދު ވަނީ، ހިންގަވައިފައެވެ. ހަމައެހެންމެ، ބޭރު ޤައުމުތަކުން އިންތިޒާމުކޮށްގެން ހިންގާ އޭވިއޭޝަން ސެކިއުރިޓީއާ ބެހޭ ތަމްރީނު ޕުރޮގުރާމުތަކުގައި ބައިވެރިވުމުގެ ފުރުޞަތު ރާއްޖެއަށް ހޯއްދަވައި ދެއްވުމުގައްޔާއި، ދިވެހިރާއްޖޭގެ ވައިގެ ބަނދަރުތަކުގައި މަސައްކަތްކުރާ ގިނަ ފަރާތްތަކަށް، އެ ފުރުޞަތުގެ އަލީގައި ތަމްރީނު ފޯރުކޮށްދެއްވުމުގައި، އަޙްމަދު ނަޝީދު ބައިވެރިވެވަޑައިގަންނަވަމުން ގެންދަވައެވެ.
އަޙްމަދު ނަޝީދު، ދައުލަތަށް އަދި އޭވިއޭޝަން ސެކިއުރިޓީ ދާއިރާއަށް ޚިދުމަތް ކުރައްވަމުން ގެންދަވާތާ މިހާރު 35 އަހަރަށްވުރެ ދިގު މުއްދަތެއް ވެއްޖެއެވެ.
